cor_2020_cua_clt_mrk_book/mrk/10.json

{
  "1": "Atêq tuôôy dưk tok, Kadraq hooy xing aduq nưq truh dêh Ju-đê ji dêh vari pii hơq daak Jô-đaanh, yôôych manih karôôp gruk mamuuyq truh dii Kadraq yưưk traa. Kadraq laay pato daayq oot đaji Kadraq măn 'ngưưng dơơp.",
  "2": "Tuôôy khơl adro Pha-ri-si truh jeq, oot vôôch Kadraq đaneq ganuun e ăm pheep muuyq adro kanơu ka‘lăăk kadrê long leh, xôq thưưh Kadraq.",
  "3": "Bơh, xôq tơơl hlê, Kadraq đnooy dii oot đaneq: \"Môôi-se heq pato daayq êêp kơy varơuq kajoq?\"",
  "4": "Oot đnooy: \"Môôi-see ăm pheep adro kanơu vlơk hlaa jơyq ka‘lăăk kadrê yôôych xôq kadrê vlôh hooy.\"",
  "5": "Bơh Lôôk Jê-xu đnooy dii oot: \"Vii varơuq găk xuum ku êêp kơy, kơy đơơu vlơk vlôh varơuq ganuun nưq ka êêp kơy.",
  "6": "Mot kadrơơy, xing katuôôy kapa teep ku varơuq panưk pajêêk,' Kadraq heq panưk jêêk oot, muuyq kanơu ji muuyq kadrê.'",
  "7": "Bơyh kơq nưq, adro khơl kanơu hnoq vlôh klơlh miq ji vaq ni,",
  "8": "ji vaar dro hnoq jah jêêk muuyq hlek.' Lunưq, baar leh măn laa vaar đơu laa muuyq hlek.  ",
  "9": "Kơq nưq, varơuq kajoq đơu Kơy Plêêk heq tabich hlê, yôôych koot manih te aklah vlôh.\"",
  "10": "Tuôôy măn đom hnhư, khơl khơl xatyauq laay vôôch Kadraq truh varơuq neq.",
  "11": "Kadraq đnooy dii oot: \"Adro leq ka‘lăăk kadrê ni ji pajêêk muuyq adro kadrơơy, yôôych adro nưq lôôp kadrôp tuuk taak đôôiq dii adro kadrê. ",
  "12": "Ji atoh adro khơl drê, tuôôy heq ka‘lăăk kanơu ni, xok adro kadrơơy, yôôych mư lôôp kadrôp tuup taak.\"\n",
  "13": "Khơl drơơy xagook truh ka Kadraq khơl oh de xôq Kadraq hnoq ik xôq tii tol oot, bơh khơl xatyauq đnooy toah oot.",
  "14": "Lunưq, tuôôy nhonq hloq varơuq nưq, Lôôk Jê-xu jaraq ji đnooy dii oot:\" Dayh xôq kaluh oon oh truh dii thơy, ji te klơl đơơ oot, vii daak plêêk ku Kơy Plêêk thuôk xuq khơl leq dang đaji oot.",
  "15": "Dong dik, thơy đnooy dii oh ay, ado leq leh tiip nhonq daak plêêk ku Kơy Plêêk đaji muuyq oon oh, yôôych ado nưq kajưk dik leh jah muut đom nưq.\" ",
  "16": "Atêq tuôôy khuôôk khơl oh de đom tii kadraq, xôq tii tol oot, Kadraq kahniq vanong.",
  "17": "Tuôôy Kadraq xarôôp dưk hooy, muuyq dro hơq chrơơk truh, ji atêq tuôôy kuul pôôt kangưưl Kadraq, adro nưq vôôch Kadraq: \"Kuh Thơy Xuum Kaxaay, gô duh dơơp kajoq xôq gô hnoq ik jah varơuq riilh đơơy đơơy?\"",
  "18": "Bơh Lôôk Jê-xu đnooy dii ay: \"Aleq ay taayh gô laa xuum kaxaay? Be ekơyq xuum kaxaay đêh vlôh muuyq dro Kơy Plêêk.",
  "19": "Ay heq xet kaluh ganeen:\" te păk kaxêêt manih, te tuup taak, te atôôk, te dơơp xanưk pa ôôh, te hlơk aluut, pheq 'yo vado vaq ji miq haay'.\"",
  "20": "Bơh ay nưq đnooy kung Kadraq: \"Kuh thơy, gô heq đong jưư tôôy varơuq nưq xing tuôôy măn de ku gô.\"",
