cor_2020_cua_clt_mrk_book/mrk/11.json

{
  "1": "Tuôôy oot hooy jeq truh Jê-ru-sa-leem, truh Bê-pha-jê ji  Bê-tha-ni, pi ngưưl xuq đoot Ô-liiu, Kadraq patăk vaar dro xatyauq ku kadraq hooy,",
  "2": "ji đnooy dii oot: \"Dayh hooy muut plơơy pala kangưưl oh ay, hloay tuôôy muut truh đnư, oh ay hnoq hloq muuyq lưưa koot biq vek, koq hmưq e kơyq achoo tol ni. Dayh luh talơơy vek ka ni ji jarooy ni xuq đneen. ",
  "3": " Atoh kơyq nưq vôôch oh ay: \"Aleq êêp ay dơơp anưq?' yôôych dayh tơơl đaneq: 'Lôôk e varơuq duh xung ni ji Kadraq hnoq atăq ăm ni hlê hloay juneq.\"' ",
  "4": "Oot chuh hooy ji hloq muuyq lưưa koot biq vek ka 'mok gôk gah trôôk, lunưq oot luh talơơy ka ni.",
  "5": "Toleq dro dưk đnư đnooy kung oot: \"Baar ay đong dơơp kajoq đơu luh talơơy vek lưưa koot nưq?",
  "6": "Oot tơơl hlê toleq adro nưq đaji Lôôk Jê-xu heq pato, ji khơl adro nưq xôq ka oot hooy.",
  "7": "Oot jarooy lưưa koot xuq ka Lôôk Jê-xu yôôych hlơơk auu kahliik oot taal lưưa,  ji Kadraq  'ngôôy tok nưq.",
  "8": "‘Ngưưng dro hlơơk auu oot vlôh tol trôôk, măn dii sôôq kadrơơy, yôôych hlơơk kaluh đook gay heq koh xing manaay gôk.",
  "9": "Hloay khơl adro hooy adrooyq hloay khơl adro tyauq atêq hôô kôt: \"Hô-saa-naa! Đanq yuôôt laat Kơy kahrii truh taayh yal Lôôk.",
  "10": "Vanong ka daak dêh hnoq truh ku mo kơy Đa-vik haay! Hô-saa-naa đom aduq thier raa yơơt!\"",
  "11": "Kadraq heq hooy muut theng Jê-ru-sa-leem,  muut đom hnhư hơu, ji tuôôy heq 'yo raa wiit tôôy thưq, vii wat nưq kung jeq klôôy yôôych, Kadraq hooy vlôh truh Bê-thaa-nii kung kưưl vaar dro jah rơơlh.",
  "12": "Hngơy atêq, tuôôy oot heq hooy vlôh klơlh   Bê-thaa-nii, yôôych Kadraq pangoot.",
  "13": "Tuôôy 'yo hloq muuyq ưưk pok puut e 'ngưưng hlaa xing kơn xangưưi, Kadraq truh, leh kheoq Kadraq hnoq axek hloq e plaay leq tol ưưk be. Đơu tuôôy heq truh aduq ưưk nưq, Kadraq be hloq e kajoq vơơ hlaa, vii koq aalq laa xiêk pok puut.",
  "14": "Xôq hlê varơuq neq, Kadraq xanoh dii ưưk nưq: \"Hnoq paq e đnoyq măn ekơyq xa plaay xing aduq maay đnoyq.\" Khơl xatyauq Kadraq  tameen apok nưq.",
  "15": "Tuôôy hooy truh Jê-ru-sa-leem, ji muut đom hnhư hơu, Kadraq xarôôp đuôôy adro tek manih root đom hnhư hơu vlôh pi gôk, Kadraq vlơq kahlôp para ku khơl adro tađôôi jêêt ji ragê ku khơl adro tek xêêp katrơu.",
  "16": "Kadraq leh ăm pheep paq kê kơyq xagook  \nkaluh đôô dalơh hlê hnhư hơu.",
  "17": "Yôôych Kadraq pato oot ji đnooy: \"Be aalq e apok vlơk đaneq: 'Hnhư gô hnoq jah taayh laa  hnhư xadrook apôôy ka tôôy tamooi' ih? Bơh khơl êêp heq dơơp ni jêêk kôôp tapuu ku khơl vroh.\"",
