cor_2020_cua_clt_rom_book/rom/1.json

{
  "1": "Phao-lôô, xapok ku Lôôk Wơt Dêh Jê-xu, jah taayh tajuup dơơp khơl jah rơơlh, ji jah rơơlh đêh vii pahêêl kaxaay ku Kơy Plêêk",
  "2": "'Ngeq laa pahêêl kaxaay đơu Kadraq heq taveek xing adroyq gơmưh khơl kơy hlit ku Kadraq đom rahlaap Kơy Plêêk",
  "3": "truh Koot Kadraq, kadraq vlôh xing adrơơk ku Đa-vik 'ngưq đnooy truh xak xamơk.",
  "4": "Gamưh Yaak phool hlăng vah, bơơyh varơuq riilh hlê xing aduq kaxêêt, Kadraq jah đnooy laa Koot Kơy Plêêk muuyq trôôk viik qwuyen da-uuh, ‘ngưq laa Lôôk Wơt Dêh Jê-xu, Lôôk ku haay.",
  "5": "Gơmưh Kadraq, 'wot heq nhonq xok<strong>vanoong kaxaay </strong> ji dơơp varơuq khơl jah rơơlh, xôq padooh taboon varơuq tameen tyauq bơơyh xuum tuuôq vlôh ka dêq hloay kaluh tamooi, vii kơq yal Kadraq.",
  "6": "Katuul khơl tamooi neq, oh ay kung heq jah tayh xôq jii ku Lôôk Wơt Dêh Jê-xu.",
  "7": "Hla jơyq neq atăq truh dêq hloay oh ay kaduq Rô-maa, khơl manih xung xiaq ku Kơy Plêêk, jah tayh dơơp tamooi hlăng vah. Apôôy oh ay jah <strong>vanoong kaxaay</strong> ji varơuq hrook hrool xing Kơy Plêêk, Vaq haay, ji Lôôk Wơt Dêh Jê-xu.",
  "8": "Adroyq dik, bơơyh Lôôk Wơt Dêh Jê-xu, gô kuh   kwaay Kơy Plêêk gô truh dêq hloay oh ay. vii xuum tuuôq ku oh ay jah đnooy avlôh looch dêq dih dêh.",
  "9": "Vii Kơy Plêêk, laa Plêêk gô xok xuum klaak hơu varơuq gamưh varơuq kông bôq pahêêl kaxaay ku Koot Kadraq, dơơp xanưk đaneq gô hloay nhăk truh oh ay.",
  "10": "Đom apok apôôy gô hloay apôôy vôôch Kadraq, tyauq iq xuum Kadraq, atoh hnoq ik tuôôy leq nưq ăm gô jah truh ahlơq oh ay.",
  "11": "Vii gô aau ươk jah tavơh oh ay, xôq padooh taboon dii oh ay axiit 'ngưưng <strong>yaak âân,</strong> xôq wăăk oh ay dưk kaalh paraat.",
  "12": "'ngưq laa gô trôôch jah ahluuk wăk mamuuyq đom khơl oh ay, tyauq xuum tuuôq ku mamuuyq, 'ngưq jii ku oh ay ji hloay ku gô.",
  "13": "Wơơy oh ay, gô leh trôôch oh ay be xet kajoq truh iq đinq adroyq neq ku gô laa truh ahlơq oh ay ( bơh truh tuôôy juneq gô kung măn tavơh pơơl hwơơl), xôq goch plaay đom khơl oh ay, kung đaji đom khơl tamooi gôk kadrơy.",
  "14": "Gô pơq lôôk dêq manih Hy-laap aluq khơl tamooi leh aalq laa Hy-laap, dêq manih <strong>khôôt xet </strong>aluq adro vlôô khưưlq.",
  "15": "Vii anưq, măn phoon gô, gô hloay e xuum đnooy avlôh pahêêl kaxaay ka oh ay kaduq Rôô-maa.",
  "16": "Vii gô leh kamưưl truh pahêêl kaxaay, bơơyh 'ngưq jii qwuyen pheep ku Kơy Plêêk xôq wơơt tôôy adro tuuôq, adroyq jii manih Jo-Thaiq, yôôych truh manih Hy-laap.",
  "17": "Gamưh đom pahêêl kaxaay nưq e kahnoq vlôh varơuq hyioh jăk ku Kơy Plêêk, xing xuum tuuôq truh xuum tuuôq, đaji e vlơk:\" Dik, manih hyioh jăk hnoq riilh gamưh xuum tuuôq.\"  ",
