cor_2020_cua_clt_luk_book/luk/6.json

{
  "1": "Varơuq xlih vlôh muut muuyq hngơy Sa-bat, Lôôk Jê-xu đong hooy dalơh kaluh manay vaa, ji khơl xatyauq Kadraq kađnek raak vaa, ranieaq tol ti, yôôch xa.",
  "2": "Bơh taleq dro Pha-ri-sii đnooy: \"Aleq khơl ay dơơp varơuq leh ik ăm pheep đom hngơy Sa-bat?\"",
  "3": "Tuôôy tơơl apok oot, Lôôk Jê-xu đnooy kung oot: \"Khơl kơy kooq hmưq đok truh varơuq đơu Đa-vik heq dơơp tuôôy vuua ji khơl adro măn kung vuua biq pangoot ih?",
  "4": "Đaleq vuua heq muut đom ma hnhư Kơy Plêêk, xok tôôp tơơk tưp, vuua xa ji ahlook ka khơl adro kung hooy dii vuua, đơu tôôp nưq leh ik pheep xa, vơ e đôôyq dii khơl thơy tơơk tưp hloh heq.\"",
  "5": "Yôôch Kadraq đnooy dii oot: \"Koot Manih laa Lôôk ku hngơy Sa-bat.\"",
  "6": "Varơuq xlih vlôh muut muuyq hngơy Sa-bat kadrơơy, Kadraq muut đom hnhư hơu xôq pato dayq, ji aduq nưq e muuyq dro kanau, pla ti akoh ku ay nưq biq kavăp.",
  "7": "Măn khơl thơy pato ganuun ji manih Pha-ri-sii tavooi tyauq Kadraq, ‘yo Kadraq e paxêêt yơh đom hngơy Sa-bat be, xôq oot axek jah kơq rôp kadrôp Kadraq.  ",
  "8": "Bơh Kadraq xet varơuq biit ku oot, yôôch Kadraq đnooy dii adro biq kavăp ti: \"Dayh dưk tok ji vlôh dưk aduq katuul manih karôp.\" Ay nưq dưk tok ji vlôh dưk đnư.",
  "9": "Lôôk Jê-xu đnooy dii oot: \"Gô vôôch êêp kơy, atoh troq tyauq ganuun đom hngơy Sa-bat yôôych dơơp varơuq kaxaay long dơơp varơuq xơuq, wơơt manih long păk kaxêêt manih?\"",
  "10": "Atêq tuôôy 'yo manih karôp gah gih, Kadraq đnooy dii ay nưq: \"Dayh palo ti ku ay vlôh.\" Ay dơơp tyauq ji ti ay jah yơh.",
  "11": "Bơh oot glaay xuum tôq jaraq ji tagêh dii mamuuyq 'yo oot hno ik dơơp kajoq dii Lôôk Jê-xu.",
  "12": "Varơuq xlih vlôh đom kaluh hngơy nưq, nưq laa Kadraq hooy tok ma đoot xôq apôôy, ji Kadraq heq parool klôôy mơng đom varơuq apôôy dii Kơy Plêêk.",
  "13": "Tuôôy hngơy đơơu heq truh, Kadraq taayh khơl xatyauq kadraq, ji rơơlh kưl vaarq adro vlôh xing oot, đơu Kadraq kungh taayh kưl vaarq adro nưq laa khơl jah rơơlh, nưq laa:",
  "14": "Si-Môôn, adro đơu Kadraq kungh xok anơng laa Phi-e-rơơ, oh kanau kơy laa Anh-rêê, Ja-kơ,  Jăng, Phi-liip, Ba-thê-lê-mi,",
  "15": "Ma-thi-ơơ, Thô-maa, Jăng koot A-phêê, Si-môôn laa adro jah taayh laa Xê-lôôt,",
  "16": "Ju-đa koot Ja-cơ, ji Ju-đa Ich-ka-ri-ôt laa adro jêêk vlôh adro xalih xuum. ",
  "17": "Atêq tuôôy hooy pôôt dii oot, Kadraq dưk hlê muuyq aduq vari manaay điil kung muuyq biin karôp khơl xatyauq Kadraq, ji manih karôp dii sôôq manih thier 'ngưng truh xing loch dêh Ju-đê ji Jê-ru-sa-lem, kungh đaji dêh gah tahli Ty-rơ ji Si-đôn,",