  "21": "Bơh tuôôy 'yo ay, Lôôk Jê-xu xung xiaq ay, ji Kadraq dăt ay: \"Ay măn thiuq muuyq varơuq; dayh hooy, tek dêq tôôy thưưq ay e, ahlook ăm manih adrah, yôôych ay hnoq e kuah qwuiq măn tol plêêk, ji truh đneen ne, dayh tyauq gô.\"",
  "22": "Bơh maar mot wiih vlôh hluu rơu ka apok nưq, ay nưq jiq xuum ka'lăăk hooy, vii ay 'miêh đong e ‘ngưưng gruh anôp đang đik.",
  "23": "Atêq tuôôy 'yo rawiit gah, Lôôk Jê-xu đnooy dii khơl xatyauq kadraq: \"Dik pơơl xet dong leq \n đôôiq dii khơl adro e 'ngưưng gruh anôôp xôq ik muut đom daak dêh ku Kơy Plêêk!\"",
  "24": "Khơl xatyauq thier akêh truh kaluh apok ku Kadraq, bơh muuyq yưưt traa, tuôôy tơơl apok Lôôk Jê-xu đnooy dii oot đaneq:' Khơl koot lơơy, dik laa pơơl xet dang leq xôq muut đom daak dêh ku Kơy Plêêk!",
  "25": "Đôôiq dii ôô laak đaa chuun hlê trop jarưp, nưq laa varơuq klêq iaq soo dii adro kroh muut đom daak dêh ku Kơy Plêêk.\"",
  "26": "Yôôch oot thier raa xôôl dôôl, đnooy dii Kadraq:\" Anưq yôôych kơyq hnoq ik jah wơt?\"",
  "27": " ‘Yo muut oot, Lôôk Jê-xu đnooy: \"Varơuq dơơp leh ik dii koot manih, bơh be aalq dii Kơy Plêêk. Vii dii Kơy Plêêk, tôôy varơuq raay hnoq ik.\"",
  "28": "Phi-e-rơ tok apok tơơl dii Kadraq: \"Thơy 'yo nee, 'wot gô heq ka‘lăăk tôôy thưưq đơu tyauq  thơy.\"",
  "29": "Lôôk Jê-xu tơơl: \"Dong dik, thơy đnooy dii oh ay, be e adro leq ka'lăăk hnhư waah, ay oh, oh ay, vaq miq, koot xau, vari hluôôt vii kơq thơy ji Hêêr Kaxaay,",
  "30": "đơu leh nhonq jah gôôp hreek yưưk juneq đom katuôôy đơơy neq: truh hnhư wah, ay oh, oh ay, miq, koot, vari ruônq kung dii varơuq rôôp toop, ji varơuq riilh đơơy đơơy đom katuôôy đơơy têq neq.",
  "31": "Bơh ‘ngưưng dro adroyq hnoq wiih vlôh atêq, ji adro atêq hnoq tok adroyq.\"",
  "32": "Tuôôy nưq, oot đong tol trôôk hooy tok truh Jê-ru-sa-leem, ji Lôôk Jê-xu đong hooy adroyq oot. Oot biq akêh, măn khơl adro hooy tyauq atêq yôôych yôq vraal. Atêq tuôôy jarooy kưưl vaar dro jah rơơlh đêh vlôh, Kadraq laay xarôôp đnooy dii oot truh kaluh varơuq jeq xlih truh ka Kadraq,",
  "33": " đaneq: \" 'Yo nee, haay đong hooy tok truh Jê-ru-sa-leem, ji Koot Manih hnoq biq rôôp atăq ka khơl thơy dok dơơp kôt ji khơl thơy pato ganuun, yôôych oot hnoq rôôp xadrah păk kaxêêt Kadraq ji pahnăăp Kadraq ka tamooi kadrơơy.",
  "34": "Oot hnoq đnooy ra ơơh Kadraq, khook kaxôôh Kadraq, tier dook Kadraq, ji păk kaxêêt Kadraq, bơh atêq pee hngơy Kadraq hnoq riilh hlê.\"",
  "35": "Ja-kơ ji Jăng, vaar koot kanơu ku Xê-bê-đê, truh tavơh Kadraq, đnooy dii Kadraq: \"Kuh thơy, ‘wot ưng trôôch đaneq long varơuq kajoq 'wot apôôy vôôch thơy, thơy hnoq dơơp ka 'wot .\"",
