cor_2020_cua_clt_rom_book/rom/8.json

{
  "1": "Lunưq, juneq be e xadrah dook leq dêq ka khơl dro măn đom Lôôk Wơt Dêh Jê-xu.",
  "2": "Vii ganuun Kơy Phool Hiel ku varơuq riilh đom Lôôk Wơt Dêh Jê-xu heq wơt xaloch gô klơlh ganuun ku kadrôp maroh ji varơuq kaxêêt.",
  "3": "Bơh đôôiq dii varơuq be dơơp ik ku ganuun, nưq laa đom varơuq ni 'miêh dơơp ravoch kơq xăk xamơk, yôôych Kơy Plêêk, atêq katuôôy patăk kadih Koot Kadraq truh đom ka varơuq dang đaji xăk xamơk kadrôp maroh ji vii kơq kadrôp maroh, Kadraq heq rôôp xadrah kadrôp maroh đom xăk xamơk,",
  "4": "xôq kaluh varơuq hyioh jăk ku ganuun jah dơơp xaleep đom haay, laa khơl adro leh tawaak hooy tyauq xăk xamơk bơh tyauq Kơy Phool Hiel.",
  "5": "Vii khơl adro riilh tyauq xăk xamơk yôôych tabôông muut kaluh varơuq ku xăk xamơk, măn khơl adro tyauq Kơy Phool Hiel yôôych tabôông muut kaluh varơuq ku Kơy Phool Hiel",
  "6": "Bơyh xuum biit ku xăk xamơk laa varơuq kaxêêt, măn xuum biit ku Kơy Phool Hiel laa varơuq riilh ji hrok hrol;",
  "7": "nưq laa vii xuum biit ku xăk xamơk yôôych tachơơl hlê dii Kơy Plêêk, bơyh ni leh chiuq kuul 'lăălq ganuun ku Kơy Plêêk, kơq ni leh e praat xôq dơơp anưq.",
  "8": "Măn khơl adro riilh tyauq xăk xamơk yôôych be hnoq ik dơơp hlah xuum Kơy Plêêk.",
  "9": "Lunưq, oh ay leh măn đom xăk xamơk, đơu laa đom Kơy Phool Hiel, atoh Kơy Phool Hiel ku Kơy Plêêk dong dik măn đom oh ay. Măn atoh kơyq leh e Kơy Phool Hiel ku Lôôk Wơt Dêh, yôôych adro nưq leh aalq manih ku Kadraq.",
  "10": "Atoh Lôôk Wơt Dêh măn đom oh ay, yôôych xăk xơmơơk kaxêêt đôôiq dii kadrôp maroh, bơh phool hiel wiih riilh đôôiq dii varơuq hyioh jăk.",
  "11": "Atoh Kơy Phool Hiel ku Kơy heq khienq Lôôk Jê-xu riilh hlê xing aduq kaxêêt riilh đom oh ay, yôôych Kơy heq khienq Lôôk Wơt Dêh Jê-xu riilh hlê xing aduq kaxêêt kung hnoq gamưh Kơy Phool Hiel Kadraq riilh đom oh ay đơu kahniq kadrôôk riilh ka xăk xơmơơk hnoq kaxêêt ku oh ay.",
  "12": "Nưq, 'wơơy oh ay, haay paq pơq lôôk xăk xơmơơk xôq phayh riilh tyauq xăk xơmơơk.",
  "13": "Vii atoh oh ay riilh tyauq xăk xơmơơk, oh ay hnoq kaxêêt, măn atoh oh ay gamưh Kơy Phool Hiel dơơp kaxêêt kaluh varơuq ku xăk xơmơơk yôôych oh ay hnoq riilh.",
  "14": "Tôôy dro jah Kơy Phool Hiel ku Kơy Plêêk pato jarooy raay laa koot ku Kơy Plêêk.",
  "15": "Vii oh ay leh nhonq jah phool hiel xapok ramaa xăk xôq wih pheq yôq vraar. Tađôôi muut đnư, oh ay heq nhonq jah Kơy Phool Hiel ku manih jah dơơp koot văch, gamưh đnư haay tayh: \"A baa, Vaq!\"",
  "16": "'Ngưq laa Kơy Phool Hiel dơơp xanưk ka phool hiel haay đaneq haay laa koot xaau Kơy Plêêk.",
  "17": "Atoh haay laa koot xauu, yôôych haay kung laa manih dưk katôôl, manih dưk katôôl Kơy Plêêk. Haay laa manih kung dưk katôôl dii Lôôk Wơt Dêh, atoh haay dong dik chiuq pơơl dii Kadraq, xôq kung jah tađnah tađnaak dii Kadraq.",
  "18": "Vii gô biit đaneq kaluh jiq jiêh đom đơơy neq be đanq tađoo dii tađnah tađnaak hnoq jah kahnoq vlôh ka haay,",
  "19": "Prooh araak <strong> măn pa uuk xuum </strong> takôô koot xauu Kơy Plêêk jah kahnoq vlôh.",
  "20": "Vii <strong>prooh araak</strong> heq pheq chiuq tameen tyauq varơuq hưư hlơơp, be aalq vii kadih xuum oot trôôch, bơh bơyh Kơy băch oot pheq tameen tyauq, dii takôô gamưh kajưk dik",
