cor_2020_cua_clt_luk_book/luk/7.json

{
  "1": "Atêq tuôôy Kadraq pa'yôôch kaluh apok ku kadraq kangưưr varơuq tameen ku manih karôp, Kadraq muut đom theng Ka-bê-na-um.",
  "2": "Jơneq, muuyq adro xapok hơơq ku thơy xnưk, đơu nưq laa adro thier xung xiaq đôôyq dii kơy, đong biq jiq nănq, jeq kaxêêt.",
  "3": "Atêq tuôôy tameen truh Lôôk Jê-xu, kơy patăk khơl kadraq Jo-thaiq truh kung Kadraq, apôôy vôôch Kadraq truh xôq Kadraq payơh xapok ku kơy.",
  "4": "Tuôôy khơl adro nưq truh dii Lôôk Jê-xu, oot dêq xuum apôôy vôôch Kadraq, tơơl đaneq: \"Kơy nưq yôôych xưnq đanq xôq thơy hno nhonq varơuq neq ka kơy,",
  "5": "Vii kơy xung xiaq tamooi haay, kơy kungh heq xơy hnhư hơu ka haay.\"",
  "6": "Nưq yôôch, Lôôk jê-xu hooy kung dii oot. Bơh tuôôy Kadraq heq măn kach aduq hnhư leh taleq, yôôych thơy dưk xnưk patăk taleq dro ‘wơơyq truh tơơl dii Kadraq: \"Kuh Lôôk, xiin te  dơơp pơơl kadih xăk, vii gô leh xưnq đanq xôq Kadraq truh đom ma hnhư gô.",
  "7": "Jơq vii anưq, gô tabơh kungh leh hloq gô xưnq đanq xôq truh tavơh Kadraq. Bơh, xiin Kadraq xnoh muuyq apok, yôôych xapok gô phayh jah payơh.",
  "8": "Vii gô kungh laa adro jah xôq măn 'laalq da-uh qwuyen, đơu e kuun 'laalq qwuyen ku gô, ji gô dach adro neq: hooy juu,' yôôych ni hooy; yôôch dii adro hơơq: Truh đnen,' yôôych ni truh; ji dii xapok gô: Dayh dơơp varơuq neq,' yôôych ni dơơp.\"",
  "9": "Tuôôy Lôôk Jê-xu tameen đanưq, Kadraq thier doong hưnh truh kơy nưq, yôôch wiih hlê manih karôp đong hooy tyauq kadraq, Kadraq đnooy: \"Gô đnooy dii oh ay, tabơh đom I-sơ-ra-êl, gô kungh kooq hmưq hloq xuum tuôq đanưq.\"",
  "10": "Tuôôy khơl adro jah patăk hooy xuq hlê truh hnhư, oot hloq dro xapok đong kalh paraat.",
  "11": "Varơuq xlih vlôh muut kahngơy atêq, Kadraq hooy muut muuyq theng jah taayh laa Na-iin, khơl xatyauq Kadraq ji karôp manih thier 'ngưưng đong kung hooy dii Kadraq.",
  "12": "Hloay tuôôy Kadraq jeq truh 'mok theng yôôych 'yo hơơq, manih oot đong xakôôk vlôh muuyq adro heq kaxêêt, laa koot kanơu muuyq ku miq ni ( mo laa mo vlơu), muuyq biin thier 'ngưưng manih karôp đom theng kung hooy dii mo.",
  "13": "Tuôôy 'yo hloq mo, Lôôk arơơk xuum manưưt angơuq deng ka mo, ji Kadraq đnooy dii mo: \"Te nhiim.\"",
  "14": "Hooy truh jeq, Kadraq avêq ti muut vook, yôôych khơl adro đong xakôôk dưk hlê. Yôôch Kadraq đnooy: \"Adro tadăp blaay, gô dach oon, dayh kah yơu.\"",
  "15": "Manih kaxêêt kah 'ngôôy ji xarôp athêêt, Yôôch Kadraq ăm hlê adro nưq ka miq ku ni.",
  "16": "Nưq laa, varơuq varaar yôq klum dêq hloay, oot ayuôôt laat Kơy Plêêk, đnooy đaneq: \"Muuyq kơy hlit kôt glơh heq jah dưk tok đom katuul haay\" ji đaneq: Kơy Plêêk heq truh hlơq tamooi Kadraq.\"",
