cor_2020_cua_clt_luk_book/luk/8.json

{
  "1": "Varơuq xlih vlôh đom kawat hloay atêq nưq, Kadraq măn kưq dưk tok hooy dalơh theng neq, plơy pla hơơq, pato dayq kungh đaji padoh taboon hêêl kaxaay truh daak dêh ku Kơy Plêêk, ji kưl vaarq adro jah rơơlh kung hooy dii Kadraq,",
  "2": "kung muuyq sôôq khơl kadrê hơơq laa khơl adro heq jah paxêêt yơh klơlh gluxi ji jiq jiêh: Ma-rii, manih jah taayh laa Ma-đơ-leen, đơu xing mư e pơh kamuuych xơuq heq vlôh klơlh;",
  "3": "Jan-nơ kadrê Chu-xaa, adro xakaq ‘yo hnhư ku Hê-rôt; Xu-xa-nơơ; ji 'ngưưng khơl kadrê kadrơơy; oot hơu varơuq khơl manih ku Kadraq bơơn kaluh jêêt baak oot e.",
  "4": "Tuôôy biin manih karôp anguk hlê xing kaluh theng hooy truh kung Lôôk Jê-xu, Kadraq xnoh pato bơơn muuyq atoh:",
  "5": "\"Muuyq adro paraay adrek hooy vlôh xôq paraay kaloong adrek ku ni, ji đom tuôôy ay nưq paraay, muuyq sôôq kaloong adrek klêh tol trôôk, biq joaq jalon 'laalq jôôk ji xêêp gôk xa dêq sôôq kaloong nưq.",
  "6": "Sôôq kaloong kadrơơy klêh tol phơu, vii anưq tuôôy vlok tok, sôôq nưq biq kateh ra'yauq, vii be e ka daak.",
  "7": "Sôôq kadrơơy đnooyq klêh muut đom\npôôp jaliê, yôôych tuôôy vlok tok, yôôych jaliê dơơp ka ni hach hwoal.",
  "8": "Ji muuyq sôôq kaloong kadrơơy klêh muut aduq vari dik, vii anưq tuôôy vlok tok, ni vlôh raak plaay gââp hrek yưk iaq. \"Atêq tuôôy đnooy pa'yôôch kaluh apok nưq, Kadraq đnooy kalh tok: \"Akơyq e tôôr xôq tameen, dayh tameen.\"",
  "9": "Atêq nưq, khơl xatyauq ku Kadraq vôôch Kadraq: \"Atoh nưq laa kajoq?\"",
  "10": "Kadraq tơơl: Oh ay heq jah kahniq vanong xôq xet hlolh kaluh varơuq kadook truh daak ku Kơy Plêêk, bơh dii khơl drơơy yôôych xok atoh, xôq tuôôy 'yo, oot leh hloq, ji tuôôy tameen, oot leh xet.'",
  "11": "Atoh nưq laa đaneq: Kaloong adrek laa apok ku Kơy plêêk.",
  "12": "Kaluh aduq tol trôôk laa khơl adro heq tameen, bơh atêq nưq kamuuych truh ji vroh xok apok nưq klơlh xuum oot dơơp ka oot leh tuôq xôq jah wơơt.",
  "13": "Kaluh aduq tol phơu pato truh khơl adro tuôôy oot heq tameen, yôôych dii varơuq hlah hlaak, oot nhonq xok apok nưq. Bơh oot be e rayieh, 'ngưq laa khơl adro vơ tuôq muuyq kawah heq, ji đom tuôôy pơơl hwơơl, yôôych oot ka'lăk.",
  "14": "Măn truh muuyq sôôq kaloong heq klêh đom katuul kaluh pôôp jaliê, yôôych aduq neq laa khơl adro heq tameen, yôôch tuôôy riilh ađnooyq đom đơơy oot, oot biq dơơp ka hach hwoal xing kaluh xôôl dôôl, varơuq karoh e ji varơuq xa agưt đơơy neq, ji oot be kôt tok ik. ",
  "15": "Bơh truh phoon kloong adrek tol vari dik, neq laa khơl adro dii xuum klaak dong dik ji kaxaay, atêq tuôôy tameen apok nưq yôôych oot jư kajưk xok ji vlôh raak plaay đom varơuq atuq xuum.",
  "16": "Atêq tuôôy ataak đeen, be e akơyq kahlôp ni hlê bơơn kapưk long xôq 'laalq chanưng. Tađôôy muut đnư, oot xôq ni tol jôôk đeen xôq khơl manih tawaak muut hno ik 'yo hloq tađnah.",
  "17": "Vii be e varơuq kajoq ik kadook đơu hno leh biq kahnoq vlôh, kungh be e varơuq paduu leq đơu kajưk dik leh biq tauq vlôh ji kahnoq vlôh ro raang. ",