  "21": "đaneq<strong>oot</strong> hnoq \njah wơt klơlh xăk dơơp xapok ka varơuq hưư hlơơp, ji jah nhonq varơuq <strong>rayơơh rayơơy</strong> đom tađnah tađnaak ku koot xauu Kơy Plêêk.",
  "22": "Vii haay xet đaneq <strong>dêq hloay prooh araak</strong> raay tanguh aloo ji gleh glơơl đom jiq jiêh truh hloay hngơy neeng.",
  "23": "Leh Vơơ anưq, <strong>đơu hloay haay,</strong> adro e raak plaay adroyq dik ku Kơy Phool Hiel - pheq đnooy kadih haay kung tanguh alo đom xăk, đong tuôôy takôô jah dơơp koot văch, 'ngưq laa varơuq wơt blaa xăk xamơơk haay. ",
  "24": "Vii haay jah wơt đom xuum takôô gamưh kajưk neq. Takôô gamưh đơu hloq ik yôôych be aalq laa takôô gamưh. Vii akơq wiih hooy takôô gamưh varơuq oot heq hloq?",
  "25": "Bơh atoh haay takôô gamưh kajưk dik truh varơuq haay koq lưưp hloq, ‘ngưq laa haay atuq xuum takôô varơuq nưq.",
  "26": "Dang đanưq, Kơy Phool Hiel kung wăk đom varơuq leh kaalh ku haay, vii haay leh xet pheq apôôy đaleq, bơh kadih Kơy Phool Hiel xok apok aloo ook be ik đnooy vlôh xarooy xôq apôôy thaay ka haay.",
  "27": "Kơy ‘yo hloq xuum manih hlolh xuum biit ku Kơy Phoo Hiel, vii Kadraq apôôy thaay ka khơl tuuôq kadraq tyauq iq trôôch ku Kơy Plêêk.",
  "28": "Haay xet đaneq Kơy Plêêk anguuk hlê tôôy varơuq dii mamuuyq vii e iit ku adro xung xiaq Kadraq, ‘ngưq laa ăm khơl adro jah taayh tyauq iq trôôk ku Kadraq.",
  "29": "Vii adro Kadraq heq xet adroyq, yôôych Kadraq kung heq đinq ăm oot vlôh jêêk dang đaji long lơuq ku Koot Kadraq, xôq Koot nưq vlôh jêêk Koot ay katuul ‘ngưưng oh ay.",
  "30": "Ji adro Kadraq heq đinq ‘miêh, yôôych Kadraq kung heq taayh. Adro Kadraq heq taayh, yôôych Kadraq kung heq xưưng laa hyioh jăk. Ji adro Kadraq heq xưưng laa hyioh jăk, yôôych Kadraq kung heq dơơp ăm tađnah tađnaak.",
  "31": "Nưq, haay hnoq đnooy đa leq truh kaluh varơuq neq? Atoh Kơy Plêêk wăk tajup haay, yôôych măn akơyq tachơơl hlê haay?",
  "32": "Kơy leh alaay kadih Koot Kadraq, bơh heq vii dêq hloay haay đơu kahniq Koot nưq, wiih be kahniq dêq kaluh kajoq kung dii Koot nưq ka haay ih?",
  "33": "Akơyq hnoq rôp kadrôp khơl jah rơơlh ku Kơy Plêêk? Kơy Plêêk laa Kơy xưưng hyioh jăk.",
  "34": "Akơyq laa adro hnoq rôp xadrah? Lôôk Wơt Dêh Jê-xu, Kơy heq kaxêêt - ji iaq nưq đnoyq, heq riilh hlê, juneq kung đong 'ngôôy pi tii akoh Kơy Plêêk, apôôy thaay ka haay.",
  "35": "Akơy hnoq aklah vlôh haay klơlh xung xiaq ku Lôôk Wơt Dêh? E jơq be jiq jiêh, parêq parơh, rôôp toop, pa ngoot thaal, lalôk, ramêq ahyôôt, long xiah jaoq?",
  "36": "Đaji e apok vlơk: Vii kơq Kadraq đơu tôôy hngơy 'wot koot biq păk kaxêêt. 'Wot koot biq 'yo đaji trưưu jarooy hooy dơơp ôôq.\"",
  "37": "Ngươk hlê, đom tôôy varơuq xalih vlôh, haay rah paraat jaah jaay gamưh Plêêk xiaq haay.",
  "38": "Vii gô tuuôq kajưk đaneq long atoh laa varơuq kaxêêt, varơuq riilh, Yaak Plêêk, padrok dêh, kaluh varơuq juneq, kaluh varơuq hnoq truh, qwuyen da uuh,",
  "39": "bê jơơt, bê jaruq, long paq kêê kaluh proh araak leq kadrơơy, kung leh ik aklah vlôh haay klơlh xung xiaq ku Kơy Plêêk, 'miêh măn đom Lôôk Wơt Dêh Jê-xu, Lôôk haay."
}