cor_2020_cua_clt_luk_book/luk/5.json

{
  "1": "Varơuq xlih vlôh tuôôy manih karôp hnen rawiit Kadraq xôq tameen apok Kơy Plêêk, ji Kadraq đong dưk gah hlôôk daak Gê-nê-xa-rêêt,",
  "2": "Kadraq hloq vaarq poop gee đong măn ka gah hlôôk daak, măn khơl manih hmot kaa, tuôôy nưq heq pôôt klơlh gee yôôych, oot dong arôh yaalh.",
  "3": "Kadraq tok muuyq đom vaarq poop gee, đơu gee nưq laa ku Si-môôn, Kadraq dach kơy awayh vlôh xangưưi bơơ muuyq axik. Atêq tuôôy 'ngôôy pôôt, Kadraq padoh pato ka manih karôp xing tol gee.",
  "4": "Tuôôy Kadraq padoh taboon pa'yôôch, Kadraq đnooy dii Si-môôn: \"Dayh awaayh gee muut aduq daak jaruq yôôch avih yaalh ku ay pôôt xôq rôp muuyq axik kaa.\"",
  "5": "Tuôôy tơơl apok, Si-môôn đnooy: \"Thơy lơơy, ju dơơp varơuq tuôôt kaah klôôy, 'wot heq be rôp jah kajoq, bơh ganưaq tyauq apok thơy, gô hno avih yaalh.\" ",
  "6": "Atêq tuôôy dơơp varơuq nưq, oot rôp jah thier 'ngưưng kaa, măn yaalh ku oot yôôych jeq hyaak.",
  "7": "Oot dơơp dauq ka khơl 'wơơy măn poop gee kadrơơy truh waak oot, khơl adro nưq truh ji duuy kaa tok viit glaay vaarq poop gee truh nôôyh ni jeq karăp.",
  "8": "Bơh, tuôôy hloq anưq, Si-môôn Phi-e-rơơ kuu xăk pôôt aduq takuul Lôôk Jê-xu, tơơl: \"Kuh Lôôk, dayh chuh klơlh gô, vii gô laa adro karôp maroh.\"",
  "9": "Vii varơuq thier akêh klum kơy ji dêq hloay khơl adro măn kung kơy vii kơơq yaalh kaa đơu oot heq rôp jah,",
  "10": "Kungh dang đanưq đôôyq dii Ja-kơ ji Jăng, laa khơl koot kanau ku Xê-bê-đêê, oot laa khơl 'wơơy hmot kaa ku Si-môôn. Lôôk Jê-xu đnooy dii Si-môôn: \"Te yôq! Xing neen xuq kon têq ay hno laa ti rôp yaalh koot manih.\"  ",
  "11": "Atêq tuôôy awayh gee muut bơơ, ji ka'lăk dêq varơuq, oot hooy tyauq Kadraq.",
  "12": "Varơuq xlih vlôh tuôôy Kadraq đong măn đom muuyq theng hơơq, ji 'yo hơơq, muuyq adro xăk viik hloay pa-ruh. Tuôôy hloq Lôôk Jê-xu, ay kuu mot pôôt apôôy vôôch Kadraq, đaneq: Kuh Lôôk, atoh Kadraq trôôch, Kadraq hno ik dơơp gô jah xarêh.\"",
  "13": "Kadraq palo ti vlôh avêq muut ay, đnooy:\"Gô trôôch, dayh xarêh yơu.\" Hloay jơnưq, jiq paruh vlôh klơlh ay nưq.",
  "14": "Yôôch Kadraq đnooy panhăk ay te tauq ka akơyq, bơh: \"Dayh hooy kahnoq vlôh xăk ka thơy tơơk tưp ji tơơk tưp kua lêh ka varơuq jah xarêh ku ay, tyauq đaji Môi-see heq pato dayq, xôq dơơp xnưk ka oot.\"    ",
  "15": "Bơh, hêêl taboon truh Kadraq laayq măn ahna ranưh iaq đnooyq, nưq laa manih karôp thier 'ngưưng um mamuuyq truh xôq tameen Kadraq pato dayq ji jah pa yơh klơlh kaluh jiq jiêh ku oot.",
  "16": "Bơh Kadraq ragơy hooy muut aduq wăng we ji apôôy.",
  "17": "Varơuq xlih vlôh muut muuyq hngơy hơơq, đom tuôôy Kadraq đong pato dayq, yôôych e 'ngưưng manih Pha-ri-sii ji thơy pato ganuun 'ngôôy aduq nưq, laa khơl adro heq truh xing kaluh plơy plaa đom dêh Ga-li-lêê ji Ju-đê, kungh đaji xing theng Jê-ru-sa-lem, ji taay yaak ku Lôôk măn tol Kadraq paxêêt yơh jiq jiêh.",
  "18": "'Yo hơơq, e toleq dro xakôôk muuyq adro kanau vik tol chanưng, nưq laa adro biq jiq talêêt, oot đong axek trôôk xakôôk ay nưq muut đom 'lăp xôq amiik adrooyq kangưưr Kadraq.",