  "36": "Yôôych Kadraq đnooy kung oot: \" Oh ay xung thơy dơơp kajoq ka oh ay?\"",
  "37": "Nưq laa baar tơơl dii Kadraq: \"xiin bu xôq 'wot aleq ka 'wot hnoq ik 'ngôôy đom aduq tađnah tađnaak ku thơy, muuyq adro pii akoh thơy ji muuyq adro pii akeng thơy.\"",
  "38": "Bơh Lôôk Jê-xu dăt baar: \"Oh ay be xet baar đong vôôch varơuq kajoq. Oh ay hnoq ik hôôch dooy đơu thơy hôôch, long chiuq bap-teem đaji pheep baap-teem đơu thơy chiuq be?\"",
  "39": "Oot tơơl dii Kadraq: \"Wot hnoq ik.\" Yôôych Lôôk Jê-xu đnooy dii oot: \"Dooy đơu thơy hôôch, oh ay hnoq hôôch, ji pheep baap-teem đơu thơy chiuq, oh ay hnoq chiuq. ",
  "40": "Bơh xôq ‘ngôôy pii akoh long pii akeng ku thơy yôôych leh jo thơy ralauq xôq, bơh jeen ka adro heq jah ralauq xôq ‘miêh.\"  ",
  "41": "Tuôôy tameen varơuq neq, kưưl dro jah rơơlh hơq tôq jaraq dii Ja-kơ ji Jăng.",
  "42": " Atêt tuôôy taayh oot truh, Lôôk Jê-xu đnooy dii oot: \"Oh ay xet đaneq khơl adro jah vanê  dưk xanok kaluh tamooi kadrơơy yôôych rôôp ahneen manih karôôp, ji khơl adro e chưk varơuq ku oot yôôch xok dơơp qwuyên dơơp ahneen ahneek khơl drơơy.",
  "43": "Bơh kaluh varơuq leh aalq laa đanưq đom katuul oh ay. Wiih hlê, adro leq xung jah vlôh kôt katuul oh ay hnoq pheq laa adro hơu varơuq ku oh ay,",
  "44": "Ji adro leq xung laa akoq đom khơl oh ay hnoq pheq laa xapok ka tôôy dro,",
  "45": "Vii Koot Manih pheq đnooy heq leh truh xôq jah hơu varơuq, bơh laa xôq hơu varơuq ji pahnăăp xăk riilh kadraq dơơp jaq blaa thaay ka 'ngưưng dro.\"",
  "46": "Oot hooy muut theng Jê-ri-kô. ji đom tuôôy Kadraq đong chuh hooy xing  Jê-ri-kô kung khơl xatyauq kadraq ji bing manih karôôp, yôôych Ba-ti-mêê, koot kanơu ku Ti-mêê, laa muuyq adro vôôch xa apuul đong 'ngôôy gah trôôk.",
  "47": "Tuôôy tameen xet đaneq nưq laa Lôôk Jê-xu manih Na-xa-reet, ay xarôôp vreoq kôt ji đnooy: \"Ôôi Jê-xu, Koot vuua Đa-vik, xiin biit angơuq gô!\"",
  "48": "‘Ngưng dro đnooy năăp ay neq xôq ay hnheep hlê, bơh ay vreoq thier kôt iaq đnoyq:\" Koot vuua Đa-vik, xiin biit angơuq gô!\"",
  "49": "Atêq tuôôy dưk tawaak, Lôôk Jê-xu đnooy: \"Dayh taayh ay nưq.\" oot taayh dro apuul nưq,   dăt ay: \"Dayh ien xuum! Dưk tok yơu! Thơy đong taayh ay.\"",
  "50": "Yôôych tuôôy qwel aau koot keek ni hlê muuyq panưh, dưk kah tok, ay truh kung Lôôk Jê-xu.",
  "51": "Tơơl hlê dii ay, Lôôk Jê-xu đnooy:' Ay trôôch gô dơơp kajoq ka ay?\" Anưq laa adro apuul tơơl kung Kadraq:\" Ra-bi, nưq laa gô hnoq ik 'yo hloq.\"",
  "52": "Nưq laa Lôôk Jê-xu đnooy dii ay: \"Dayh hooy. Xuum tuuôq ku ay heq payơh ka ay. \"Jơnưq, ay 'yo hloq ik yôôych ay hooy tyauq Kadraq tol trôôk.",
  "53": "manih apuul jah tađnah mot hloay, ji hooy tyauq Lôôk Jê-sus tol trôôk."
}