  "18": "Khơl adro nưq heq truh xôq tameen Kadraq, ji xôq jah payơh klơlh kaluh jiq jiêh ku oot. Khơl adro biq kamuuych klơơl 'yêq nhôp kungh jah payơh.",
  "19": "Dêq plơy manih karôp kưq axek trôôk avêq muut Kadraq vii taay yaak vlôh xing Kadraq ji payơh tôôy manih.",
  "20": "Yôôch Lôôk Jê-xu, 'ngơơk mot kadraq hươnq truh khơl xatyauq ku Kadraq, ji đnooy: \"Vanong ka oh ay laa manih adrah, vii daak dêh Kơy Plêêk laa ku oh ay.",
  "21": "Vanong ka oh ay đong măn pangoot, vii oh ay hno jah phiq phơh. Vanong ka oh ay đong nhim alo, vii oh ay hno hlah hlaak.",
  "22": "Oh ay jah vanong tuôôy khơl drơơy 'yarơ oh ay,tuôôy oot drưyh oh ay, đnooy axaap ji ka'lăk anơng oh ay đaji adro xơk tauq vii kơq Koot Manih.",
  "23": "Đom hngơy nưq, dayh hlah hlaak ji ayut ayaau vii, 'yo hơơq, kadool ku oh ay tol plêêk laa thier kôt, vii mo kơy ku oot heq dơơp ka khơl kơy hlit tyauq kach đanưq.",
  "24": "Bơh, ra-ơh ka oh ay, laa adro karoh e, vii oh ay heq nhonq varơuq vada vadeen ku oh ay.",
  "25": "Ra ơh ka oh ay laa adro đong măn phiq phơh, vii oh ay hno pangoot. Ra ơh ka oh ay đong măn xagiel, vii oh ay hno hlu rơu ji nhim ook.",
  "26": "Ra ơh ka oh ay tuôôy manih oot raay đnooy kaxaay truh oh ay, vii mo kơy ku oot kungh heq dơơp tyauq kach đanưq dii khơl kơy hlit pa ôôh.",
  "27": "Bơh gô đnooy dii oh ay, khơl adro đong tameen, dayh xiaq khơl tachơơl oh ay ji dayh dơơp kach kaxaay dii khơl adro 'ya rơ oh ay.",
  "28": "Dayh apôôy vanong ka khơl karoay axaap oh ay ji dayh apôôy ka khơl adro dơơp raơh oh ay.",
  "29": "Đôôyq dii akơyq pađa oh ay aduq tavok piik neq, dayh ăm hloay tavok piik hơơq, măn adro varoh xok auu pi gôk ku oh ay, yôôych oh ay kungh te jư hlê auu 'lăp klơlh adro nưq.",
  "30": "Pa kêê akơyq apôôy vôôch oh ay, dayh ăm, ji te vôôch hlê xing adro heq xok thưq kajoq ku oh ay.",
  "31": "Oh ay trôôch khơl drơơy dơơp ka oh ay dong đaleq, dayh dơơp ka oot dong đanưq.",
  "32": "Atoh oh ay xiaq khơl adro xiaq oh ay, yôôych nưq laa vanong kajoq đôôyq dii oh ay? Vii hloay kaah khơl adro e kadrôp kungh xiaq khơl adro xiaq oot.",
  "33": "Atoh oh ay dơơp vanong dii khơl adro dơơp vanong dii oh ay, yôôych nưq laa vanong kajoq đôôyq dii oh ay? khơl adro e kadrôp kungh dơơp dang đanưq.",
  "34": "Atoh oh ay ăm khơl drơơy xapo đơu oh ay takôô nhonq hlê xing oot, yôôych nưq laa vanong kajoq đôôyq dii oh ay? Khơl adro e kadrôp kungh ăm khơl adro e kadrôp xapo, xôq nhonq hlê dang đanưq.",
