cor_2020_cua_clt_mrk_book/mrk/5.json

{
  "1": "Yôôych oot hooy truh gah tahli pi hơq, truh dêh vari Jê-ra-sê.",
  "2": "Tuôôy Kadraq vlôh klơlh gee, vơơ jơnưq,  muuyq dro biq gru-xi nhôôp vlôh kôô Kadraq xing kaloo xanưưng,",
  "3": "Adro neq e aduq măn đom kaluh kaloo   xanưưng,  ji leh ekơyq hnoq ik rôôp jưư ay nưq ik đnoyq, hloay kaa xok talơơy looy tooy kung leh ik, ",
  "4": "Vii 'ngưưng yưk ay biq vek bơơn vawauq ji looy tooy, đơu talơơy looy tooy yôôch biq ay parăch klooh, măn vawauq yôôch biq tiip naat, ji be ekơyq kaalh đuu xôq rôôp jưư ay nưq. ",
  "5": "Ratuôôt kaa hngơy hloay kamưng đom kaluh kôôp xanưng ji tol kaluh aduq đoot gôk, ay nưq alo ook ji chooh goch xăk ni bơơn phơu mưưr 'mooch. ",
  "6": "Tuôôy 'yo hloq Lôôk Jê-xu xing kơn xangưưi, ay chrơơk truh ji kuul xăk pôôt kangưưl Kadraq.",
  "7": "Kôt apok ook alo, ay nưq đnooy: \"Kuh Jê-xu, Koot ku Kơy Plêêk Thier Yơơt, gô e apiq kajoq dii Kadraq? Gô apôôy vôôch Kadraq paleek kangưưl Kơy Plêêk, te dơơp pra ơơh gô.\" ",
  "8": "Vii Kadraq 'miêh heq đnooy ka ni, đaneq: \"Gru-xi hơq, dayh vlôh klơlh dro neq.\"",
  "9": "Kadraq vôôch ni: \"Maay anơng kajoq?\" Ni tơơl kung Kadraq: \"Anơng gô laa Kuun Karôp, vii 'wot karôp.\"",
  "10": "Yôôych ni kưq ratuut apôôy vôôch Kadraq đaneq Kadraq te druuyh bing oot vlôh klơlh dêh nưq. ",
  "11": "Tuôôy nưq, aduq nưq e muuyq bơơy xuur thier karôp đong jah luh xa tol adroay,",
  "12": "anưq oot apôôy vôôch Kadraq, đaneq:\" Xiin patăk ka 'wot muut đom bơơy xuur, xôq 'wot hnoq ik nhôôp muut oot.\"",
  "13": "Kadraq ăm pheep oot, ji tuôôy heq huch vlôh yôôch kaluh gru-xi nhôôp muut bơơy xuur, yôôych bơơy xuur - đom kakơh vaar ravơu poop - xing adroay đoot charuyh charup pôôt tahli ji kaxêêt krăăp 'lăălq tahli.",
  "14": "Khơl adro ajư xuur ka'lăăk xadăk ji taboon hlê varơuq nưq đom kaluh theng plơơy hloay aduq dêh plơơy plaa, anưq 'ngưưng dro hooy truh xôq 'yo varơuq kajoq heq xlih vlôh.",
  "15": "Oot truh dii Lôôk Jê-xu ji hloq adro biq kamuuych nhôôp - nưq adro hmưq biq kuun karôp kamuuych nhôôp muut - đong 'ngôôy đnư, jah xa hlưưp tơơl daal ji măn đom katuôôy akoq ngook văch vơk, yôôch oot thier yôq vraar.   ",
  "16": "Toleq adro dưk xanưk taboon hlê ka oot  varơuq heq xalih vlôh đaji luleq ka adro biq kamuuych nhôôp ji varơuq truh bơơy xuur.",
  "17": "Ji oot đnooy apok apôôy vôôch Kadraq chuuh   klơlh vari dêh ku ni.",
  "18": "Tuôôy Kadraq đong tawaak muut gee, adro heq hmưq biq kamuuych nhôôp ratuut vôôch Kadraq xôq ay hnoq ik măn kung Kadraq.",
  "19": "Kadraq leh ăm pheep ay, bơh patăk ka ay: \"Dayh hooy xuq hnhư ay, truh dii khơl oh ay ku ay đơu taboon hlê ka oot varơuq kôt Lôôk heq dơơp tol ay ji đaleq Kadraq heq kahnoq xuum biit angơuq ay.\"",
  "20": "Ji yôôych, ay vlôh hooy ji xaroop pahêêl đom dêh Đê-ka-bô-lơ varơuq kôt lơyq đaleq đơu Lôôk Jê-xu heq dơơp ka ni, ji kơyq kơyq raay akêh.",
  "21": "Atêq tuôôy Lôôk Jê-xu măn tol gee dalơh hlê gah pi hơq yưk traa, muuyq bing manih thier karôôp anguk hlê rawiit Kadraq, ji Kadraq đong măn aduq gah tahli. ",
