cor_2020_cua_clt_mrk_book/mrk/6.json

{
  "1": "Xing aduq nưq, Kadraq heq chuh hooy, yôôych xuq truh katu hnhư ku kadraq, ji khơl xatyauq ku Kadraq hooy tyauq Kadraq.",
  "2": "Truh hngơy Sa-baat, Kadraq xarôôp pato daayq đom hnhư taguumq. ‘Ngưng manih tameen biq tưng hưng, đnooy đaneq: \"Kaluh apok pato daayq neq xok vlôh xing leq? Varơuq khôôt xet heq jah kahniq ka kơy neq kung toleq pheep akêh đanưq hơơ kahnoq vlôh xing tii kơy nưq laa aleq?\"",
  "3": "Be aalq neq laa adro thơq môk, koot kanơu ku Ma-ri ji ay kanơu ku Ja-kơơ  Jô-sêê, Ju-đee ji Si-môôn ih? Be aalq toleq dro ma oh kadrê ku kơy nưq đong măn đneen katuul haay ih?\" Oot biq xatôôlh lôôp truh Kadraq.",
  "4": "Lôôk Jê-xu đnooy dii oot đaneq: \"Hnhư hlit yôôych leh thiuq varơuq 'yo vado, dêh vlôh aduq dêh hnhư ni, đom khơl takuun takiel ni ji aduq  kôôch hnhư ni.\"",
  "5": "Kadraq leh ik dơơp paq kêê varơuq taay yaak leq măn đnư, đêh vlôh Kadraq heq payơh binq  tuôôy xôq tii tol thier axit adro jiq jiêh. ",
  "6": "Kadraq hloq akêh vii kơq xuum leh tuuôq ku oot, yôôch Kadraq hooy pato daayq rawiit  kaluh plơơy plaa.",
  "7": "Kadraq taayh kưưl vaar dro jah rơơlh ji xarôôp patăk dăt oot vlôh hooy, vaar dro vaar dro, Kadraq kung kahniq ka oot taay yaak tol kaluh gru-xi,",
  "8": "ji patăk dăt oot đaneq te xagook kajoq tyauq ka tuôôy hooy, đêh vlôh muuyq gaay katôôl đơu heq- leh tôôp, leh droong, kung leh jêêt baak đom hnek katêêk- ",
  "9": "đơu e troaq kaxôôp jeep, ji \"Oh ay te hlưưp vaar  auu.\"  ",
  "10": "Ji Kadraq đnooy ka oot: \"Atoh tuôôy oh ay muut đom hnhư leq, dayh kưq măn aduq nưq dong truh tuôôy leq oh ay chuh hooy klơlh hnhư nưq.",
  "11": "Paq kêê aduq leq leh đonq tiip oh ay. long leh chiuq tameen oh ay, yôôych tuôôy chuh klơlh đnư, dayh tapolh thuul 'lăălq jôôk haay, đaji bơơn xanưk tachơơl hlê oot.\"",
  "12": "Nưq laa, atêq tuôôy dưk hooy, oot pato daayq đaneq tôôy adro duh pheq wiit xuum.",
  "13": "Oot druyh ‘ngưưng kamuuych, kung hloay para dơu ka ‘ngưưng dro jiq, ji payơơh oot.",
  "14": "Anưq yôôych , vuua Hê-rôôt heq tameen xet hêêl neq, vii yal ahlôôk Kadraq heq wih vlôh ahlôôk ahnaa, ji khơl drơơy đnooy đaneq:\" Jăng Baap-tik heq jah dơơp ăm riilh hlê xing aduq kaxêêt, kơq nưq kaluh pheep akêh taay yaak đong dưk dơơp aduq dro neq.\"",
  "15": "Măn khơl adro kadrơy đnooy đaneq: \"Kơy nưq laa Ê- lii .\" Đơu sôq kadrơơy đnoyq đnooy nưq laa: \"Muuyq hnhư hlit, dang đaji muuyq đom khơl hlit.\" ",
  "16": "Bơh tuôôy tameen anưq, Hê-rôôt đnooy đaneq:  \"Jăng, manih đơu gô dool akoq, kơy nưq heq \n jah khienq ăm riilh hlê.\"",
  "17": "Vii kadih Hê-rôôt, heq patăk manih, rôôp Jăng ji vek kơy đom tuu truh varơuq Hê-rô-đia (kadrê ku Phi-liip, ma oh kanơu vuua) vii kơq vuua heq pajêêk mo nưq.",
