cor_2020_cua_clt_rom_book/rom/9.json

{
  "1": "Gô đnooy varơuq dik đom Lôôk Wơt Dêh. Gô leh đnooy pa-ôôh - xuum klaak gô dơơp xanưk ka gô đom Lôôk Phool Hiel,",
  "2": "đaneq đôôiq dii gô, e varơuq hlu rơu kôt ji jiq areh leh hlơơp đom xuum gô.",
  "3": "Bơyh gô 'miêh trôôch kajoq kadih gô biq kroay axaap, aklah vlôh klơlh Lôôk Wơt Dêh vii kơq oh ay gô, laa khơl adro takuul takiel ku gô tyauq phoon xak;",
  "4": "kadih oot laa tamooi I-sơ-ra-êl, đơu kaluh varơuq thuôk ku oot laa yal tayh koot văch, tađnah tađnaak, kaluh apok taveek, varơuq kahniq ăm ganuun, varơuq ayuuôt laat, ji kaluh apok taveek;",
  "5": "oot vlôh xing khơl mo kơy, ji Lôôk Wơt Dêh vlôh xing oot - ( nưq laa tyauq phoon xak ) - Kadraq laa Kơy galơh iaq dêq hloay, nưq laa Kơy Plêêk đanq jah vanê ayuuôt dong truh đơơy đơơy. A-meen.",
  "6": "Bơh leh e ka varơuq apok ku Kơy Plêêk heq hlơơp paq ik duh. Vii be aalq dêq hloay khơl leq vlôh xing I-sơ-ra-êl, yôôych nưq laa manih I-sơ-ra-êl.",
  "7": "Kung be aalq dêq hloay koot xaau laa adrơơk ku Aap-ra-haam. Bơh laa, \" Bơyh I-saak, adrơơk ku koot hnoq jah tayh ơnơng.\"",
  "8": "Iq laa, koot xauu tyauq xăk vahaap yôôych leh aalq laa koot ku Kơy Plêêk, đơu koot xauu bơyh apok taveek đơu jah ‘yo laa koot xauu.",
  "9": "Ji 'ngeq laa apok taveek: \"kung muut kawat hngơy neq, Gô hnoq truh, ji Saa-raa hnoq e muuyq koot kanơu.\"",
  "10": "Leh vơơ anưq, đơu atêq tuôôy Rêê-bêê-kaa e boonq bơyh mo kơy I-xăk ku haay - ",
  "11": "đom tuôôy baar koot koq jah pa-iir vlôh, kung koq dơơp varơuq kaxaay long varơuq xơơk leq, xôq ka iq đinq ku Kơy Plêêk tyauq varơuq rơơlh xok ku Kadraq jah dưk kajưk,",
  "12": "Leh aalq xing varơuq dơơp, đơu xing Kơy taayh tawoyh - yôôych mo heq jah ăm xet, đaneq: \"Adro kôt hnoq hơu varơuq adro de.\"",
  "13": "Đaji e vlơk đaneq: \"Gô xung xiaq Ja-kôp, bơh yarơơ Ê-xaau.\" ",
  "14": "Nưq haay hnoq đnooy kajoq neq? Jơq be Kơy Plêêk be hyioh jăk? Leh hmưq 'leq e varơuq nưq.",
  "15": "Vii Kadraq đnooy dii Môôi-se đaneq: \"Gô hnoq dơơp vanoong dii adro leq Gô dơơp vanoong, ji Gô hnoq biit angơuq adro leq Gô biit angơuq.\"",
  "16": "Đanưq be aalq bơyh khơl drơơy trôôch long chrơơk kađnen chrơơk kahơơ đơu jah, bơh xing Kơy Plêêk kahnoq xuum biit angơuq.",
  "17": "Vii Rahlăăp Vah e vlơk truh Pha-ra-ôôn: \" Jơq vii iq đinq neq Gô heq panưk xăk tok, xôq gamưh xăk Gô kahnoq vlôh daa uuh Gô, ji yal Gô hnoq jah padooh taboon loch vari.\"",
  "18": "Lu nưq, Kơy Plêêk dơơp vanoong đôôiq dii adro leq Kadraq trôôch, ji Kadraq dơơp găk xuum akơyq đơu Kadraq trôôch.",
