cor_2020_cua_clt_luk_book/luk/9.json

{
  "1": "Atêq tuôôy taayh kưl vaarq adro jah rơơlh anguk hlê, Kadraq kahniq ka oot da uh, ji taay yaak yơơt iaq dêq hloay kaluh kamuuych ji xôq pa yơh jiq jiêh,",
  "2": "yôôch Kadraq patăk oot vlôh hooy xôq padoh taboon truh daak Kơy Plêêk ji xôq payơh manih jiq jiêh.",
  "3": "Kadraq đnooy dii oot: \"Te xok tyauq kajoq ka trôôk hooy - long gaay, long droong, long tôôp, long baak jêêt - kungh te xagook tyauq vaar poop auu.",
  "4": "Oh ay muut đom hnhư leq, dayh măn aduq đnư ji dayh xing nư vlôh hooy.",
  "5": "Đom varơuq aduq leq đơu oot be kawooyh oh ay, yôôych tuôôy vlôh klơlh theng nưq, dayh tapolh thuul klơlh jôôk oh ay đaji apok xnưk tachơơl hlê kung oot.\"",
  "6": "Nưq laa tuôôy hooy ma trôôk, khơl jah rơơlh hooy dalơh kaluh plơy pla, padoh taboon hêêl kaxaay ji payơh jiq jiêh 'ngưưng aduq.",
  "7": "Tuôôy vuua dưk xnưk Hê-rôk tek truh kaluh varơuq đong xlih vlôh, kơy nưq thier xôôl dôôl, vii apok taleq adro đnooy đaneq Jăng heq xing aduq kaxêêt riilh hlê,",
  "8": "Bơh muuyq sôôq yôôych đnooy đaneq Ê-li heq rama vlôh, măn sôôq kadrơy đnooy đaneq muuyq đom khơl kơy hlit tuôôy hnu heq riilh hlê.",
  "9": "Bơh Hê-rôk đnooy: \"Gô heq dool akoq Jăng yôôch, măn adro neq laa akơyq đơu gô tek kaluh varơuq đanưq truh ni?\" Yôôych kơy nưq axek trôôk tavơh Kadraq.",
  "10": "Tuôôy khơl jah rơơlh heq wiit xuq, oot taboon hlê ka Kadraq xet kaluh varơuq oot heq dơơp. Ji atêq tuôôy jarooy oot kung hooy, Kadraq wiit xuq kadih muuyq theng jah taayh laa Bêt-sai-đa.",
  "11": "Bơh tuôôy biin manih karôp tek xet ik, yôôych oot hooy tyauq Kadraq. Kadraq kawooyh đonq oot, padoh vlôh ka oot truh daak Kơy Plêêk, ji Kadraq paxêêt yơh khơl adro duh jah paxêêt yơh.",
  "12": "Hngơy jeq yôôp klôôy, jơneq, tuôôy kưl vaar dro jah rơơlh hooy truh, oot tơơl dii Kadraq: \"Xiin thơy ăm manih karôp xuq xôq tuôôy hooy muut đom kaluh plơy pla ji ma dêh gah gih đnen, oot hno ik axek aduq măn ji tuôông xa, vii măn đnen, haay đong măn katuul muuyq aduq wăng we.\"\n\n\n",
  "13": "Bơh Kadraq đnooy dii oot: \"Oh ay dayh ăm oot xa. \"bơh oot tơơl: \" 'Be e thưq kajoq aduq wot 'ngưưng iaq dăp poop tôôp ji vaarq poop kaa - atoh 'wot hooy root tuôông xa ka taneen manih karôp neq.\"",
  "14": "( Vii e kơơh dăp ravơu dro khơl kanơu.) Kadraq  đnooy dii khơl xatyauq kadraq: \"Dayh dach oot ‘ngôôy pôôt xôq xa tyauq tong riek, kơơh dăp kưl dro.\"",
