cor_2020_cua_clt_rom_book/rom/11.json

{
  "1": "Anưq ăm gô vôôch: Dang aleq Kơy Plêêk heq ka'lăăk vlôh tamooi Kadraq? Varơuq nưq leh xlih vlôh ik. Vii kadih gô kung laa muuyq dro I-sơ-ra-êl, xing adơơk Aap-ra-haam, thuôk adrơơk tamooi Bêên-ja-min.",
  "2": "Kơy Plêêk heq leh ka'lăk tamooi Kadraq, laa tamooi Kadraq heq xet adroyq. Long oh ay leh xet Rahlăăp Vah đnooy kajoq truh Ê-lii, tuôôy kơy apôôy dii Kơy Plêêk tachơơl hlê tamooi I-sơ-ra-êl?",
  "3": "“Kuh Lôôk, oot heq păk kaxêêt khơl hnhư hlit Kadraq, oot heq pahrưp ka'lăk paraa hơu Kadraq, kung vơơ muuyq dro koot măn jah riilh, ji oot kung đong hooy axek păk kaxêêt koot.”\n\n\\ts\\*",
  "4": "Bơh Kơy Plêêk heq tơơl apok xanoh kung kơy laa kajoq? “Gô heq xôq jeng ka Gô pơơh ravơu khơl kanơu, laa khơl manih heq be kuul takuul kangưưr Ba-aanh.”",
  "5": "Dang anưq, hngơy neen kung măn muuyq phoon sook hlê jah rơơlh xok bơyh vanoong kaxaay.\n\n\\ts\\*",
  "6": "Bơh atoh 'ngưq laa bơyh vanoong kaxaay, yôôych be aalq bơyh varơuq dơơp đnoyq. Atoh leh, vanoong kaxaay hnoq paq măn laa vanoong kaxaay. \\f +\\ft Muuyq sôôq rahlăăp hnu athêêp: \\fqa Bơh atoh 'ngưq laa bơyh varơuq dơơp, yôôych paq măn laa vanoong kaxaay đnoyq; atoh leh, varơuq dơơp paq măn laa varơuq dơơp \\fqa*. \\f*",
  "7": "Nưq laa đaleq? Varơuq đơu manih I-sơ-ra-el axek akhiim yôôych oot leh jah ik, bơh khơl manih jah rơơlh yôôych jah ik, đom tuôôy kasôôq măn hlê wih laay găk xuum.",
  "8": "Jơq đaji apok heq vlơk, đaneq: “Kơy Plêêk heq kahniq ka oot xuum phool kamưưng jaluk, mot be hloq, tôôr be tameen, ăm truh hngơy neen.”\n\n\\ts\\*",
  "9": "Măn Đa-vik yôôych đnooy: \\q  “Apôôy paraa waal ku oot yuuôl jêêk lươyq, rayaalh, \\q jêêk kuk phơu xatôôl jôôk, ji varơuq hmoot dook jeen ka oot.\n\\q",
  "10": "Apôôy mot oot bi apuul jaluk xôq be hloq, \n\\q\nji karok oot kưq biq kadôônq hloay.”\n\n\\ts\\*\n\\p",
  "11": "Nưq, ăm gô vôôch: “E jơq oot xatôôl jôôk xôq yôôych talaalh gưưlh be?” Leh hmưq 'leq e varơuq nưq. Tađôôi vii anưq, bơyh varơuq lôôp kadrôp ku oot, varơuq wơt xok heq truh dii tamooi kadrơơy, xôq ahluuk ka oot \ntagliêh yarơơ.",
  "12": "Atoh varơuq lôôp kadrôp ku oot dơơp karoh ka dêh araak, ji atoh varơuq tayuuh dêq ku oot dơơp karoh ka tamooi kadrơơy, yôôych varơuq oot jah xok amuut đuu kasôôq hnoq toolh kaxaay iaq xet dong leq đnoyq?\n\n\\ts\\*",
  "13": "Juneq, gô xung đnooy dii oh ay laa tamooi kadrơơy. Gô hlaah xuum truh varơuq dơơp gô tuôôy jah dơơp khơl jah rơơlh ka tamooi kadrơơy.",
  "14": "Leh kheoq gô hnoq khienq tamooi gô tagliêh yarơơ. Leh kheoq gô hnoq wơt jah toq leq dro đom khơl oot.\n\n\\ts\\*",
  "15": "Vii atoh varơuq oot biq ka'lăk vlôh khienq dêh araak jah taguu hlê, yôôych varơuq oot jah 'yo nhonq hnoq đaleq atoh leh aalq laa varơuq riilh hlê xing aduq kaxêêt?",
  "16": "Atoh raak plaay adroyq dik laa hlăng vah, yôôych dêq đônq bôôt kung anưq. Atoh rayah laa hlăng vah, yôôych kaluh đook kung anưq.\n\n\\ts\\*",
  "17": "Bơh atoh muuyq kasôôq đook biq gôh hlơơp, atoh oh ay, laa đook ô-liiu gôk, jah tabôôk muut aduq nưq, ji atoh oh ay jah kung jah nhonq jool riilh đom rayah ku ưưk ô-liiu,",