  "18": "Vii anưq, dayh rơơych rol truh kach oh ay tameen, vii akơyq e hno jah ăm athêêp, măn akơyq be e, yôôych varơuq adro nưq biit ni e kungh hno biq xok hloay klơlh ni.\" ",
  "19": "Tuôôy nưq miq ji khơl ma oh Kadraq truh dii Kadraq, bơh oot be hno truh jeq Kadraq ik vii kơq karôp manih.",
  "20": "Yôôch, varơuq nưq jah tauq ka Kadraq: \"Miq thơy kung khơl ma oh ku thơy đong dưk pi gôk, xung tavơh Lôôk.\"",
  "21": "Bơh tuôôy tơơl hlê, Kadraq đnooy dii oot: \"Neq laa miq gô ji oh ay gô, laa khơl adro tameen ji dơơp tyauq apok Kơy Plêêk.\"",
  "22": "Varơuq xlih vlôh muut muuyq hngơy hơơq, Kadraq kung dii khơl xatyauq ku kadraq tawaak tok muuyq poop gee, ji Kadraq đnooy dii oot: \"Haay duh phayh hooy hlê gah hlôôk daak pi hơơq. \"Yôôch oot tok gee hooy.",
  "23": "Đom tuôôy oot awayh gee yôôych Kadraq vik. Kaplah nưq, muuyq đơơt khiel xon xôy kalh ka puuh pôôt tol araak daak, oot biq daak muut viit glaay gee ji thier pơơl hwơơl.",
  "24": "Oot truh jeq anhơk Kadraq kah, đaneq: \"Thơy lơy! Thơy lơy! Haay jeq kaxêêt!\" Bơh tuôôy Kadraq kah, Kadraq toah khiel ji daak ka puuh, yôôych ni dưk hlê ji varơuq nưq jêêk vlôh ahnhep.",
  "25": "Kadraq đnooy dii oot: \"Xuum tuôq ku oh ay kaleq?\" Đom varơuq varaar yôq,  oot doong hưnh đnooy kung mamuuyq: \"Yôôch dik thơy laa akơyq đơu thơy vlôh tanơơn ka kaah khiel dii daak, ji ni phayh tameen tyauq thơy?\" ",
  "26": "Yôôch oot awayh gee truh dêh Jê-ra-sê, laa aduq măn hyioh dii dêh Ga-li-lêê.",
  "27": "Tuôôy Kadraq tawaak tok gah daak, muuyq adro hơơq thuôôk theng nưq hooy vlôh akaq Kadraq, adro nưq biq kamuuych nhôôp. Heq muuyq kawat xiik, ay nưq leh hlưp kwuân aau, kungh be măn đom ma hnhư, bơh măn aduq kalo xanưưng.",
  "28": "Tuôôy 'yo hloq Lôôk Jê-xu, ay nưq aloo tok, kuul pôôt kangưưr Kadraq ji đnooy kalh xarooy: \"Kuh, Jê-xu, Koot Kơy Plêêk Thier Yơơt, gô dii Kadraq e apiq kajoq? gô apôôy vôôch Kadraq, xiin te dơơp ra ơh gô.\"",
  "29": "Vii Kadraq heq vlôh tanơơn ka kamuuych klơơl 'yêq hooy vlôh klơlh manih kanau nưq. Vii 'ngưưng yưk ni nhôôp muut ay, măn ay heq hmưq biq vek hlê bơơn talơy looy tooy ji gaay kaal, long ju biq jư 'yo, yôôych xing kamuuych, đom tuôôy parach kloh gaay kaal, ay nưq biq jarooy muut aduq wăng we. ",
  "30": "Jơneq, Lôôk Jê-xu vôôch ni: \"Anơng may laa kajoq?\" Ni tơơl: \"Kuun Karôp,\" vii e ‘ngưưng kamuuych heq nhôôp muut ay nưq.",
  "31": "Yôôch oot kưq apôôy vôôch Kadraq xôq Kadraq te vlôh tanơơn ka oot phayh hooy pôôt bơk jaruq. ",
  "32": "Aduq nưq e muuyq bơơy xuur thier karôp đong xa tol ma adroaay doot, oot vôôch Kadraq xôq Kadraq ăm pheep oot nhôôp muut bơơy xuur. ji Kadraq ăm pheep oot.",
  "33": "Nưq laa, tuôôy heq vlôh klơlh khơl kanau, kaluh kamuuych nhôôp muut bơơy xuur, yôôch dêq bơơy kưq chrơơk tyauq bơk yơơt katruyh pôôt hlôôk daak ji biq kaxêêt karăp.",
  "34": "Atêq tuôôy khơl adro xakaq xuur 'yo hloq varơuq xlih vlôh, yôôych oot xadăk duu ji taboon hlê varơuq nưq đom theng kung ji đom ma dêh. ",
  "35": "Vii anưq, manih karôp ka ung truh xôq ‘yo varơuq heq xlih vlôh, oot truh aduq Lôôk jê-xu ji hloq manih kanau, đơu kaluh kamuuych heq  vlôh klơlh, đong ‘ngôôy aduq jôôk Lôôk jê-xu, jah hlưp kwuân aau, ji akoq ngook talăng jăk, yôôych oot biq varaar yôq.",