  "15": "Oot dơơp tyauq đanưq, ka dêq manih karôp ‘ngôôy pôôt xôq xa.",
  "16": "Atêq tuôôy xok dăp poop tôôp ji vaar poop kaa, ‘ngơơk mot tok kon plêêk, Kadraq kuh kway truh tuôông xa nưq, yôôch plelh vlôh, palo ka khơl xatyauq xôq hooy ahlook ka manih karôp.",
  "17": "Dêq hloay kung xa phiq phơh, ji kaluh kajoq măn rah jah atôôt hlê ka oot laa kưl vaar vuk tôôp taplelh.",
  "18": "Varơuq xlih vlôh đom tuôôy Kadraq đong apôôy đêh, khơl xatyauq heq hooy raa dii Kadraq, yôôych Kadraq vôôch oot đaneq: \"Manih karôp đnooy thơy laa akơyq?\"",
  "19": "Tuôôy tơơl, oot đnooy: \"Laa Jăng Bap-tik, măn sôôq kadrơơy đnooy thơy laa Ê-lii, bơh sôôq kadrơơy đnooyq đnooy thơy laa muuyq đom khơl kơy hlit tuôôy hnu riilh hlê.\"",
  "20": "Yôôch Kadraq vôôch oot đnooyq: \"Măn oh ay đnooy thơy laa akơyq?\" Jơnưq, tuôôy Phi-e-rơơ tơơl, kơy đnooy: Thơy laa Lôôk Wơơt Dêh ku Kơy Plêêk.\" ",
  "21": "Bơh xôq kơmq oot, Kadraq patăk dach be ik taboon varơuq neq dii akơyq,",
  "22": "tuôôy đnooy đaneq: \"Koot Manih phayh chiuq ‘ngưưng pơơl daal, biq khơl draq, khơl thơy tơơk tưp kôt, ji khơl thơy pato gnuun ka'lăk vlôh, yôôch hno biq păk kaxêêt, ji truh hngơy thưq pee hno riilh hlê.\"",
  "23": "Yôôch Kadraq đnooy dii dêq hloay oot: \"Atoh akơyq xung hooy tyauq thơy yôôych phayh ka'lăk xăk, tôôy hngơy hlôôy gaay chrăk ni ji tyauq thơy.",
  "24": "Vii atoh kơyq xung wơơt varơuq riilh ni yôôych adro nưq hno hlơơp ni, măn atoh kơyq vii thơy chiuq hlơơp varơuq riilh ku ni, yôôych dro nưq hno wơơt jah ni. ",
  "25": "Vii muuyq adro jah iich kajoq, tuôôy e dêq dêh araak, bơh laay păk kaxêêt kadih long dơơp hlơp kadih ni?",
  "26": "Vii atoh kơyq kamưưl truh thơy ji apok ku thơy, yôôych Koot Manih hno kamưưl truh manih nưq tuôôy Kadraq truh đom tađnah tađnaak ku Kadraq, kung ku Vaq ji ku khơl kơy yaak hlăng vah.",
  "27": "Bơh dong dik, thơy đnooy dii oh ay, e toleq dro đom khơl manih đong dưk đnen, laa khơl manih kajưk dik hno leh nhemq varơuq kaxêêt dong truh tuôôy oot  hloq daak Kơy Plêêk.\"",
  "28": "Varơuq xlih vlôh kơơh thơơm hngơy atêq kaluh apok nưq, tuôôy jarooy tyauq Phi-e-rơơ kung Jăng ji Ja-kơ, Kadraq hooy tok tol đoot xôq apôôy.",
  "29": "Varơuq xlih vlôh tuôôy Kadraq đong apôôy, nưq laa kaphook ku mot Kadraq vlôh đêh, ji kwuan aau ku Kadraq jêêk vlôh koo tađnah tađnaak.",
  "30": "Ji hơơq, vaar adro đong athêêt kung Kadraq, nưq laa Môi-see ji Ê-lii,",