  "18": "Vii kơn tôq jaraq ku Kơy Plêêk xing plêêk jah kahnoq vlôh tachơơl hlê dii kaluh varơuq <strong>vôô đaaoq</strong> ji leh hyioh jăk ku khơl drơơy, khơl adro xok varơuq leh hyioh jăk ahnaan joa hyioh jăk.",
  "19": "'Ngưq laa vii varơuq kajoq xet truh Kơy Plêêk yôôych heq trơơ trơơ vlôh kangưưr oot, vii Kơy Plêêk heq a'nhee tađnaah oot.",
  "20": "Vii kaluh varơuq <strong> e 'miêh đom xuum </strong> leh hloq ik ku Kadraq, 'ngưq laa qwuyen da uuh hloay hloay ji yaak xuum Kadraq, yôôych xing tuôôy panưk jêêk dih dêh heq roh rang, hlolh ik gamưh kaluh vâk heq jah panưk jêêk, đanưq oot leh e kơq xôq kadook.",
  "21": "'Ngưq laa vii long oot xet truh Kơy Plêêk, bơh oot leh ayuuôt laat Kadraq laa Kơy Plêêk, kung leh kuh kwaay Kadraq. Tađôôi muut đnư, oot wiih vlôh jêêk  vlôô khưưlq đom xuum biit oot, măn xuum adruuy ta'ngok ku oot yuuôl vlôh kamưưng jaluuk.",
  "22": "Oot ăm kadih oot laa khôôt xet, bơh wiih vlôh jêêk vlôô khưưlq.",
  "23": "Oot tađôôi tađnaah tađnaak ku Kơy Plêêk leh hmưq hưư hlơơp yuuôl vangưưr ku koot manih dayh hưư hlơơp, kung đaji ku xêêp muung, ôq gôk, ji kaluh voolh kajêêp. ",
  "24": "Vii anưq, Kơy Plêêk ka'lăk oot ka kaluh xuum trôôch a'moh nhơơy ku xuum oot, xôq xak xamơk oot biq nhuk nhơơy đom khơl kadih biing oot.",
  "25": "Kadih oot laa khơl adro tađôôi hyioh jăk ku Kơy Plêêk yuuôl varơuq pa-ôôh lar, kuh kwaay ji hơu varơuq kaluh vâk thaay vii Kơy Plêêk panưk Jêêk, laa Plêêk jah ayuuôt vnê hloay hloay. E-meen.",
  "26": "Jơq vii nưq, Kơy Plêêk heq pa'yaang ka'lăk oot ka kaluh xuum trôôch adrah dik, ji pheq đnooy khơl drê măn tađôôi varơuq xa vik katơq e 'miêh yuuôl varơuq xa vik katơq tachơơl dii e 'miêh.",
  "27": "Ji kung đanưq, khơl kanơu ka'lăk xa vik katơq e 'miêh dii khơl drê ji ahluk vuh xuum trôôch dii mamuuyq. Oot laa khơl kanơu dơơp varơuq katơq bơơyq dii khơl kanơu, ji kadih chiuq nhonq xok hmoot dook taxưưnq dii varơuq dơơp bơơyq baa ku ni.",
  "28": "Vii oot leh chiuq nhonq xet Kơy Plêêk, đanưq Kơy Plêêk pa'yaang ka'lăk oot ăm xuum biit hưư hlơơp, xôq oot dơơp kaluh varơuq be aar kajoq.",
  "29": "Oot charook xôq hlooh kaluh varơuq leh hyioh jăk, xơơk tauuq, xuum hmưưt, tôq jaraq. Oot glơơh glaay varơuq gliêh yarơơ, păk kaxêêk manih, taqwoa takai, pa-ôôh lar ji xơuq xuum. Oot 'ngưưng 'ngôôy xarook tameen athêêk bơơyq,",
  "30": "<strong> trôôch pa'hnhiq, taglieh yarơơ Kơy Plêêk, xơơk lar, laa ook,</strong> akwoe, jooy dơơp xơơk, ji leh tameen tyauq miq vaq.",
  "31": "Oot axiit xahok, leh jưư apok taveek, leh tabôông, leh xet biit angơuq. ",
  "32": "Atoh oot hlolh ganuun hyioh jăk ku Kơy Plêêk heq đnooy adro dơơp kadrôp kaluh varơuq đanưq laa xưnq kaxêêt, bơh oot leh vơơ dơơp kadrôp kaluh varơuq nưq, đơu măn ahluuk athêêp ka adro kadrơy raay dơơp.",
  "None": "<strong>Thơ ku Phao-lô</strong><strong>Atăq ka manih</strong><strong> Rô-maa</strong>"
}