raglay_2021_rgs_rlt_1co_book/1co/11.json

{
  "1": "Iỡuq tơviãq jỡc mơnuĩh ngãq đõm hlãq, kung yơu hlãq la mơnuĩh đõm ngãq tui Yàc Dõc Pơtlah.",
  "2": "Hlãq mơyòp pơnõq adơi sơai kơyua sơdor trôh hlãq dơlãp dơgrữq vruãq, sì pơnõq adơi sơai kung chròq rơmiãq gơjãp dơgrữq kaya akhàt yau tui yơu hlãq song akhàt payơr. ",
  "3": "Hlãq ưng adơi sơai thơu pãc làiq Yàc Dõc Pơtlah la akõq mơnuĩh lakơi hũ, mơnuĩh lakơi la akõq mơnuĩh kamơi, sì Yàc Pô Lơnĩq la akõq Yàc Dõc Pơtlah. ",
  "4": "Mơnuĩh lakơi iơu lakơu hẽla đơp hwơr sì tơruãq kaya hagĩq nữn pãq dlòc akõq la ngãq malơu ơlah ga akõq drơi. ",
  "5": "Nữn mơnuĩh kamơi iơu lakơu hẽla đơp hwơr sì ôh tlỗp akõq nữn kung ngãq malơu alah ga akõq drơi, kơyua ngãq yơu nữn la drưh yơu kađòc kuãh akõq. ",
  "6": "Kơyua mơyah làiq sa aràc mơnuĩh kamơi ôh tlỗp akõq, nữn mơnuĩh kamơi iỡuq chơkãq bồq. Dòq mơyah làiq mơnuĩh kamơi iãh kaya chơkãq bồq hẽla kuãh akõq la ngãq malơu alah ga nhũ nữn nhũ iỡuq tlỗp akõq drơi. ",
  "7": "Mơnuĩh lakơi nữn juơi tlỗp akõq kơyua pơnõq nhũ la sẽq vơlai sì kaya gơhluh Yàc Pô Lơngĩq hũ. Nữn mơnuĩh kamơi la kaya gơlhuh ga mơnuĩh lakơi hũ. ",
  "8": "Kơyua ôh iỡuq mơnuĩh lakơi tơviãq mưng mơnuĩh kamơi, nữn mơnuĩh kamơi tơviãq mưng mơnuĩh lakơi. ",
  "9": "Kung ôh iỡuq mơnuĩh lakơi hũ chrơng pajỡc kơyua mưng mơnuĩh kamơi, nữn mơnuĩh kamơi hũ chrơng pajỡc kơyua mưng mơnuĩh lakơi. ",
  "10": "Kanoh gơtha mơnuĩh kamơi iỡuq hũ nỡm mưng gơnuar apãt pãq dlòc akõq drơi la kơyua mưng dơgrữq mơnuĩh gơnrơh. ",
  "11": "Bôh làiq yơu nữn, dơlãp Yàc, mơnuĩh kamơi ôh chàc gơnỡm trôh mơnuĩh lakơi, sì mơnuĩh lakơi kung ôh chàc gơnỡm trôh sì mơnuĩh kamơi. ",
  "12": "Kơyua yơu mơnuĩh kamơi kơyua mưng mơnuĩh lakơi nữn hũ, nữn mơnuĩh lakơi kung mưng mơnuĩh kamơi nữn hũ. Sì dơgrữq kaya kung pajỡc tơviãq mưng Yàc Pô Lơngĩq. ",
  "13": "Iỡuq iaq pơweh krơi drơi vẽq: Mơnuĩh kamơi iơu lakơu sì Yàc Pô Lơngĩq nữn ôh tlỗp akõq nữn iỡuq mĩn hẽla ôh iỡuq? ",
  "14": "ÔH iỡuq gãm sì avih tãl lơngĩq kung pơto pơnõq adơi sơai làiq mơnuĩh lakơi luơi bồq ơtah la mơlơu alah ga pơnõq nhũ yơh? ",
  "15": "Nữn mơyah làiq mơnuĩh kamơi hũ bồq ơtah, nữn la kaya gơhluh pơnõq nhũ hũ? kơyua bồq ơtah mơnuĩh kamơi hũ alĩn vrơi ga pơnõq nhũ yơu sa vlah khãt tlỗp akõq. ",
  "16": "Nữn mơyah làiq mơnuĩh halơi ưng gơrlah pơnuaĩq mưng vruãq nĩ, nữn pơnõq hlãq ôh hũ kaya adãt ngãq halơi tơmo, nữn dơgrữq Sàc Pơjũm Sơđah Yàc Pô Lơngĩq hũ kung yơu nữn. ",
  "17": "Dơlãp dơgrữq kaya pơto pơđar hadơi nĩ, hlãq ôh mơyòp pơnõq adơi sơai ôh, kơyua mưng vruãq pơtõm wỡq pơnõq adơi sơai hũ ôh ngãq ga adơi sơai siàp khưh rơlao, nữn ngãq ga pơnõq adơi sơai uãn rơlao. ",
