cor_2020_cua_clt_mrk_book/mrk/3.json

{
  "1": "Kadraq laay hooy muut hnhư taguumq, ji muuyq adro e palaa tii biq kavăp đong măn aduq nưq.",
  "2": "Khơl drơơy tyauq tavooy 'yo Kadraq tapiq jeq, jơq be Kadraq hnoq paxêêk payơh dro nưq đom hngơy Sa-baat, xôq ka oot hnoq ik rôôp kadrôp Kadraq.",
  "3": "Kadraq dăt adro e pala tii biq kavăp: “Dayh dưk muut katuul.\"",
  "4": "Ji Kadraq vôôch oot: \" Hngơy Sa-baat ik pheep  dơơp kaxaay long dơơp xơk; wơt manih long păk kaxêêt manih?\" Bơh oot hnheep hloay.",
  "5": "Atêq tuôôy gliêh mot 'yo oot dii xuum jaraq, jiq hlu vii varơuq găk xuum ku oot, Kadraq đnooy dii dro khơl kanơu: \"Dayh hnhong pala  tii ku ay vlôh.\" Ay hnhong vlôh ji pala tii ay jah yơh hlê.",
  "6": "Ji tuôôy heq vlôh pi gôk, khơl manih Pha-ri-si kung khơl adro bing ja Hê-rôôt vơơ hloay athêêk tajauq xôq vih tachơơl hlê Kadraq, dơơp đaleq xôq bing oot hnoq ik păk kaxêêt Kadraq.",
  "7": "Lôôk jê-xu kung khơl xatyauq Kadraq wiit xuq pi tahli, ji muuyq bing tamooi thier karôôp heq hooy tyauq xing Ga-li-lê, xing Ju-đê,",
  "8": "xing Jê-ru-sa-leem, ji xing Y-đu-mê kung dii dêh pi panưh hơq tavook Jô-đanh, kung đaji rawiit gah theng Ti-rơ ji Si-đôôn. Vii tameen xet dong leq varơuq Kadraq dưk dơơp, muuyq bing karôôp thier 'ngưưng heq gruk truh dii Kadraq.",
  "9": "Kadraq dăt khơl xatyauq kadraq dơơp aleq ka muuyq poop gee de ralauq xôq 'miêh ka Kadraq vii kơq manih karôôp, xôq oot be huq ahnen ahnek Kadraq.",
  "10": "Bơyh Kadraq heq payơơh 'ngưưng dro, pheq đnooy long kơyq e binq tâk pheq ahnen ahnek  truh jeq Kadraq xôq hnoq ik vêq muut Kadraq.",
  "11": "Paq kêê tuôôy leq kaluh gru-xi hloq Kadraq, oot raay kuul xăk pôôt kangưưl Kadraq, ji oot ook tarok, đnooy đaneq:\" Kadraq laa Koot Kơy Plêêk.\"",
  "12": "Kadraq kajưk apok toah oot xôq oot leh tauq avlôh truh Kadraq.",
  "13": "Kadraq hooy tok tol đoot ji tayh khơl adro đơu kadih Kadraq xung, ji oot truh kung Kadraq.",
  "14": "Kadraq pato đinq kưưl vaar adro ( khơl adro đơu Kadraq kung tayh laa khơl jah rơơlh), xôq oot măn dii Kadraq ji xôq Kadraq hnoq ik patăk dăt oot hooy padooh pato,",
  "15": "kung đaji kahniq ăm taayh yaak druyh kamuuych.",
  "16": "Kadraq pato đinq kưưl vaar dro: dii Si-môôn, Kadraq xôq athêêp anơng laa Phi-e-rơ,",
  "17": "Ja-kơơ, koot kanơu Xê-bê-đê, ji Jăng, oh ku Ja-kơ, laa khơl adro Kadraq kung xôq athêêp anơng laa Bô-a-neet, iq laa khơl koot kanơu ku kơy kata,",
