cor_2020_cua_clt_rom_book/rom/9.json

{
  "1": "Gô đnooy varơuq dik đom Lôôk Wơt Dêh. Gô leh đnooy pa-ôôh - xuum klaak gô dơơp xanưk ka gô đom Lôôk Phool Hiel,",
  "2": "đaneq đôôiq dii gô, e varơuq hlu rơu kôt ji jiq areh leh hlơơp đom xuum gô.",
  "3": "Bơyh gô 'miêh trôôch kajoq kadih gô biq kroay axaap, aklah vlôh klơlh Lôôk Wơt Dêh vii kơq oh ay gô, laa khơl adro takuul takiel ku gô tyauq phoon xak;",
  "4": "kadih oot laa tamooi I-sơ-ra-êl, đơu kaluh varơuq thuôk ku oot laa yal tayh koot văch, tađnah tađnaak, kaluh apok taveek, varơuq kahniq ăm ganuun, varơuq ayuuôt laat, ji kaluh apok taveek;",
  "5": "oot vlôh xing khơl mo kơy, ji Lôôk Wơt Dêh vlôh xing oot - ( nưq laa tyauq phoon xak ) - Kadraq laa Kơy galơh iaq dêq hloay, nưq laa Kơy Plêêk đanq jah vanê ayuuôt dong truh đơơy đơơy. A-meen.",
  "6": "Bơh leh e ka varơuq apok ku Kơy Plêêk heq hlơơp paq ik duh. Vii be aalq dêq hloay khơl leq vlôh xing I-sơ-ra-êl, yôôych nưq laa manih I-sơ-ra-êl.",
  "7": "Kung be aalq dêq hloay koot xaau laa adrơơk ku Aap-ra-haam. Bơh laa, \" Bơyh I-saak, adrơơk ku koot hnoq jah tayh ơnơng.\"",
  "8": "Iq laa koot xaau tyauq xăk xamơk, khơl adro nưq leh aalq laa khơl koot ku Kơy Plêêk. Wih hlê, koot xaau ku apok taveek yôôych jah 'yo đaji koot xaau.",
  "9": "Vii neq laa apok taveek:\" Muut kawat neq, Gô hnoq truh, ji hnoq e muuyq koot kanơu jeen ka Sa-ra.\"",
  "10": "Bơh leh vơơ đanưq, đơu Rê-bê-ka kung anưq tuôôy e bonq xing muuyq dro, laa I-saak, mo kơy ku haay - ",
  "11": "vii đom tuôôy koot koq jah pa iir vlôh, kung koq dơơp varơuq kaxaay long varơuq xơk leq, xôq ka iq đinq ku Kơy Plêêk tyauq varơuq rơơlh xok ku Kadraq hnoq ik jưư kajưk,",
  "12": "Leh aalq xing varơuq dơơp, bơh laa xing Kơy tayh tawoyh - varơuq heq jah ăm mo jah xet, nưq laa:\" Dro kôt hnoq dơơp xapok ka dro de,\"",
  "13": "Dang đaji varơuq heq jah vlơk: \" Gô xiaq Ja-kôôp, bơh Gô 'yarơ Ê-Saau.\"",
  "14": "Anưq, haay hnoq đnooy luleq? Dang aleq e varơuq be hyioh jăk aduq Kơy Plêêk ih? Varơuq nưq leh xlih vlôh ik.",
  "15": "Vii Kadraq xanoh dii Môôi-se đaneq: \"Gô hnoq kahnoq xuum biit angơuq dii paq kê kơyq đơu Gô trôôch kahnoq xuum biit angơuq, ji Gô hnoq biit angơuq paq kê kơyq đơu Gô xung biit angơuq.\" ",
  "16": "Lunưq be aalq xing adro leq ưnq trôôch, kung leh aalq kơq dro leq chrơơk đneen chrơơk kahơ, bơh laa jo xing Kơy Plêêk, Kơy kahnoq xuum biit angơuq.",
  "17": "Vii Rahlăăp Vah đnooy truh Pha-ra-ôôn đaneq:\" Vii jơq iq đinq neq Gô heq panưk xăk tok, xôq ahlê xăk Gô hnoq ik ăm hloq daa uuh ku Gô, ji xôq dơơp aleq ka yal Gô hnoq ik padooh pahêêl loch tol vari.\"",
