cor_2020_cua_clt_rom_book/rom/1.json

{
  "1": "Phao-lôô, xapok ku Lôôk Wơt Dêh Jê-xu, muuyq khơl jah rơơlh jah tayh tawoyh, jah rơơlh đêh ka Hêêl Kaxaay ku Kơy Plêêk,",
  "2": "laa varơuq đơu Kadraq heq taveek xing adrooyq gamưh khơl hnhư hlit ku Kadraq đom Rahlăăp Vah,",
  "3": "truh Koot Kadraq - Kơy jah pa iir vlôh xing adrơơk ku Đa-vik tyauq phoon xăk xamơk,",
  "4": "Kơy jah đnooy tayh laa Koot Kơy Plêêk bơyh taay yaak gamưh varơuq riilh hlê xing aduq kaxêêt tyauq Yaak Phool Vah Xarêh - nưq laa Lôôk Wơt Dêh Jê-xu, Lôôk haay,",
  "5": "Đơu gamưh Kadraq, 'wot heq nhonq xok<strong>vanong kaxaay </strong> ji varơuq dơơp khơl jah rơơlh wih truh varơuq kuh kuul ku xuum tuuôq katuul dêq hloay kaluh tamooi daak kadrơơy vii kơq yal Kadraq.",
  "6": "đom kasôôq nưq oh ay kung laa khơl adro jah tawoyh tayh laa manih ku Lôôk Wơt Dêh Jê-xu.",
  "7": "Atăq truh dêq hloay khơl adro đong măn kaduq Rô-maa, laa khơl adro xung xiaq ku Kơy Plêêk, laa khơl vah jah tawoyh tayh: Apôôy <strong>vanoong kaxaay</strong> truh dii oh ay kung varơuq hrok hrol xing Kơy Plêêk, Vaq haay, ji xing Lôôk, laa Lôôk Wơt Dêh Jê-xu.",
  "8": "Adrooyq dik, gamưh Lôôk Wơt Dêh Jê-xu, gô kuh kwaay Kơy Plêêk ku gô truh dêq hloay oh ay, vii xuum tuuôq ku oh ay jah đnooy avlôh looch dêq dih dêh.",
  "9": "Vii Kơy Plêêk laa manih xanưk ku gô, Kơy đơu gô hơu varơuq bơơn xuum phool gô đom Hêêl Kaxaay ku Koot Kadraq, nưq laa gô leh padơơy e varơuq ahmưk nhăk truh oh ay luleq,",
  "10": "tuôôy hloay hloay apôôy vôôch đom apok apôôy ku gô đaneq atoh hnoq ik, xôq yôôych muut katuôôy neq long katuôôy kadrơơy, gô hnoq e đơơt hooy tơl dal bơyh iq trôôch ku Kơy Plêêk xôq truh kung oh ay.",
  "11": "Vii gô thier trôôch jah tavơh oh ay, xôq ka gô hnoq ik padooh taboon dii oh ay vanong <strong>danơng kooy,</strong>  leq nưq, xôq oh ay jah dưk kaalh praat.",
  "12": "'ngưq laa gô trôôch jah wăk mamuuyq đom khơl oh ay, bơyh xuum tuuôq ku mamuuyq, 'ngưq laa ku oh ay ji hloay ku gô.",
  "13": "Wơơy oh ay, gô leh trôôch oh ay be xet kajoq truh iq đinq adrooyq neq ku gô laa truh hlơq oh ay ( bơh truh tuôôy juneq gô kung măn tavơh pơơl hwơơl), xôq goch raak plaay đom khơl oh ay, kung đaji katuul kaluh tamooi kadrơơy.",
  "14": "Gô pơq lôôk dêq manih Hy-laap hloay kaluh tamooi leh aalq laa Hy-laap, dêq manih <strong>khôôt xet </strong>hloay adro vlôô khưlq.",
  "15": "Vii anưq, măn phoon gô, gô hloay e xuum đnooy avlôh hêêl kaxaay ka oh ay kaduq Rôô-maa.",
  "16": "Vii gô leh kamưưl truh hêêl kaxaay, bơyh 'ngưq laa taay yaak ku Kơy Plêêk xôq wơơt tôôy adro tuuôq, adrooyq laa manih Jo-Thaiq, yôôych truh manih Hy-laap.",
  "17": "Gamưh đom hêêl kaxaay nưq e kahnoq vlôh varơuq hyioh jăk ku Kơy Plêêk, xing xuum tuuôq truh xuum tuuôq, đaji e vlơk:\" Dik, manih hyioh jăk hnoq riilh gamưh xuum tuuôq.\"  ",