  "31": "đơu oot jah rama vlôh đom tađnah tađnaak, đong đnooy truh varơuq kaxêêt ku Kadraq, laa varơuq Kadraq jeq dơơp ka jêêk yuôôl aduq Jê-ru-sa-lem.",
  "32": "Phi-e-rơơ ji khơl adro kung dii kơy heq đong thier lakôôp vik, bơh tuôôy kadrach kah, oot hloq tađnah tađnaak ku Kadraq ji vaar adro đong dưk dii Kadraq. ",
  "33": "Varơuq xlih vlôh tuôôy vaar adro kơy nưq hooy vlôh klơlh Kadraq, Phi-e-rơơ tơơl dii Lôôk Jê-xu: \"Thơy lơơy, dik laa toolh ka haay xôq măn đnen, 'wot hno ik panưk pe poop pơơ, muuyq poop ka thơy, muuyq ka Môi-see ji muuyq ka Ê-lii.\" ( Kơy be xet đong đnooy varơuq kajoq).",
  "34": "Bơh tuôôy kơy đong đnooy đanưq, muuyq đum kluk rama vlôh ji kluum oot; oot varaar hwaal tuôôy oot muut pi 'lăp đum kluk. ",
  "35": "Yôôch xing đom kluk ahna vlôh apok xnoh, đaneq: \"Neq laa Koot Gô, laa Manih heq jah rơơlh. Dayh tameen Kadraq.\"",
  "36": "Tuôôy apok nưq vơơ dêq yôôych vơ măn hlê muuyq adro Lôôk Jê-xu. Oot raay hnhep, ji be e kơyq taboon truh kaluh varơuq kajoq đơu oot heq hloq đom kaluh hngơy nưq. ",
  "37": "Varơuq xlih vlôh đom hngơy atêq, tuôôy oot xing tol đoot pôôt, muuyq biin manih karôp truh tavơh Kadraq.",
  "38": "Ji 'yo hơơq, muuyq adro xing manih karôp taayh kalh đaneq: \"Thơy lơơy, xiin thơy 'yo arơơk truh koot kanơu gô, vii ni laa koot kanơu muuyq ku gô.",
  "39": "'yo neq, muuyq gluxi rôp jư oh de ji oh de long ragơy ook tarok, yôôch ni pangưưlh oh de kojưk kung ji vlôh daak kamuh.Ni dang đaji leh vlôh klơlh oh de, kưq dơơp raơơh oh de biq xưưr xôh.",
  "40": "Gô heq gmưh khơl xatyauq ku thơy dơơp aleq ka oot drưyh ni vlôh, bơh oot be dơơp ik.\"",
  "41": "Tuôôy tơơl, Lôôk Jê-xu đnooy: \" 'wơơy muuyq adrơơk be tuôq ji tachơơl, gô hno măn dii êêp ji chiuq uônq êêp ka truh dong leq? Dayh jarooy koot kanau ay truh đnen.\"",
  "42": "Vơơ tuôôy oh de truh, kamuuych xơuq rapot kalh ôn pôôt vari ji khiênq ni vlôh đơơt kamaalh. Bơh Lôôk Jê-xu toah kamuuych xơuq ji paxêêt yơh oh nưq, yôôch Kadraq pahnap ôn hlê ka vaq ni.",
  "43": "Dêq hloay raay biq dơơp akêh adrooyq taay yaak tađnah tađnaak ku Kơy Plêêk. Bơh đom tuôôy manih oot đong măn akêh ka tôôy varơuq Kadraq dơơp, yôôych Kadraq đnooy dii khơl jah rơơlh Kadraq:",
  "44": "\"Oh ay dayh xôq kaluh apok neq muut tôôr oh ay: Vii Koot Manih jeq biq rôp ataq muut đom ti khơl drơơy.\" ",
  "45": "Bơh, oot be hlolh apok nưq ji varơuq neq heq đong biq kađoq hlơp đôôyq dii oot, vii anưq oot be hlolh ik ni, oot laay yôq leh hôôk vôôch dii Kadraq truh apok nưq.",