  "36": "Khơl adro heq 'yo hloq taboon hlê ka oot kach leq đơu manih biq kamuuych nhôôp heq jah wơơt yơh. ",
  "37": "Dêq karôp manih đom dêh Jê-ra-sêê xiin Kadraq vlôh klơlh oot, vii oot biq đơơt varaar yôq paq ik, vii anưq, Kadraq tawaak tok gee ji wiit xuq.",
  "38": "Adro kanơu, đơu bơơy kamuuych heq vlôh klơlh, apôôy vlôh Kadraq xôq măn kung Kadraq, bơh Kadraq ăm ay xuq, đnooy đaneq:",
  "39": "\"Dayh wiit xuq aduq hnhư ku ay ji dayh taboon hlê tôôy varơuq Kơy Plêêk heq dơơp ka ay.\" Yôôch ay dưk hooy padoh taboon loch dêq theng kaluh varơuq Lôôk Jê-xu heq dơơp ka ni.",
  "40": "Tuôôy Lôôk Jê-xu wiit xuq, muuyq biin manih karôp vlôh kaq Kadraq, vii tôôy manih raay đong takôô Kadraq.",
  "41": "Ji 'yo hơơq, muuyq adro tawaak truh, anơng ku kơy laa Jai-ru, kơy laa manih jư 'yo hnhư hơu. Kuu xăk pôôt aduq jôôk Lôôk Jê-xu, kơy apôôy vôôch Kadraq hooy truh hnhư kơy,",
  "42": "vii adro koot kadrê vơ muuyq đôôyq dii kơy, kơơh kưl vaar xanưm, oh nga đong jeq kaxêêt. Tuôôy Kadraq đong hooy tol trôôk, biin manih karôp hneen rawiit Kadraq.",
  "43": "E muuyq dro mo biq binq be drơơy heq kưl vaar xanưm, long heq tayuuh dêq baak jêêt ka thơy jarơu, đơu be e akơyq hno payơh ik binq ka mo.",
  "44": "Bơơn kach truh jeq xing piik katoor, mo avêq muut thơơl aau ku Kadraq, ji hloay jơnưq, binq be drơơy ku mo dưk hlê.",
  "45": "Lôôk jê-xu đnooy: Akơyq laa dro heq avêq muut gô?\" Bơh akơyq nưq raay leh chiuq nhonq, Phi-e-rơơ đơơu tơơl: Thơy lơơy, biin manih karôp đong măn rawiit ji hneen thơy.\"",
  "46": "Bơh Lôôk jê-xu đnooy: \"Muuyq akơyq nưq heq avêq muut thơy, vii thơy xet taay yaak xing thơy heq hooy vlôh.\"",
  "47": "Jơneq, tuôôy mo nhonq hloq đaneq mo heq be padu ik, yôôych mo padrau hooy truh ji atêq tuôôy kuu xăk pôôt kangưưr Kadraq, mo tauq vlôh adrooyq kangưưr dêq hloay manih karôp vii kakơq kajoq đơu mo heq avêq muut Kadraq ji mo heq jah payơh hloay jơnưq đaleq.",
  "48": "Kadraq đnooy dii mo: \"Koot kadrê lơơy, xuum tuôq ku koot heq pa yơh koot. Dayh hooy đom varơuq hrok hrool.\"",
  "49": "Tuôôy Kadraq đong măn đnooy, akơyq nưq xing hnhư ku manih dưk jư hnhư hơu truh tauq đaneq: \"Koot kadrê kơy heq kaxêêt. Te dơơp ngơyq thơy đnooyq.\"",
  "50": "Bơh tuôôy Lôôk jê-xu tameen apok nưq, Kadraq đnooy kung kơy: \"Te yôq, dayh e xuum tuôq heq yôôych oh nga hno jah wơơt.\"",
  "51": "Tuôôy heq hooy truh ma hnhư, Kadraq be ăm akơyq muut dii Kadraq, vơ ăm Phi-e-rơơ, Jăng, Ja-kơ, kung miq ji vaq ku oh de.",
  "52": "Dêq hloay đong nhiim ook ji xuum alaay ka oh de, bơh Kadraq đnooy: \"Te nhim, vii oh de kooq kaxêêt, đơu vơ đong măn vik.\"  ",
  "53": "Oot xagier Kadraq, vii xet đaneq oh de heq kaxêêt. ",
  "54": "Bơh atêq tuôôy adrơk ti oh de, Kadraq taayh kalh, đaneq: \"Oh nga lơơy, dayh kah yơu.\"",
  "55": "Phool hiel ku oh de wiit xuq hlê ji oh de hloay jơnưq kah ‘ngôôy, yôôch Kadraq dach ăm oh de xa.",
  "56": "Miq vaq oh de thier dơơp akêh, bơh Kadraq patăk dach oot be ik đnooy dii akơyq truh varơuq heq xlih vlôh."
}