{
  "1": "Anưq thii, haay hnoq đnooy đaleq? Haay e duh dơơp đnooyq đom kadrôp maroh xôq vanong kaxaay athêêp rah jôôt?",
  "2": "Varơuq nưq leh xlih vlôh ik. Haay ji adro heq kaxêêt đôôiq dii kadrôp maroh thii dơơp aleq haay hnoq măn riirh đom ni?",
  "3": "Long oh ay leh xet aneq atoh kơyq heq chiuq baap-teem đom Lôôk Wơơt Dêh Jê-xu ji heq jah Baap-teem muut đom varơuq kaxêêt kua Kadraq?",
  "4": "Kơq nưq, haay heq jah up dii Kadraq gamưh pheep baap-teem muut đom varơuq kaxêêt, xôq ka dang đaji Lôôk Wơơt Dêh gamưh tađnah tađnaak kua Vaq heq ik khienq riirh hlê xing aduq kaxêêt luleq, thii haay kung hno ik tawaak hooy đom varơuq riirh đơơu lunưq.",
  "5": "Vii atoh haay heq vlôh jêêk anguk muuyq dii kung muuyq dang varơuq kaxêêt kua Kadraq, \n thii mot kadrưy, haay kung hnoq ji đanưq aduq varơuq riirh hlê kua Kadraq;",
  "6": "bơơyh xet varơuq neq, aneq koot manih duut kua haay heq biq đongq đing dii Kadraq, xôq xăk xamơk kua kadrôp maroh hno ik biq kaxêêt hlơơp, lưp măn khienq haay dơơp xapok ka kadrôp maroh đnooyq.",
  "7": "Vii kơyq heq kaxêêt thii ik 'nhuôt ka'lăk kaluh rôôp xadrah xing kadrôp maroh.",
  "8": "Bơh atoh haay heq kaxêêt dii Lôôk Wơơt Dêh,  haay tuôq aneq haay kung hnoq riirh kung dii Kadraq,",
  "9": "vii xet aneq atêq katuôy ik khienq riirh hlê xing aduq kaxêêt, Lôôk Wơơt Dêh paq măn kaxêêt đnooyq; varơuq kaxêêt paq măn dưk xanok tol Kadraq.",
  "10": "Vii varơuq kaxêêt đơơu Kadraq heq chiuq,  Kadraq heq kaxêêt đôôiq dii kadrôp maroh muuyq yưk đuu dêq. Măn varơuq riirh đơơu Kadraq riirh, Kadraq riirh ka Kơy Plêêk.",
  "11": "Kung tyauq trôôk nưq, tabơh oh ay phaay 'yo kadih xăk ji adro kaxêêt đôôiq dii kadrôp maroh, bơh ji riirh ka Kơy Plêêk đom Lôôk Wơơt Dêh Jê-xu.",
  "12": "Anưq, te xôq kadrôp maroh dưk xanok đom xăk xamơk măn 'laalq varơuq kaxêêt kua oh ay, xôq yôôch tamăn tyauq kaluh hmưch trôôch kua ni.",
  "13": "Kung te ataq kaluh xăk xamơk kua haay ka kadrôp maroh đaji valong đôô kua varơuq leh hyioh jăk. Bơh dayh tơk xăk haay kadih ka Kơy Plêêk, đaji măn riirh hlê xing adro kaxêêt, ji kaluh xăk xamơk kua haay đaji valong đôô kua varơuq hyioh jăk ka Kơy Plêêk.\n",
  "14": "Bơơyh kadrôp maroh hnoq leh ik dưk xanok tol oh ay, vii oh ay leh măn 'laalq ganuun, bơh ji 'laalq vanong kaxaay.",
  "15": "Anưq thii luleq? Haay e duh lôôp kadrôp vii haay leh măn 'laalq ganuun, đơơu măn 'laalq vanong kaxaay ? Varơuq nưq leh xlih vlôh ik.",
  "16": "Oh ay leh xet aneq oh ay ataq kadih xăk ka varơuq kajoq đaji xapok đom varơuq tamăn tyauq, oh ay vlôh jêêk xapok ka varơuq đơơu oh ay tamăn tyauq - paq kêê ji kua kadrôp maroh jarooy truh varơuq kaxêêt, long ji kua varơuq tamăn tyauq jarooy truh varơuq hyioh jăk?",
  "17": "Bơh kuh kway Kơy Plêêk vii oh ay 'miêh ji xapok kua kadrôp maroh, đơơu oh ay heq xing 'lăp xuum klaak tamăn tyauq đôôiq dii dơơp atôôlh trôôk pato đơơu oh ay ik pato dayq.",
  "18": "Măn atêq katuôy ik luh vlôh klơlh kadrôp maroh, oh ay heq jah dơơp xapok ka varơuq hyioh jăk.",
  "19": "Gô đnooy tyauq trôôk koot manih bơơyh kơq ka varơuq ravoch kua xăk xamơk oh ay. Vii luleq oh ay heq ataq kaluh xăk xamơk kua oh ay đaji xapok ka varơuq klơl yêq ji ka varơuq xơk tauq  neq truh varơuq xơk tauq hơq, yôôch juneq, kung đanưq, oh ay dayh tơơk  kaluh xăk xamơk kua oh ay đaji xapok ka varơuq hyioh jăk jarooy truh varơuq vlôh vah.",
  "20": "Vii tuôy oh ay măn ji xapok kua kadrôp maroh, oh ay 'miêh jah rayơơh rayơơy đôôiq dii varơuq hyioh jăk.",
  "21": "Yôôch anưq oh ay heq e raak play kajoq tuôy nưq truh kaluh kajoq đơơu juneq oh ay kadih hloq kamưưl? vii atêq lôôt kua kaluh varơuq nưq ji varơuq kaxêêt.",
  "22": "Bơh juneq, atêq tuôy ik luh vlôh chuh kadrôp maroh ji jah dơơp xapok ka Kơy Plêêk, oh ay e raak play kua oh ay jarooy truh varơuq jêêk  vah, đơơu lôôch dik ji varơuq riirh đơơi đơơi.",
  "23": "Vii jêêt hngơy kua kadrôp maroh ji varơuq kaxêêt, bơh vanong kaxaay kua Kơy Plêêk ji varơuq riirh đơơi đơơi đom Lôôk Wơơt Dêh Jê-xu, Lôôk haay."
}