  "35": "Bơh dayh xiaq khơl tachơơl oh ay ji dơơp kaxaay dii oot, dayh ăm xapo tuôôy leh takôô bla hlê, yôôych kadroor ku oh ay hno laa thier kôt, oh ay hno laa koot ku Kơy Thier Yơơk, vii Kadraq xok xuum be huq đôôyq dii khơl xuum va ih ji xơk tauq.",
  "36": "Dayh e xuum angơuq, dang đaji Vaq ku oh ay e xuum angơuq.",
  "37": "Te xưh xadrah, yôôych oh ay kajưk dik leh biq xưh xadrah. Te xadrah yôôych oh ay kajưk dik leh biq xadrah. Dayh ka‘lăk, yôôych oh ay hno jah ka‘lăk.",
  "38": "Dayh ăm, yôôych varơuq hno jah kahniq ka oh ay: muuyq phoon hlơk kôt - jah nhonq haach, jah luk lăk haach pôôt, jah athêêp ka viik glaay - oot hno hlơk muut thuuiq aau oh ay. Vii oh ay hlơk mưk leq, yôôych mưk nưq hno jah hlơk hlê ka oh ay.\"",
  "39": "Kadraq kungh taboon ka oot muuyq atoh: \"Manih apuul leh ik jarooy trôôk manih apuul, jơq be? Be aalq dêq baalq raay hno klêh pôôt raluk ih?",
  "40": "Khơl xatyauq yôôych leh iaq thơy, bơh tong muuyq adro tuôôy jah varơuq atuq sleep hno jêêk vlôh dang đaji thơy oot.",
  "41": "Aleq oh ay 'yo hloq ka'nhah đom mot muuyq oh ay êêp, đơu oh ay leh nhonq vlôh talok gaay đom mot ku êêp?",
  "42": "Dơơp đaleq oh ay hno ik đnooy dii oh ay êêp: 'Ay lơơy, dayh xôq gô xok ka‘nhah đom mot ay vlôh tuôôy xăk oh ay leh 'yo hloq talok gaay đom mot ku êêp? Adro pa ôôh hơơq! Adrooyq dêq, dayh xok talok gaay vlôh klơlh mot êêp, yôôch oh ay đơơu ‘yo hloq hlolh xôq xok ka‘nhah đom mot oh ay êêp.",
  "43": "Vii be e ưk ôôlh kaxaay vlôh plaay xơuq, mot đêh, kungh be e ưk ôôlh xơuq vlôh plaay tơơl.",
  "44": "Bơh tong muuyq ưk jah nhonq xet gmưh plaay ku ưk nưq. Manih oot leh weelh plaay pok put aduq pôôp jaliê, oot kungh leh weelh nhoo aduq pôôp rơơk.",
  "45": "Manih kaxaay jo tađưk varơuq kaxaay ku xuum klaak dơơp avlôh varơuq kaxaay, măn adro xơk tauq xing đom varơuq xơk tauuq dơơp vlôh varơuq xơk tauq. Vii xing varơuq glơh glaay đom xuum đơu huuy ni đnooy vlôh.",
  "46": "Aleq oh ay taayh gô: Lôôk, Lôôk,' đơu leh dơơp tyauq apok gô pato?",
  "47": "Gô hno ăm ka oh ay xet adro leq truh dii gô, tameen apok gô ji dơơp tyauq kaluh apok nưq yôôych dang akơyq.",
  "48": "Adro nưq dang đaji muuyq adro xơơy hnhư, đơu manih neq heq a kwoaal vari xieel jaruq ji dơơp xool tol talaat phơu. Nưq yôôch, tuôôy daak kôt tuuyh truh, alook daak kaxuul kalh muut ma hnhư nưq, đơu ni leh hno dơơp hrưp hnhư ik, vii hnhư heq jah dơơp kach kajưk.",
  "49": "Măn adro tameen đơu leh dơơp tyauq yôôych dang đaji muuyq adro xơơy hnhư tol vari be e xool hnhư, tuôôy alook daak tuuyh kalh muut hnhư nưq, ni hrưp hloay, ji varơuq hư hek ku hnhư nưq laa thier kôt."
}