  "18": "yôôych oh ay tee akwoe liq haay glơơh iaq kaluh đook nưq. Măn atoh oh ay akwoe yôôych dayh biit đaneq leh aalq oh ay vach rayah ưưk, đơu laa rayah ưưk vach oh ay.\n\n\\ts\\*",
  "19": "Oh ay wiih đnooy: “Kaluh đook nưq heq biq gôh ka'lăk, xôq gô jah tabôôk muut.”",
  "20": "Jơq anưq! Oot biq gôh ka'lăk vii xuum be tuuôq, măn oh ay yôôych dưk kajưk gamưh xuum tuuôq. Tee biit haay laa glơh dêq, đơu pheq xet yôq.",
  "21": "Vii atoh Kơy Plêêk heq be alaay kaluh đook e 'miêh hơq, Kadraq kung hnoq leh alaay oh ay 'leq.\n\n\\ts\\*",
  "22": "Kưq 'yo muut varơuq dơơp manưưh angơuq aluq varơuq ngiêêm khăk ku Kơy Plêêk: ngiêêm khăk dii adro gưưlh talaalh, bơh manưưh angơuq dii oh ay, atoh oh ay kưq măn đom varơuq manưưh angơuq Kadraq. Atoh leh, oh ay kung hnoq biq goch ka'lăk.\n\n\\ts\\*",
  "23": "Măn phoon oot, atoh oot leh ratuut miek đom varơuq leh tuuôq, kung hnoq jah tabôôk muut hlê. Vii Kơy Plêêk hnoq ik tabôôk oot hlê.",
  "24": "Atoh oh ay heq biq koh xing ưưk đơu ku adreek laa ưưk ô-liiu gôk, ji jah tabôôk muut ưưk ô-liiu toolh muuyq trôôk đêh hlê dii e kadih, yôôych khơl adro 'miêh laa kaluh đook e kadik hơq wiih kơn duh jah tabôôk wiit hlê muut ưưk ô-liiu ku oot xet dong leq?\n\n\\ts\\*\n\\p",
  "25": "Wơơy oh ay, gô be trôôch oh ay leh xet truh varơuq hwuyên nhiêêm neq, xôq oh ay leh huq khôôt kheoq tyauq trôôk xuum biit đêh ku haay. Varơuq mââu nhiêêm 'ngưq laa muuyq phoon manih I-sơ-ra-el heq khăk xuum, dong truh tuôôy kasôôq tamooi kadrơơy nhôôp muut đuu dêq.\n\n\\ts\\*",
  "26": "Đanưq, dêq I-sơ-ra-el hnoq jah wơt, đaji e vlơk đaneq: \\q  “Plêêk wơt xok hnoq truh xing Si-ôôn; \n\\q \nKadraq hnoq ka'lăk vlôh varơuq leh tuuôq klơlh Ja-kôôp.\n\\q",
  "27": "Ji 'ngeq hnoq laa taveek ku Gô dii oot, \n\\q \ntuôôy Gô hnoq tawaay ka'lăk dêq kadrôp maroh ku oot.”\n\n\\ts\\*\n\\m\n\n",
  "28": "Ta jinq truh hêêl kaxaay, yôôych oot laa adro tachơơl vii kơq oh ay. Bơh truh varơuq rơơlh xok ku Kơy Plêêk, yôôych oot jah xung xiaq vii kơq khơl mo kơy oot.",
  "29": "Vii kaluh varơuq kahniq ăm ji taayh tawoyh ku Kơy Plêêk leh ik tađôôi.\n\n\\ts\\*",
  "30": "Vii đaji adroyq hơq oh ay heq leh tameen Kơy Plêêk, đơu juneq wiih jah biit angơuq bơyh varơuq leh tameen ku oot,",
  "31": "yôôych, khơl manih Jo-Thaiq neq juneq kung leh tameen. Ruut hlê laa juneq oot kung hnoq ik jah biit angơuq gamưh varơuq biit angơuq heq kahnoq vlôh ka oh ay.",
  "32": "Vii Kơy Plêêk heq karuk tôôy dro đom varơuq leh tameen, xôq Kadraq hnoq ik kahnoq xuum biit angơuq dêq hloay.\n\n\\ts\\*\n\\p",
  "33": "Dik, varơuq khôôt kheoq ji hlolh xet ku Kơy Plêêk jaruq ranưh, karoh e xet dong leq! Varơuq xưh xadrah ku Kadraq leh akơyq hloq ik, trôôk daak Kadraq leh akơyq xet ik!\n\\q",
  "34": "“Vii kơyq hmưq xet xuum biit ku Lôôk? \n\\q\nLong kơyq heq tajauq athêêk ka Kadraq?\n\n\\ts\\*\n\\q",
  "35": "Long kơyq heq tơk tưp kajoq ka Kơy Plêêk adrooyq, \\q\nxôq jah Kadraq blaa ăm hlê?”\n\\p",
  "36": "Vii dêq hloay raay laa xing Kadraq, bơyh Kadraq, ji awiih xuq kơn Kadraq. Apôôy Kadraq jah tađnah tađnaak đơơy đơơy. A-meen.\n\n\\ts\\*"
}