{
  "1": "Mot kadrưy, dayh đoonq nhonq manih ravoch đom xuum tuuôq, leh jarooy truh varơuq xưh xadrah kaluh woan điêmh.",
  "2": "Long muuyq dro leq  e xuum tuuôq xôq xa dêq kua, bơh dro ravoch thii xa kaxeq kwaay.\n",
  "3": "Adro xa te  'yo leh ra kajoq adro leh xa, măn adro leh xa te xưh xadrah adro xa. Vii Kơy Plêêk heq đonq nhonq dro nưq.",
  "4": "Adro xưh xadrah xapok đom hnhư kua khơl drưy, ay ji kơyq? Adro nưq dưk long gưlh ji đôôiq dii kôôt kua kadih xăk dro nưq. Bơh adro nưq hnoq ik khienq ăm dưk găk, vii Lôôk e qwuyen da uuh khienq ay nưq dưk găk.\n",
  "5": "Tabơh dro neq 'yo đinq hngơy neq dii hngơy hơq, bơh dro kadrưy thii biit tôôy hngơy ji tơơl\nkaxaay. Tôôy dro dayh tuuôq chăk đom akoq biit haay.",
  "6": "Adro jưư hngơy ji jưư vii Lôôk, adro xa ji xa vii Lôôk, vii dro nưq kuh kway Kơy Plêêk, dro leh xa ji leh xa vii Lôôk, dro nưq kung kuh kway Kơy Plêêk.\n\n",
  "7": "Kơq leh kơyq đom haay riirh vii kadih haay, ji leh kơyq kaxêêt vii kadih haay.",
  "8": "Bơh hloay katuôôy haay riirh, ji riirh vii Lôôk, hloay katuôôy haay kaxêêt ,ji kaxêêt vii Lôôk. Anưq, hloay katuôôy haay riirh hloay katuôôy haay kaxêêt, haay ji kua Lôôk.",
  "9": "Vii xôq jarooy truh varơuq neq, Lôôk Wơơt Dêh heq kaxêêt ji heq riirh hlê, xôq Kadraq dơơp Lôôk vơơ kua adro kaxêêt, vơơ kua adro riirh.",
  "10": "Bơh ay neq, aleq ay xưh xadrah oh ay haay?  Long ay hơq, aleq ay 'yo leh ra kajoq oh ay haay? Vii dêq hloay haay hnoq dưk kangưưr 'ngôôi xưh xadrah kua Kơy Plêêk.",
  "11": "Bơơyh apok heq ik vlơk:\n “Lôôk đnooy aneq: ‘ Đaji Gô hloay riirh, dêq takuul hnoq kul apôôt kangưưr Gô, \nji dêq kapiet hnoq xưng nhonq kangưưr Kơy Plêêk.’”\n\n",
  "12": "Lunưq, tôôy dro đom haay hnoq kahnoq vlôh apok đnooy vlôh truh kadih haay dii Kơy Plêêk.\n\\p",
  "13": "Kơq nưq, haay te liq đnooy xadrah mamuuyq đnooyq, wih hlê, dayh 'yo đinq luneq măn iaq; leh xôq kuk phơu klơl đơơ long ka kơq xatơlh gưlh ka oh ay haay.\n\n",
  "14": "Gô xet ji ik tuuôq chăk đom Lôôk Jêê-xuu, aneq leh valong kajoq bơơyh xăk ni ji klơl yêq, đêh vlôh dro leq 'yo hlê thưq kajoq nưq ji klơl yêq,  ni ji  klơl yêq đôôiq dii dro nưq.",
  "15": "Bơơyh atoh dro oh ay haay biq dơơp ka jiq xuum vii kơq tuông xa, oh ay paq măn tawaak hooy tyauq xum xung xiaq đnooyq. Te bơơyh tuông xa kua haay dơơp kaxêêt hlơơp dro oh ay nưq, nưq ji dro đơơu Lôôk Wơơt Dêh heq kaxêêt thêq.\n",
  "16": "Anưq, te xôq varơuq kaxaay tamaq kua oh ay biq đnooy xơơk raơơh.",
  "17": "Vii daak dêh kua Kơy Plêêk leh aalq măn kua xa ji tuông hôôt, bơh ji varơuq hyioh jăk ji hrok hrol kung varơuq hlah hlaak đom Lôôk Phool Hiel.\n\n",
  "18": "Vii kơyq hơu varơuq Lôôk Wơơt Dêh tyauq trôôk neq thii kaxaay xuum Kơy Plêêk ji  ik 'yo nhonq bơơyh koot manih.",
  "19": "Lunưq, haay duh chrơơk tyauq kaluh varơuq tagu hlê ji kaluh varơuq wăk tajup jeng ka mamuuyq.\n",
  "20": "Te phaq ka'lăk varơuq dơơp kua Kơy Plêêk vii ka varơuq tuông xa. Long tôôy paroh ji vah xarêh, bơh ji kadrôp maroh đôôiq dii adro xa tyauq trôôk dơơp kơq gưlh lôôp.",
  "21": "Varơuq tơơl kaxaay ji leh xa ôô kung leh hôôt lok long paq kêê varơuq kajoq đơơu gamưh đnư khienq dro oh ay kua haay xatơlh gưlh, long biq gưlh lôôp, long ji vlôh jiêk ravoch.\n",
  "22": "Kadih xăk oh ay e xuum tuôq luleq, dayh jưư xok tyauq kadih xăk kangưưr Kơy Plêêk. Vanong hloay ji adro leh kadih atok xadrah ni đom varơuq ni 'yo ji jơq.\n",
  "23": "Bơh muuyq dro heq biq đinq kadrôp atoh dro nưq heq xa đong tuôy biit ravơq, vii leh vlôh xing xuum tuôq. Mot kadrưy, dêq varơuq đơơu leh vlôh xing xuum tuôq thii ji kadrôp.\n"
}