  "18": "Khơl thơy tơk tưp kôt ji thơy pato ganuun tameen luneq, yôôych oot axek trôôk đơu oot hnoq ik păk kaxêêt Kadraq, vii oot yôq Kadraq, xing ka manih karôôp raay tưng hưưng truh varơuq pato daayq ku Kadraq.",
  "19": "Truh tuôôy rayôôp klôôy, oot chuh klơlh theng.",
  "20": "Muut kaa xroq, đong tuôôy hooy dalơh hlê, oot hloq ưưk pok puut heq kateh 'yauq xing  ưưk rayaah.",
  "21": "Atêq tuôôy văch hlê, Phi-e-rơ tơơl dii Kadraq: \"Ra-bi, 'yo hơq! Ưưk pok puut đơu thơy karoay heq kateh 'yauq yôôych.\"",
  "22": "Tuôôy tơơl hlê, Lôôk Jê-xu đnooy dii oot: \"Dayh e xuum tuôq aduq Kơy Plêêk.",
  "23": "Dong dik, Thơy đnooy dii oh ay, đaneq adro leq đnooy dii ngok đoot neq: 'Dayh vưyq tok ji weel pôôt tahlii,' đơu leh biit ravơq đom xuum haay, bơh tuuôq đaneq varơuq haay đnooy jeq xlih vlôh, yôôych varơuq hnoq jêêk ka adro nưq. ",
  "24": "Vii anưq, thơy đnooy dii oh ay, dêq hloay tôôy varơuq oh ay xadrook apôôy ji ratuuôt vôôch, dayh tuuôq đaneq oh ay heq nhonq jah, yôôych varơuq nưq hnoq jêêk ka oh ay. ",
  "25": "tuôôy oh ay dưk xadrook apôôy atoh oh ay e varơuq tachơơl dii akơyq nưq, yôôych dayh thaa ka'lăăk, xôq Vaq ku oh ay laa Kơy măn taal plêêk kung thaa ka‘lăăk oh ay truh kaluh lôôp kadrôp ku oh ay.\"  ",
  "26": "( Bơh atoh oh ay leh ka'lăăk, yôôych Vaq ku oh ay laa Kơy măn taal plêêk kung hnoq leh ka'lăăk kaluh lôôp kadrôp ku oh ay)",
  "27": "Yôôych oot wiih hooy truh Jê-ru-sa-leem ji Tuôôy Kadraq đong hooy đom hnhư hơu, khơl thơy dok dơơp kôt, khơl thơy pato ganuun, ji khơl kadraq lơơk truh kung Kadraq.",
  "28": "Oot đnooy dii Kadraq: \"Xing taay yaak leq đơu kơy dơơp kaluh varơuq nưq ji kơyq heq paloo ăm kơy taay yaak neq xôq kơy hnoq ik dơơp kaluh varơuq nưq?\"",
  "29": "Bơh Lôôk Jê-xu đnooy dii oot: \"Gô kung hnoq vôôch êêp kơy muuyq apok, ji dayh tơơl apok gô, yôôych gô hnoq đnooy ka êêp kơy xing taay yaak leq đơu gô dơơp kaluh varơuq nưq.",
  "30": "Pheep baap-teem ku Jăng laa xing plêêk long xing koot manih? Dayh tơơl apok gô.\"",
  "31": "Oot tajauq dii mamuuyq đaneq: \"Haay duh tơơl đaji đaleq? Atoh haay đnooy: 'Xing plêêk, dro neq hnoq đnooy: 'Atoh anưq, vii aleq êêp kơy leh tuuôq Jăng?",
  "32": "Wiit hlê, atoh haay đnooy: Xing koot manih, ...?\" ( Bing oot yôq manih karôôp, vii kơyq kơyq kung 'yo đaneq Jăng dong dik laa muuyq kơy hlit.",
  "33": "Lunưq tuôôy tơơl apok Lôôk Jê-xu, oot tơơl: \"Wot leh xet.\" Lôôk Jê-xu đnooy dii oot: \"Gô kung leh đnooy dii êêp kơy xiing taay yaak leq đơu gô dơơp kaluh varơuq nưq.\""
}