  "19": "Oh ay hnoq vôôch gô: \"Nưq, aleq Kadraq măn rôp Kadrôp? Vii akơyq tachơơl hlê iq Kadraq ik?\"",
  "20": "Bơh, ay hơơq, ay laa kơyq đơu hôôk tơơl blaa hlê Kơy Plêêk? Dơơp aleq kuah jah valiit yuôôr wiih đnooy dii manih heq valiit yuôôr ni: \"Aleq kơy wiih valiit yuôôr gô đanưq\" wơyh?",
  "21": "Jơq be manih dơơp huu vari be e qwuyen tol vari dik, xôq yôôych xing kung muuyq vari valiit yuôôr poop huu xôq dơơp varơuq kôt, ji muuyq poop kadrơơy xôq dơơp ka varơuq tôôy hngơy?",
  "22": "Atoh Kơy Plêêk, Kơy trôôch kahnoq vlôh đơơt tôôq daayh ku Kadraq ji khienq khơl drơơy xet truh qwuyen daa uuh Kadraq, karooh atuq xuum chiuq atuq kaluh poop huu xưnq chiuq đơơt tôq dayh xôq 'miêh ka varơuq kaxêêt hlơơp, yôôych aleq?",
  "23": "Atoh Kadraq dơơp anưq xôq kahnoq vlôh varơuq karooh e ku tađnah tađnaak Kadraq đôôiq dii kaluh huu xưnq biit angơuq đơu Kadraq heq ralauq xôq ka varơuq tađnah tađnaak, yôôych aleq?",
  "24": "Ji atoh Kadraq dơơp anưq ka haay, khơl adro Kadraq kung taayh tawooyh, leh vơơ xing khơl manih Jo-Thaiq, đơu hloay xing khơl tamooi kadrơơy đnoyq, yôôych aleq?",
  "25": "Đaji Kadraq kung xanooh đom rahlăăp Ô-xêê đaneq: \"Adro adrooyq neq leh aalq laa tamooi Gô, Gô hnoq taayh laa tamooi Gô, ji taayh adro be jah xung xiaq laa adro xung xiaq.",
  "26": "Ji măn ka aduq oot jah xanooh đaneq: ' Khơl êêp be aalq laa tamooi Gô, yôôych aduq nưq oot hnoq jah taayh laa ' koot ku Kơy Plêêk hloay riilh.\"'",
  "27": "Măn truh manih I-sơ-ra-el, yôôych Ê-saai heq taayh atok: \"Tabơh kasôôq koot xauu I-sơ-ra-el karôp đaji choah tahlii, yôôych kung vơơ muuyq phoon măn soot hlê hnoq jah wơt,",
  "28": "Vii Lôôk hnoq dơơp jêêk apok ku Kadraq tol vari muuyq trôôk xaleep ji leh manưưn ahnuuy,\"",
  "29": "Đaji Ê-saai heq đnooy adroyq nưq: \"Atoh Lôôk hwaan kuun leh xôq hlê ka haay khơl koot xauu, yôôych haay hnoq dang theng Sô-đôôm, ji jêêk vlôh đaji theng Gôô-mô-rơơ.",
  "30": "Anưq, haay hnoq đnooy kajoq neq? kaluh tamooi kadrơơy, 'miêh leh akhiim axek varơuq hyioh jăk, wiih e jah varơuq hyioh jăk, bơh hyioh jăk gamưh xuum tuuôq.",
  "31": "Măn manih I-sơ-ra-el, laa manih tyauq axek ganuun hyioh jăk, wiih leh jah đak truh varơuq hyioh jăk gamưh ganuun.",
  "32": "Vii aleq nưq? Vii oot leh akhiim axek varơuq hyioh jăk bơơn xuum tuuôq, bơh bơơn varơuq dơơp. Oot heq xatôôl xalôônq kuk phơu dơơp ăm talaalh gưưlh,",
  "33": "đaji e vlơk đaneq: \"Nee. gô xôq aduq Si-ôôn muuyq kuk phơu dơơp xatôôl jôôk, ji talaat phơu khienq xatôôl lôôp. Adro leq tuuôq kuk phơu nưq hnoq leh biq kamưưl.\" "
}