  "22": "Hơq, muuyq đom khơl adro jưư ‘yo hnhư taguumq, anơng laa Jaai-ru, hooy truh, ji tuôôy hloq Kadraq, kơy kuul pôôt aduq jôôk Kadraq.",
  "23": "Kơy dêq xuum apôôy vôôch Kadraq tuôôy tơơl đaneq: \"Koot kadrê de ku gô đong heq paq ik. Apôôy Kadraq truh xôq Kadraq vêq tii tol xaau xôq ka xaau hnoq ik jah payơơh ji jah riilh.\"",
  "24": "Anưq laa Kadraq hooy dii kơy; muuyq bing mamih thier karôôp kung hooy tyauq Kadraq ji pahnen ahnuch rawiit Kadraq. ",
  "25": " E muuyq khơl drê heq biq be drơơy kưưl vaar xanưm,",
  "26": "heq chiuq kưk pơơl paq ik bơyh 'ngưưng thơy  jarơơu ji heq tayuuh xarêh tôôy kuah ku ni,  đơu be tawaay hlê iit kajoq, bơh tađôôi muut đnư, binq măn wih vlôh nănq iaq,",
  "27": "atêq tuôôy tameen truh Lôôk Jê-xu, yôôych tuôôy truh jeq pi katoor Kadraq tuul bing manih karôôp, mư vêq muut aau Kadraq.",
  "28": "Vii mư biit đaneq: \"Atoh gô vơơ vêq muut aau  Kadraq heq yôôych gô hnoq jah yơơh.\"",
  "29": "Vơơ jơnưq, jiq be drơơy ku mư dưk hlê, ji mư tameen xet tol xăk xamơk mư, đaneq xăk xamơk heq jah payơơh klơlh binq.",
  "30": "Jơnưq, Lôôk Jê-xu, tameen xet aduq xăk kadraq đaneq taay yaak xing kadraq heq avlôh, lunưq wih hlê katuul manih karôôp, Kadraq vôôch đaneq:\" Kơyq heq vêq muut aau ku gô?\"",
  "31": "Khơl xatyauq Kadraq tơơl dii Kadraq: \"Thơy hloq bing karôôp đong hnen ahnek thơy, đơu thơy măn vôôch: \"Akơyq vêq muut Gô' ih?\"",
  "32": "Kadraq măn đong 'yo rawiit xôq ‘yo kơyq heq dơơp varơuq nưq.",
  "33": "Tuôôy nưq, dro mư kadrê, vii heq wih yôq yet ji padrau padrik, xet varơuq heq xalih vlôh ka ni, lunưq heq truh, kuul xăk pôôt kangưưl Kadraq ji taboon hlê ka Kadraq dêq hloay varơuq dik.",
  "34": "Bơh Kadraq đnooy dii mư: \"Nee koot kadrê, xuum tuuôq koot heq payơơh koot. Dayh hooy đom langưưp paat ji jah yơơh kaalh klơlh binq ku koot.\" ",
  "35": "Đom tuôôy Kadraq măn đong đnooy, e toleq adro xing hnhư ku dro dưk xakaq hnhư taguumq truh taboon đaneq: \"Koot kadrê ku kơy kaxêêt yôôych. Aleq măn dơơp tawaq Thơy đnooyq?\"",
  "36": "Bơh tuôôy tameen tek apok oot đnooy, Lôôk Jê-xu đnooy ka adro xakaq ‘yo hnhư tajauq: \"Te yôq. Vơơ tuuôq đơu heq.\"",
  "37": "Kadraq leh ăm pheep akơyq đêh hooy kung dii Kadraq, vơơ ăm Phi-e-rơơ, ja-kơơ ji jăng, oh ja-kơơ.",
  "38": "Kadraq hooy truh hnhư ku adro xakaq ‘yo hnhư taguumq ji hloq ka varơuq dik mik kung nhim ook ji alo tarok 'nhih.",
  "39": "Tuôôy tawaak muut, Kadraq đnooy dii oot: \"Aleq khơl êêp hluu rơu ji nhim ook? Oh de leh kaxêêt, đơu xaau đong vik.\"",
  "40": "Anưq laa bing oot xagieel aklêêu Kadraq, bơh tuôôy heq pađuôôy dêq bing oot vlôh pi gôk, Kadraq jarooy xatyauq vaq, miq  ku oh de ji khơl adro hooy kung Kadraq, yôôych Kadraq truh aduq oh de vik.",
  "41": "Atêq tuôôy rôp tii oh de, Kadraq dăt beq de: \"Ta-lii-thaa, kuum!\" apok nưq yôôch jah jich laa: \"Koot kadrê de, gô dăch koot dayh kah yơu.\"",
  "42": "Jơnưq, oh de 'ngôôy kah ji tawaak hooy (vii heq jah kưưl vaar xanưm), ji khơl adro măn đnư vơơ vraal hwaal, akêh paq ik.",
  "43": "Kadraq kajưk apok đnooy dăt oot đaneq leh muuyq dro leq duh xet varơuq neq, ji Kadraq dăt oot ăm oh de xa."
}