  "18": "Lunưq, Kadraq kahnoq xuum biit angơuq đôôiq dii dro leq Kadraq trôôch, bơh Kadraq dơơp găk xuum dro leq Kadraq trôôch.",
  "19": "Anưq yôôych oh ay hnoq đnooy gô:\" Anưq, aleq Kadraq măn rôôp kadrôp? Vii kơyq tachơơl hlê iq ku Kadraq ik?\"",
  "20": "Nee dro hơq, bơh dong dik yôôych ay laa kơyq đơu hôôk tơơl tagêh hlê Kơy Plêêk? Dang aleq kua jah dơơp vlôh hnoq đnooy dii dro heq dơơp vlôh ni:\" Aleq kơy heq dơơp vlôh gô tyauq luneq\" ih?",
  "21": "Long laa manih thơq hu vari be e qwuyen tol vari dik, xôq dơơp vlôh muuyq vlong đôô xing kung muuyq đôônq vari, tabơh ưnq neq jeen ka varơuq kôt lơyq, bơh ưnq hơq jeen ka varơuq leh kôt lơyq?",
  "22": "Măn atoh Kơy Plêêk, vii trôôch ăm hloq đơơt tôq dayh ku Kadraq ji kahnoq vlôh taay yaak ku Kadraq, heq chiuq atuq đom varơuq atuq xuum thier raa kôt đôôiq dii kaluh vlong đôô jeen ka đơơt tôq dayh, heq jah xôq 'miêh ka varơuq kaxêêt hlơơp;",
  "23": "ji xôq Kadraq hnoq ik kahnoq vlôh varơuq kroh e ku tađnah tađnaak Kadraq tol kaluh vlong đôô jeen ka varơuq biit angơuq đơu Kadraq heq xôq 'miêh ka varơuq tađnah tađnaak - ",
  "24": "Ji atoh Kadraq dơơp anưq ka haay, khơl adro Kadraq kung taayh tawooyh, leh vơơ xing khơl manih Jo-Thaiq, đơu hloay xing khơl tamooi kadrơơy đnoyq, yôôych aleq?",
  "25": "Đaji Kadraq kung xanooh đom rahlăăp Ô-xêê đaneq: \"Adro adrooyq neq leh aalq laa tamooi Gô, Gô hnoq taayh laa tamooi Gô, ji taayh adro be jah xung xiaq laa adro xung xiaq.",
  "26": "Ji măn ka aduq oot jah xanooh đaneq: ' Khơl êêp be aalq laa tamooi Gô, yôôych aduq nưq oot hnoq jah taayh laa ' koot ku Kơy Plêêk hloay riilh.\"'",
  "27": "Măn truh manih I-sơ-ra-el, yôôych Ê-saai heq taayh atok: \"Tabơh kasôôq koot xauu I-sơ-ra-el karôp đaji choah tahlii, yôôych kung vơơ muuyq phoon măn soot hlê hnoq jah wơt,",
  "28": "Vii Lôôk hnoq dơơp jêêk apok ku Kadraq tol vari muuyq trôôk xaleep ji leh manưưn ahnuuy,\"",
  "29": "Đaji Ê-saai heq đnooy adroyq nưq: \"Atoh Lôôk hwaan kuun leh xôq hlê ka haay khơl koot xauu, yôôych haay hnoq dang theng Sô-đôôm, ji jêêk vlôh đaji theng Gôô-mô-rơơ.",
  "30": "Anưq, haay hnoq đnooy kajoq neq? kaluh tamooi kadrơơy, 'miêh leh akhiim axek varơuq hyioh jăk, wiih e jah varơuq hyioh jăk, bơh hyioh jăk gamưh xuum tuuôq.",
  "31": "Măn manih I-sơ-ra-el, laa manih tyauq axek ganuun hyioh jăk, wiih leh jah đak truh varơuq hyioh jăk gamưh ganuun.",
  "32": "Vii aleq nưq? Vii oot leh akhiim axek varơuq hyioh jăk bơơn xuum tuuôq, bơh bơơn varơuq dơơp. Oot heq xatôôl xalôônq kuk phơu dơơp ăm talaalh gưưlh,",
  "33": "đaji e vlơk đaneq: \"Nee. gô xôq aduq Si-ôôn muuyq kuk phơu dơơp xatôôl jôôk, ji talaat phơu khienq xatôôl lôôp. Adro leq tuuôq kuk phơu nưq hnoq leh biq kamưưl.\" "
}