  "46": "Atêq nưq, đom katuul oot vlôh varơuq tagêh xôq 'yo adro leq đom sôôq oot laa kôt yưk. ",
  "47": "Bơh vii Lôôk Jê-xu xet varơuq biit đom xuum oot, yôôych atêq tuôôy jarooy hlê muuyq oh de, Kadraq xôq oh de nưq pi gah Kadraq,",
  "48": "ji đnooy dii oot: \"Atoh akơyq taayh yal thơy tiip nhonq oh de neq, yôôych adro nưq tiip nhonq thơy, ji atoh akơyq tiip nhonq thơy, yôôych adro nưq tiip nhonq Kơy heq patăk thơy. Vii adro leq laa de yưk đom dêq hloay oh ay, yôôych adro nưq laa kôt dik.\"",
  "49": "Tuôôy Jăng tơơl apok, kơy đnooy: \"Kuh thơy, 'wot hloq e manih xok yal thơy drưyh kamuuych ji 'wot heq klol manih nưq hlê, vii manih nưq be kung hooy achuung dii haay.\"",
  "50": "Bơh Lôôk Jê-xu đnooy dii kơy: \"Te klol hlê, vii adro leq be aalq laa tachơơl hlê dii oh ay yôôych dưk xuq pi oh ay.\"",
  "51": "Varơuq xlih vlôh laa tuôôy hngơy varơuq xagook tok plêêk ku Kadraq đong jeq truh, yôôych Kadraq heq đinq xôq hooy truh theng Jê-ru-sa-lem.",
  "52": "Kadraq patăk khơl xpok hooy adrooyq kangưưr Kadraq, ji tuôôy hooy, oot muut đom muuyq plơy ku manih Sa-ma-rii xôq ralauq ka Kadraq.",
  "53": "Oot leh tiip nhonq Kadraq vii ngưưr ku Kadraq laa đong hooy truh Jê-ru-sa-lem.",
  "54": "Khơl jah rơơlh laa Ja-kơ ji Jăng, tuôôy hloq đanưq, oot tơơl: \"Kuh Lôôk, Kadraq e xung ‘wot koot patăk ka ôôlh xing plêêk pôôt vuh jaq oot be?\"",
  "55": "Bơh atêq tuôôy wih hlê, Kadraq toah ka baalq,",
  "56": "yôôch oot hooy hlê kon plơy kadrơơy.",
  "57": "Tuôôy oot đong hooy tol trôôk, muuyq adro hơơq tơơl dii Kadraq: \"Gô hno tyauq thơy dêq hloay aduq leq thơy hooy.\"",
  "58": "Lôôk Jê-xu đnooy kung ay nưq: \"Xo karak e trop ji xêêp gôk e tapu, bơh Koot Manih be e aduq angôôlh akoq.\"",
  "59": "Kadraq đnooy dii muuyq adro kadrơơy: \"Dayh tyauq thơy.\" Bơh adro nưq tơơl: \"Kuh Lôôk, xiin ăm gô hooy xuq xôq up vaq gô adrooyq.\"",
  "60": "Bơh Kadraq đnooy dii ay nưq: \"Dayh xôq khơl manih kaxêêt up khơl manih kaxêêt ku oot. Măn tuôôy ay hooy vlôh, dayh padoh taboon daak ku Kơy Plêêk.\"",
  "61": "Nưq yôôch, muuyq adro kadrơơy đnooyq đnooy: \" Kuh Lôôk, gô hno tyauq Kadraq, bơh adrooyq dêq xiin ăm pheep gô xuq patek khơl manih đom hnhư gô.\"",
  "62": "Bơh, Lôôk Jê-xu tơơl: \"Be e akơyq, tuôôy heq palo ti ni muut gaay akay đơu măn wih hlê kon atêq, laa taxưnq ka daak ku Kơy Plêêk.\""
}