  "18": "Hlơu viãq, hlãq hmỡq làiq dơlãp tũq pơnõq adơi sơai pơjũm pơtõm dơlãp Sàc Pơjũm Sơđah, nữn hũ kaya pa-chơlah krơi dơlãp pơnõq adơi sơai, sì hlãq sa vơnah halơi pãc tui vruãq nữn.   ",
  "19": "Kơyua viãq iỡuq hũ bôh kaya chơlah tơpuôl dơlãp pơnõq adơi sơai, tồq bôh gơnĩt mơnuĩh halơi dơlãp pơnõq adơi sơai la mơnuĩh tui tơpãq. ",
  "20": "Kơyua dơlãp tũq pơnõq adơi sơai pơjũm pơtõm sa nĩh, nữn ôh iỡuq la pioh Pơjũm Bõc Sơdor Yàc. ",
  "21": "Kơyua dơlãp tũq bõc nữn dơgrữq tãl aràc rơchãc bõc halơu kaya krơi drơi hũ, tơviãq jỡc mơnuĩh nữn lơpa viãq, dòq mơnuĩh nữn mơvũq mơvẽl. ",
  "22": "Vloh hayơu pơnõq adơi sơai ôh hũ sàc pioh bõc mơnhũm yơh? Hẽla pơnõq adơi iãq ôh-srãp Sàc Pơjũm Sơđah Yàc Pô Lơngĩq hũ sì ngãq mơlơu alah dơgrữq mơnuĩh ôh hũ hagĩq? Hlãq iỡuq đơp hagĩq sì pơnõq adơi sơai nĩ? Hlãq iỡuq sơ-uỗt mơyòp pơnõq adơi sơai mĩn? Hlãq ròq ôh mơyòp pơnõq adơi sơai kơyua mưng vruãq nĩ ôh! ",
  "23": "Kơyua hlãq song tồq mãq mưng Yàc kaya hlãq kung song pơto akhàt ga pơnõq adơi sơai, nữn la Yàc Jesu, dơlãp mơlãp Pitrai kađòc mãq, song mãq bẽn, ",
  "24": "nũn hadơi sì tũq ỡn ngai, Pitrai pẽq bẽn, đơp, \"Nĩ la rơlo rùp pôgrũ, ãt mơtai kơyua mưng pơnõq adơi sơai. Iỡuq ngãq vẽq kaya nĩ pioh sơdor trôh pôgrũ.\" ",
  "25": "Kung yơu nữn, hadơi sì war bõc tlãp, Pitrai mãq chuàt sì đơp, \"Chuàt nĩ la kaya hẽ grưh vơrhơu dơlãp dơrah pôgrũ. Tũq halơi pơnõq adơi sơai mơnhũm chuàt nĩ, iỡuq ngãq vẽq kaya nĩ pioh sơdor pôgrũ.\" ",
  "26": "Kơyua dơgrữq bãc adơi sơai bõc bẽn nĩ sì mơnhũm chơwàt nĩ, nữn adơi sơai akhàt vrơi pathơu kaya mơtai Yàc hũ tãl trôh tũq Pitrai trôh. ",
  "27": "Kơyua yơu nữn, asơi bõc bẽn sì mơnhũm chơwàt Yàc hũ savĩq ôh đang mang nữn tơwãq dlàiq sì rùp gãm sì dơrãh Yàc. ",
  "28": "Dơgrữq tãl aràc mơnuĩh iỡuq iãq pơweh krơi drơi, vloh miẽt tui nữn nữn bõc bẽn sì mơnhũm chơwàt nữn. ",
  "29": "Kơyua mơnuĩh halơi bõc sì mơnhũm nữn ôh iãq pa-chơlah rùp Yàc, nữn la bõc sì mơnhũm kaya chahrơna ga drơi. ",
  "30": "Kơyua kanoh gơtha nữn dơlãp pơnõq adơi sơai hũ lũ mơnuĩh ruãq sơkìq, pơđìq pơđua sì hũ tơkìq mơnuĩh song pìq. ",
  "31": "Nữn mơyah làiq pơnõq drơi thơu  gơrhia krơi rùp drơi, nữn pơnõq drơi ròq ôh kađòc chahrơna. ",
  "32": "Dòq tũq halơi pơnõq drơi kađòc Yàc chahrơna, nữn la pơnõq drơi kađòc ngãq dlàiq, tồq ôh kađòc ngãq gơnĩt dlàiq sigỡuq sì dun kơyua. ",
  "33": "Kơyua yơu nữn, pathơu ga pơnõq adơi sơai hlãq hũ, tũq adơi sơai pơtõm gỡuq wỡq tồq bõc, nữn iỡuq dòq chàc gỡuq. ",
  "34": "Mơyah làiq mơnuĩh halơi lơpa, nữn iỡuq bõc pãq sàc, pioh adơi sơai ôh pơtõm gỡuq tồq ôh kađòc chahrơna. Dòq mưng dơgrữq vruãq tơmo nữn pơnõq adơi sơai song wãq sơrãq pơyua tơnĩa nữn hlãq ròq akhàt tơviãq pơnuãiq pơto pơđar mư tũq hlãq nao trôh. "
}