  "17": "Hêêl neq axuq Kadraq ahna vlôh loch dêq dêh Ju-đê ji kaluh dêh gah gih. ",
  "18": "Khơl xatyauq ku Jăng taboon hlê ka kơy truh kaluh varơuq nưq. Ji atêq tuôôy ăm taayh vaarq adro xatyauq hơơq ku kơy, yôôych Jăng",
  "19": "patăk oot truh dii Lôôk, vôôch: \"Thơy laa Kơy phayh truh, long 'wot duh takôô Kơy kadrơơy?\"",
  "20": "Tuôôy truh dii Kadraq, khơl adro nưq tơơl: \"Jăng Bap-tik patăk 'wot truh dii Thơy, vôôch: 'Thơy laa Kơy phayh truh, long 'wot duh takôô Kơy kadrơơy?\"",
  "21": "Đom jơq wat nưq, Kadraq payơh ‘ngưưng manih klơlh jiq jiêh, jiq ra-ool ji khơl biq kamuuych nhôp, Kadraq kungh dơơp ‘ngưưng manih apuul jah 'yo hloq.",
  "22": "Xôq tơơl hlê, Kadraq đnooy dii oot: \"Atêq tuôôy wiit xuq, dayh taboon hlê ka Jăng kaluh kajoq khơl ay heq hloq ji tameen: manih apuul jah hloq, manih talêêt ik hooy, manih paruh jah xarêh, manih klơk tameeng ik, manih kaxêêt jah dơơp riilh hlê, manih adrah jah tameen hêêl kaxaay,",
  "23": "ji vanong ka adro leq be biq gưlh xatôôl vii gô.\"",
  "24": "Atêq đnooyq, atêq tuôôy khơl patăk ku Jăng hooy yôôch, Kadraq xarôp đnooy dii manih karôp truh Jăng: \"Oh ay hooy muut đom aduq wăng we xôq 'yo kajoq? Muuyq ưk kadeer biq khieer ahrưng ih?",
  "25": "Bơh, oh ay hooy vlôh xôq 'yo kajoq? Muuyq adro jah xa văk bơơn vaayh kaxaay tamaq ih? 'Yo hơơq, khơl adro đom kuôn aau kaxaay ji riilh karoh e yôôych măn đom hnhư vuua.",
  "26": "Bơh, oh ay hooy vlôh xôq 'yo kajoq? Muuyq kơy hlit ih? Jơq, gô đnooy dii oh ay, măn ieaq muuyq kơy hlit đnooyq.",
  "27": "Nưq laa axuq kơy đơu apok neq heq jah vlơk: Nee, Gô patăk xapok Gô hooy pi adrooyq kangưưr Koot, adro nưq hno deep trôôk ku Koot adrooyq kangưưr Koot.'",
  "28": "Gô đnooy ka oh ay xet, đom sôôq khơl adro jo khơl drê pa-iir vlôh, be e akơyq laa kôt ieaq Jăng, bơh adro de yưk đom daak Kơy Plêêk yôôych kôt ieaq kơy nưq.\"",
  "29": "( Tuôôy heq tameen, yôôych tôôy manih, kêê kaah khơl adro xok xơu, raay xưưng Kơy Plêêk laa hyioh jăk, tuôôy chiuq bap-teem tyauq pheep bap-teem ku Jăng.",
  "30": "Bơh khơl adro Pha-ri-sii ji khơl thơy pato ganuun heq ka'lăk iq đinq ku Kơy Plêêk deng ka oot, tuôôy leh chiuq kơy dơơp bap-teem.)",
  "31": "\"Nưq yôôych, gô hno atoh khơl manih đom đơơy neq dii kajoq ne? Oot daang đaji akơyq?",
  "32": "Oot daang đaji on oh 'ngôôy aduq tabôôt xa, kawoyh taayh mamuuyq, oot đnooy:'Wot klôp taliaq ka êêp đơu êêp leh kadâuq ayut. 'Wot kacheeu baai hlu đơu êêp leh nhim ook.'  ",
  "33": "Vii Jăng Bap-tik heq truh, be xa tôôp, kungh be hôôch lok, yôôych êêp kơy đnooy: 'Kơy nưq biq kamuuych nhôôp.'",