  "18": "Bơyh Jăng heq đnooy dii Hê-rôôt đaneq: \"Diik laa lôôp ganuun tuôôy Vuua pajêêk kadrê ku ma oh kanơu vuua.\"",
  "19": "Bơh Hê-rô-đia tôq jaraq kơy ji xung păk kaxêêt kơy, đơu mo nưq leh ik,",
  "20": "Jo Hê-rôôt yôq Jăng, vii xet kơy laa adro hyioh jăk ji xuum kaxaay, lunưq vuua jưư ka kơy jah hrok hroor, long tuôôy tameen kơy đnooy, vuua thier areh xuum, đơu vuua  măn e xuum chiuq tameen kơy.",
  "21": "yôôych tuôôy truh kawat tamuut, laa tuôôy Hê-rôôt adoot waal hngơy pa iir kơy mơơy khơl padrok dơơp ku kơy kung khơl dưk jarooy bing kuun, ji khơl dưk xanok dêh Ga-li-lêê,",
  "22": "yôôych tuôôy nưq koot kadrê Hê-rô-đia ku vuua heq tawaak muut, ayuch ayau, ji khienq Hê-rôôt kung khơl adro kung paraa dii vuua thier hlah xuum, lunưq vuua heq đnooy dii oh kadrê: \"Dayh vôôch gô paq kêê varơuq kajoq koot trôôch ji gô hnoq kahniq ni ka koot.\"",
  "23": "Kơy paleek dii mư đaneq: \"Long koot vôôch gô, truh muut panoot daak dêh ku gô, gô kung hnoq ăm koot.\"",
  "24": "Nưq laa, atêq tuôôy hooy vlôh pi gôk, oh kadrê vôôch miq ni:\" Koot duh vôôch kajoq?\" yôôych moo nưq tơơl: \"Akoq ku Jăng Bap-tiit.\" ",
  "25": "Vơơ jơnưq, đom varơuq pol wol tuôôy wiit muut hlê kung vuua, oh kadrê vôôch: \" Koot xung laa hloay juneq vuua kahniq ka koot  akoq ku Jăng Bap-tiik xôq tol garaat.\"",
  "26": "Long tabơh thier raa hlu rơu, bơh vuua leh trôôch chôôiq ka'lăăk oh kadrê bơyh kơq apok paleek ku ni ji khơl manih mơơy đong 'ngôôy kung paraa dii ni,",
  "27": "lunưq vuua vơơ hloay, patăk kuun dool, patăk xagook akoq ku Jăng truh, ji atêq tuôôy vlôh pi gôk, ni hooy dool akoq kơy đom tuu.",
  "28": "Ni xagook akoq ku kơy xôq tol garaak ji ăm ni ka oh kadrê, yôôych oh kadrê ăm ni hlê ka miq ni.",
  "29": "Tuôôy heq tameen xet varơuq, khơl xatyauq ku Jăng truh, xok xaak kơy, ji xagook ni hooy  uup xôq đom xanưng. ",
  "30": " Khơl jah rơơlh anguk hlê kung Lôôk Jê-xu, taboon ka Kadraq tôôy varơuq oot heq dơơp ji kaluh varơuq oot heq pato.",
  "31": "Kadraq dăt oot: \"Kadih oh ay dayh kadih hooy truh aduq leq nưq đêh raa wănq vleng, ji dayh padơơy pado muuyq jơy.\" Vii e thier raa 'ngưưng adro hooy dalơh adro hooy hlê, ji oot pheq đnooy leh e kawah xôq xa. ",
  "32": "Oot kung mamuuyq hooy tok gee truh muuyq aduq wănq vleng.",
  "33": "'Ngưưng dro heq hloq oot chuh hooy ji 'yo vlôh oot, lunưq xing loch kaluh palơơy palaa, khơl drơơy heq kung mamuuyq chrơơk jôôk truh đnư ji truh aduq adroyq oot.",
  "34": "Tuôôy heq tawaak vlôh klơlh gee, Kadraq hloq muuyq bing manih thier karôôp, ji Kadraq arơơk xuum biit angơuq oot vii oot dang đaji trưưu leh e manih ajư, yôôych Kadraq xarôôp pato oot ‘ngưưng varơuq.",
  "35": "Tuôôy nưq heq ahnuuy yôôych, lunưq tuôôy truh kung Kadraq, khơl xatyauq ku Kadraq tơơl đaneq: \"Aduq neq laa aduq wănq vleng ji kajơ neq heq rayôôp klôôy yôôch.",