  "18": "Vii kơn tôq jaraq ku Kơy Plêêk xing plêêk jah kahnoq vlôh tachơơl hlê dii kaluh varơuq <strong>leh tuuôq</strong> ji leh hyioh jăk ku khơl drơơy, khơl adro xok varơuq leh hyioh jăk ahnaan joa varơuq dik.",
  "19": "'Ngưq laa vii varơuq kajoq xet truh Kơy Plêêk yôôych heq trơơ trơơ vlôh kangưưl oot, vii Kơy Plêêk heq a'nhee tađnaah oot.",
  "20": "Vii kaluh varơuq <strong> e 'miêh đom xuum </strong> leh hloq ik ku Kadraq, 'ngưq laa taay yaak đơơy đơơy ji yaak xuum Kadraq, yôôych xing tuôôy panưk jêêk dih dêh heq trơơ trơơ, hlolh ik gamưh kaluh prooh heq jah panưk jêêk, đanưq oot leh e varơuq xôq tagêh.",
  "21": "'Ngưq laa vii long oot xet truh Kơy Plêêk, bơh oot leh ayuuôt laat Kadraq laa Kơy Plêêk, kung leh kuh kwaay Kadraq. Tađôôi muut đnư, oot wiih vlôh jêêk vlôô khưưlq đom xuum biit oot, măn xuum adruuy ta'ngok ku oot yuuôl vlôh kamưưng jaluuk.",
  "22": "Oot đnooy kadih oot laa khôôt xet, bơh wiih vlôh jêêk vlôô khưưlq.",
  "23": "Oot tađôôi tađnah tađnaak ku Kơy Plêêk leh hmưq hưư hlơơp yuuôl vangưưr ku koot manih dayh hưư hlơơp, kung đaji ku prooh xêêp, ôq gôk, ji kaluh voolh kajêêp. ",
  "24": "Vii anưq, Kơy Plêêk pahnăp oot ka kaluh xuum trôôch a'moh nhơơy ku xuum oot, xôq xăk xamơk oot biq 'moh nhơơy kadih đom biing oot.",
  "25": "Kadih oot laa khơl adro tađôôi hyioh jăk ku Kơy Plêêk yuuôl varơuq pa-ôôh lar, kuh kwaay ji hơu varơuq kaluh jah panưk jêêk tađôôi vii Kơy panưk Jêêk, laa Kơy jah ayuuôt vnê đơơy đơơy. A-meen.",
  "26": "Jơq vii nưq, Kơy Plêêk heq pahnăp ka'lăk oot ka kaluh xuum trôôch adrah dik, ji pheq đnooy khơl kadrê măn tađôôi varơuq xa vik katơq e 'miêh yuuôl varơuq xa vik katơq tachơơl dii e 'miêh.",
  "27": "Ji kung đanưq, khơl kanơu ka'lăk xa vik katơq e 'miêh dii khơl kadrê ji ahluk vuh xuum trôôch dii mamuuyq. Oot laa khơl kanơu dơơp varơuq katơq bơơyq dii khơl kanơu, ji nhonq xok kadih hmơơt dook taxưưnq dii varơuq dơơp be troq ku oot.",
  "28": "Vii oot leh chiuq nhonq xet Kơy Plêêk, đanưq Kơy Plêêk atăq ka'lăk oot ka xuum biit hưư hlơơp, xôq oot dơơp kaluh varơuq be raa kajoq.",
  "29": "Oot chrook xôq hlooh kaluh varơuq leh hyioh jăk, xơơk tauuq, xuum hmưch, tôq jaraq. Oot glơơh glaay varơuq gliêh yarơơ, păk kaxêêk manih, tayaat takai, pa-ôôh lar ji xơuq xuum. Oot 'ngưưng 'ngôôy taboon xâuq khơl drơơy,",
  "30": "<strong> trôôch pa'hnhiq, yarơơ Kơy Plêêk, lienq xauq, laa ook,</strong> akwoe kwoak, jooy dơơp xơơk, ji leh tameen tyauq miq vaq.",
  "31": "Oot axiit hloh xet, leh muuyq xuum dii kadrê, leh tabôông, leh xet biit angơuq. ",
  "32": "Atoh oot hlolh ganuun hyioh jăk ku Kơy Plêêk heq đnooy adro lôôp kaluh varơuq đanưq laa xưnq kaxêêt, bơh oot leh vơơ lôôp kaluh varơuq nưq, đơu măn ahluuk athêêp ka adro kadrơơy kung lôôp.",
  "None": "<strong>Thơ ku Phao-lô</strong><strong>Atăq ka manih</strong><strong> Rô-maa</strong>"
}