  "34": "Koot Manih heq truh, xa ji hôôch, yôôych êêp kơy đnooy: 'Yo hơơ, muuyq adro ha ak xa ji trôôch hôôch, khơl 'wơơyq ku khơl xok xơơu ji khơl e kadrôp!'",
  "35": "Bơh varơuq khôôt xet heq jah đnooy hyioh jăk gmưh dêq hloay kaluh varơuq dơơp ku ni.\"",
  "36": "Tuôôy nưq, muuyq đom sôôq khơl manih pha-ri-sii mơơy Kadraq xôq xa ka waal dii ni. Tuôôy heq muut đom hnhư manih Pha-ri-sii nưq, Kadraq ‘ngôôy aduq para xa.",
  "37": "'yo hơơq, e muuyq mư kadrê đom theng, đơu mư nưq laa adro e kadrôp. Tuôôy nhonq xet đaneq Kadraq đong 'ngôôy aduq para xa đom hnhư manih Pha-ri-sii, mư xagook tyauq muuyq kave ngok tađnưk jơu thơơm,",
  "38": "ji truh dưk piik katoor, jeq aduq jôôk Kadraq, đơu nhiim. Mư xarôp dơơp voq jôôk Kadraq bơơn daak mot, yôôch mư 'nhuôôt ni dii hlôôk tol akoq mư, hiip jôôk Kadraq ji paraa jơu thơơm tok. ",
  "39": "Tuôôy manih Pha-ri-sii, laa manih heq mơơy Kadraq, hloq đanưq, kơy nưq biit kadih, đaneq: \"Atoh kơy neq laa kơy hlit, yôôych kơy nưq dik phayh xet mư kadrê đơu đong avêq truh kơy laa akơyq ji thuôôk manih đaleq, đaneq mư nưq laa adro kadrôp maroh.\" ",
  "40": "Xôq tơơl hlê, Lôôk Jê-xu đnooy dii kơy: \"Si-môôn, gô e varơuq neq xôq đnooy dii kơy.\"Kơy nưq đnooy: \"Kuh thơy, dayh kưq đnooy!\"",
  "41": "\"E vaarq adro thiêuq lôôkq ku muuyq manih ăm vaay jêêt hơơq. Muuyq dro thiêuq dăp hreek Đơ-ni-ê, măn adro hơơq thiêuq dăp kưl.",
  "42": "Tuôôy baalq raay be e xôq bla, kôôch lôôkq heq ka‘lăk dêq ka baalq. Nưq yôôych, akơyq đom sôôq vaarq adro hno xung xiaq kơy nưq ieaq?\"",
  "43": "Tuôôy Si-môôn tơơl hlê apok, kơy đnooy: Gô dik biit đaneq adro đơu kôôch lôôkq heq ka‘lăk ‘ngưưng ieaq.\" Kadraq đnooy dii kơy: Kơy đnooy jơq dik.\"",
  "44": "Yôôch wiih hlê pi adro mư kadrê, Kadraq đnooy dii Si-môôn: \"Kơy hloq mư kadrê neq be? Gô muut đom hnhư ku kơy. Kơy be ăm gô daak 'nhaau jôôk, măn mư dơơp voq jôôk gô bơơn daak mot, yôôch 'nhuôôt ni dii hlôôk ku mư.",
  "45": "Kơy heq be ăm ka gô muuyq poop hiip leq, măn mư, xing tuôôy gô hooy muut, heq leh padơơy hiip jôôk gô.",
  "46": "Kơy be paraa jơu tol akoq gô, măn mư heq paraa jôôk gô dii jơu thơơm.",
  "47": "Vii kơq nưq, gô đnooy dii kơy, karôp maroh ku mư, ju 'ngưưng, heq jah ka'lăk dêq, vii mư xung xiaq 'ngưưng. măn akơyq jah ka'lăk axich yôôych xung xiaq axich.\"",
  "48": "Yôôch Kadraq đach mư nưq: \"Karôp maroh mư heq jah ka‘lăk.\"",
  "49": "Khơl adro đong ‘ngôôy aduq para xa xarôp tagêh talah đom katuul oot: \"Adro neq laa kơyq đơu kungh ka‘lăk kadrôp?\"",
  "50": "Yôôch Kadraq đnooy dii mư kadrê: \"Xuum tuôq ku mư heq wơơt mư. Dayh hooy đom langưưp paat.\""
}