  "18": "kung dii Anh-rêê, Phi-liip, Ba-thê-lê-mii, Ma-thi-ơơ, Thô-maa, Ja-kơ koot kanơu A-phêê, Tha-đêê, Si-môôn Xê-lôôt,",
  "19": "ji Ju-đaa Ich-ka-ri-ôôt, kung laa adro xlih xuum Kadraq.",
  "20": "Kadraq muut đom muuyq poop hnhư, ji bing tamooi wiih gruk mamuuyq truh, pheq dơơp Kadraq kung khơl jah rơơlh pheq đnooy leh ik xa tôôp ik. ",
  "21": "Tuôôy khơl adro gah gih Kadraq tameen anưq, oot truh xôq rôp jưư Kadraq, vii oot đnooy đaneq: \"Ay nưq ta'ngok yôôych.\"",
  "22": "Khơl thơy pato ganuun, laa khơl adro hooy pôôt xing Jê-ru-sa-leem, đnooy đaneq: \"Ni biq Bê-ên-xê-buun nhôôp,\" ji đaneq: \"Gamưh lôôk kamuuych đơu ni nưq druyh kamuuych.\"",
  "23": "Bơh tuôôy heq tayh oot truh kung kadraq, Kadraq đnooy dii oot  bơơn apok atoh: \"Dơơp đaleq Sa-taanh hnoq ik druyh Sa-taan?",
  "24": "Atoh muuyq daak dêh biq aklah vlôh kadih tachơơl hlê kadih ni, yôôych daak dêh nưq leh ik dưk kajưk ik.",
  "25": "Atoh muuyq hnhư biq aklah vlôh kadih tachơơl hlê kadih ni, yôôych hnhư nưq hnoq leh ik kajưk xiik ik.",
  "26": "Ji atoh kamuuych dưk tok tachơơl hlê kadih ni đơu biq ahlook goch, yôôych ni leh ik dưk kajưk, bơh heq truh tuôôy kaxêêt hlơơp.",
  "27": "Đêh dii varơuq kadih tachơơl hlê kadih ni, tuôôy heq muut đom hnhư ku muuyq dro kaalh praat, leh ekơyq hnoq ik vroh xok gruh anôôp ku ay nưq đêh vlôh heq vek jah dro kaalh praat nưq adroyq, yôôych atêq nưq đơơu vroh xok hnhư ni.",
  "28": "Dong dik, Gô dăt êêp kơy, đaneq tôôy kadrôp maroh ku koot xaau koot manih hnoq jah ka'lăăk, pheq đnooy paq kêê apok katơk dalơh leq oot đnooy vlôh,",
  "29": "Lunưq long kơyq đnooy lôôp tachơơl hlê Kơy Phool Hiel, yôôych leh e varơuq jah ka'lăăk truh đơơy đơơy, khơl adro nưq biq lôôp kadrôp miek miek.\" -",
  "30": "Kadraq đnooy anưq vii oot đnooy: \"Ni nưq biq gru-xi  nhôôp.\"",
  "31": "Miq Kadraq kung khơl oh ku Kadraq truh, ji tuôôy đong dưk pi gôk, oot gamưh adro đnooy ka kadraq, tayh Kadraq vlôh.",
  "32": "muuyq bing karôôp đong 'ngôôy rawiit Kadraq, ji khơl drơơy đnooy dii Kadraq: \" 'Yo hơq, miq thơy kung khơl oh ay thơy măn pi gôk, đong axek thơy.\"",
  "33": "Tơơl hlê oot, Kadraq đnooy: \"Akơyq laa miq gô ji khơl oh ay gô?\"",
  "34": "Yôôych atêq tuôôy ralơq mot 'yo khơl adro đong ‘ngôôy rawit gah Kadraq, Kadraq đnooy: \" Dayh 'yo nee, miq gô ji khơl oh ay gô!",
  "35": "Vii long kơyq dơơp tyauq iq trôôk Kơy Plêêk, yôôych nưq laa ay oh,oh ay, ji miq gô.\""
}