  "36": "Vôôch ăm manih karôôp vlôh xuq, xôq atêq tuôôy hooy muut kaluh palơơy plaa gah gih neq, yôôych oot hnoq ik kadih root kajoq nưq xôq xa.\" ",
  "37": "Bơh tuôôy tơơl apok oot, Kadraq dăt: \"Oh ay dayh ăm oot xa.\" Oot tơơl dii Kadraq: \"Tuôôy hooy yôôych, alưưp e ‘wot hnoq ik root jah vaar hreek đơ-ni-ê tôôp đơu ăm ka manih karôôp xa ih?\"",
  "38": "Anưq yôôych, Kadraq đnooy dii oot: \"Dayh hooy. AXek 'yo. Oh ay e toleq pop tôôp?\" Atêq katuôôy axek vôôch, oot tơơl: \"Dăăp pop tôôp ji vaar pop ka.\"",
  "39": "Kadraq patăk ka dêq hloay manih karôôp ‘ngôôy pôôt vlôh tưng riek tol rek adriilh.",
  "40": "Oot ‘ngôôy aklah vlôh kaluh riek aklah vlôh  muuyq hreek dro ji vlôh dăăp kưưl dro.",
  "41": "Atêq tuôôy adrơk dăăp pop tôôp ji vaar pop ka, ‘ngơơk mot tok plêêk, Kadraq kuh kway ji plelh tôôp vlôh yôôych palo ka khơl xatyauq kadraq xôq oot adrơk ahlook ka manih karôp, Kadraq kung ahlook vaar poop ka vlôh ka tôôy adro.",
  "42": "Oot raay xa ji jah phiq phơh. ",
  "43": "Ji oot tôôt agoop jah kưưl vaar vuk atar viik kaluh kapleh tôôp raah ji kaa  ",
  "44": "Khơl adro heq xa tôôp đom kơh dăăp ravơu dro khơl kanơu.",
  "45": "Jơnưq, Kadraq ahluk ahluul  khơl xatyauq kadraq tawaak tok gee ji hooy adroyq hlê gah piik hơq, truh  Bêt-saai-đaa, đom tuôôy Kadraq ăm manih karôôp hooy xuq.",
  "46": "Tuôôy oot heq dưk hooy, Kadraq hooy tok đoot xôq apôôy.",
  "47": "Truh klôôy, gee heq măn dituul tahlii, ji Kadraq măn muuyq dro tol vari.",
  "48": " Hloq oot đong ranq praat awayh wơq - vii khiel đong kaxơơlh ngưưl dii oot - yôôych kawaah wat poot klôôy nưq, Kadraq hooy jôôk tol răk daak truh aduq oot ji Kadraq xung dalơh hlê oot.",
  "49": "Bơh tuôôy 'yo hloq Kadraq tawaak hooy tol răk daak, oot biit đaneq nưq laa kamuuych, lunưq oot laa rawôônq tok,",
  "50": "vii oot raay 'yo hloq Kadraq ji biq vraar hwaal. Bơh jơnưq, Kadraq đnooy dii oot ji patăk dăt oot: \"Dayh kajưk xuum! Laa thơy neq! Te yôq !\"",
  "51": "Kadraq tawaak muut đom gee dii oot ji khiel langưm hooy hlơơp, khơl xatyauq e varơuq xôôl dôôl akêh paq ik măn đom khơl oot.",
  "52": "Vii oot heq leh hlolh truh pheep akêh dơơp avlôh tôôp, tađôôy muut đnư, xuum oot măn jaa găk gauq.",
  "53": "Tuôôy heq hlê piik gah hơq, oot hooy truh Ghê-nê-xa-rêêt ji truh ka gah măn đnư.",
  "54": "Tuôôy oot vlôh klơlh ge, vii 'yo xet Kadraq lien.",
  "55": "lunưq khơl drơơy chrơơk hooy loch dêh nưq ji xarôôp xakôôk khơl adro biq binq tol ravaak truh aduq đơu oot tameen đaneq Kadraq dong măn đnư.",
  "56": "Long aduq leq Kadraq hooy muut, đom kaluh plơơy plaa, long đom theng dêh long đom dêh katu, manih karôôp raay xagook khơl adro binq xôq ka aduq tabôôt xa ji vôôch Kadraq xôq axit dik oot hnoq ik vêq muut thơơl aau ku Kadraq, ji paq kêê adro leq vêq muut Kadraq raay jah yơơh binq."
}