  "19": "Tuôôy leh axek hloq trôôk xakôôk ay nưq muut vii kơq karôp manih, yôôych gmưh hooy tok tol apoo hnhư, ganưaq muut apoo hnhư, oot heq raduuk ay nưq vik tol chanưng pôôt katuul manih karôp, adrooyq kangưưr Lôôk Jê-xu.   ",
  "20": "Tuôôy hloq xuum tuôq ku oot, Kadraq đnooy: \" Nee ay, karôp maroh ay heq jah ka'lăk.\"",
  "21": "Khơl thơy pato ganuun ji manih Pha-ri-sii xarôp tagêh, đaneq: \"Kadraa neq laa akơyq hôôk đnooy apok tơơk dalơh đanưq? Akơyq e kwuyen ka'lăk kadrôp vơ e muuyq adro Kơy Plêêk?\"",
  "22": "Bơh Lôôk Jê-xu xet varơuq biit ku oot, vii anưq xôq tơơl hlê, Kadraq đnooy dii oot: \"Aleq êêp kơy biit đom xuum êêp đanưq?",
  "23": "Apok leq laa klêq đnooy iaq: Karôp maroh ay heq jah ka'lăk long đnooy: Dayh dưk tok ji tawaak hooy?'",
  "24": "Bơh xôq êêp kơy xet đaneq Koot Manih tol vari e kwuyen ka'lăk kadrôp,\"- Kadraq đnooy dii adro jiq talêêt - \"Gô dach ay, dayh dưk tok, doot deep chanưng ay ji dayh hooy xuq ma hnhư ku ay.\" ",
  "25": "Hloay jơnưq, ay nưq dưk tok adrooyq kangưưr oot, atêq tuôôy deep chanưng đơu ay heq vik tol nưq, yôôych ay hooy xuq ma hnhư ay, thuôôk xuq tađnah tađnaak ka Kơy Plêêk.",
  "26": "Varơuq dong hưnh klum manih karôp, ji oot ayuôôt laat Kơy Plêêk, xuum glaay varaar yôq, đnooy đaneq: \"Hngơy neen haay heq hloq kaluh varơuq akêh.",
  "27": "Atêq kaluh varơuq nưq, Kadraq vlôh klơlh đnư ji 'yo ranih muuyq adro xok xơu anơng Lê-vi đong 'ngôôy aduq xok xơu, yôôch Kadraq đnooy dii kơy: \"Dayh tyauq gô!\"",
  "28": "Nưq laa atêq tuôôy dưk tok, ka'lăk dêq kaluh varơuq, kơy hooy tyauq kadraq.",
  "29": "Lê-vii adoot muuyq waal xa kôt deng ka Kadraq aduq ma hnhư kơy, ji e muuyq biin karôp khơl xok xơu kung khơl adro kadrơơy đong 'ngôôy aduq para xa kung dii oot.",
  "30": "Bơh kaluh manih pha-ri-sii ji thơy pato ganuun ku oot ramooi dii khơl xatyauq ku Lôôk, đaneq: \"Vii kơq kajoq đơu khơl kơy xa hôôch achung dii khơl xok xơu ji khơl adro karôp maroh?\" ",
  "31": "Xôq tơơl hlê, Lôôk Jê-xu đnooy dii oot: \"Manih kalh paraat leh e duh truh thơy jarơy, bơh khơl jiq jiêh đơơu duh.",
  "32": "Gô leh truh xôq tawoyh taayh khơl hyioh jăk, đơu laa adro e kadrôp truh dii varơuq wiit xuum.\"",
  "33": "Bơh yôôch, oot đnooy dii Kadraq: \"Khơl xatyauq ku Jăng ragơy deek xa ji tơơk tưp kaluh apok apôôy, khơl xatyauq ku manih Pha-ri-sii kungh anưq. Măn manih ku khơl kơy kưq xa dii hôôch.\" ",
  "34": "Kadraq tơơl kung oot: \"Êêp kơy leh hno ik dach khơl 'wơơy truh xa waal pajêêk thơơy xa đom kaplaah ok đong măn dii oot, jơq be?",
  "35": "Bơh dik hno truh hngơy tuôôy đơu ok jah xagook hooy klơlh oot. Tuôôy nưq, muut kaluh hngơy nưq, oot hno deek xa.\"",
  "36": "Yôôch Kadraq kungh taboon ka oot muuyq atoh đaneq: Be e akơyq kaval tol poop auu duut apek xneh chieh vlôh xing poop aau đơơu. Bơh atoh dơơp đanưq, yôôych hno pahyaak auu đơơu, ji apek xneh đơu xok xing auu đơơu kungh hno leh tamuut dii aau duut. ",
  "37": "Ji leh e kơyq klit lok đơơu đom bơu kađuh duut. Bơh atoh dơơp đanưq, yôôych lok đơơu hno dơơp chaal bơu kađuh, lok hno hoot vlôh pi gôk, bơu kungh hno biq padah. ",
  "38": "Bơh, phayh klit lok đơơu đom bơu kađuh đơơu.",
  "39": "Atêq tuôôy hôôych lok duut, leh e akơyq trôôch lok đơơu, vii adro nưq đnooy aneq: \"Lok duut laa juq iaq.\""
}