cor_2020_cua_clt_luk_book/luk/3.json

{
  "1": "Muut xanưm thưq kưl dăp đom đơơy Xê-xa Ti-be-rơơ - đom tuôôy Bôn-xơ Phi-laat dơơp padrok xnưk dêh Ju-đê, Hê-rôt dơơp vuua xakaq dêh Ga-li-lê, măn Phi-liip, ma-oh kơy nưq dơơp vuua xakaq dêh I-tu-rêê kung dii dêh Tra-kô-nik, ji Li-sa-ni-aa dơơp vuua xakaq dêh A-bi-leen,",
  "2": "đom kawat An-nee kung Kai-phee đong dơơp thơy tơơk tưp kôt- apok Kơy Plêêk heq truh dii Jăng, koot kanơu Xa-Cha-rii, đom wăng we.",
  "3": "ji yôôch, kơy hooy truh dêq kaluh aduq gah gih daak Jô-đaanh, padoh taboon pheep bap-teem truh varơuq wiit xuum xôq jah vanong ka'lăk kadrôk.",
  "4": "Đaji varơuq heq jah vlơk đom rahlap truh kaluh apok ku kơy hlit Ê-sai: \"E apok taayh kalh đom wăng we: ' Dayh adoot deep trôôk ka Lôôk, dơơp pa hyioh kaluh trôôk ku Kadraq.",
  "5": "Tôôy huuk hno jah glôp viik, kaluh gôk đoot hno jah xier pôôt, trôôk gwong gweo hno vlôh hyioh, trôôk grôôh môh hno vlôh manaay, ",
  "6": "ji tôôy xăk xamơk hno hloq varơuq wơơt xok ku Kơy Plêêk.\"",
  "7": "Nưq, Jăng đnooy dii manih karôp truh xôq chiuq kơy dơơp bap-teem: \"Adrơơk voolh taweek hơơq, akơyq heq tauq ka êêp xôq xadăk klơlh đơơt tôq jaraq jeq truh?",
  "8": "Vii anưq, dayh vlôh raak plaay taxưnq dii varơuq wiit xuum, ji te đnooy kadih ji xăk xamơk êêp: ' Haay e Ap-ra-haam laa mo kơy ' vii gô đnooy ka êêp đaneq Kơy Plêêk hno ik dơơp vlôh koot xau Ap-ra-haam xing kaluh kalook phơu neq.",
  "9": "Bơh, poop xuôôk kungh đong xôq angôôlh ka ưk ôôlh yôôch, vii anưq ưk leq be e plaay toolh yôôych biq kool ji taweek muut ma ôôlh.\"",
  "10": "Manih karôp vôôch kơy đaneq: \"Nưq, ‘wot duh phayh dơơp kajoq?\"",
  "11": "Xôq tơơl hlê apok, kơy đnooy dii oot: \" akơyq e vaar poop aau phayh ahlook ka adro be e, ji akơyq e tuôông xa, adro nưq kungh dayh dơơp đanưq.\" ",
  "12": "Khơl xok xơơu kungh truh xôq chiuq bap-teem, ji oot tơơl kung kơy: \"Thơy lơơy, ‘wot duh phayh dơơp kajoq?\"",
  "13": "Kơy đnooy dii oot: \"Te xok ‘ngưưng iaq jêêt heq jah đnooy patăk ka oh ay.\" ",
  "14": "Taleq adro kuun, kungh vôôch kơy, đaneq: \"Măn 'wot, 'wot duh phayh dơơp kajoq?\" Kơy đnooy dii oot: \"Te varayh xok thưq kajoq, kungh te pahnhiq bơyq, ji dayh hlah xuum dii jêêt hngơy ku êêp.\"",
  "15": "Bơh, vii manih karôp đong takôô ji vii dêq hloay raay biit kadih đom xuum oot truh Jăng, xet lôôyq kơy e aalq laa Lôôk Wơơt Dêh be,",
  "16": "Jăng heq tơơl hlê tuôôy đnooy dii oot: \"Gô dơơp bap-teem ka oh ay bơơn daak, bơh Kơy jeq truh e taay yaak iaq gô, ji Kơy đơu gô be taxưnq luh talơy kaxôôp ku Kadraq. Kadraq hno dơơp bap-teem ka oh ay bơơn Kơy Phool Hiel ji bơơn ôôlh,",
  "17": "laa Kơy e apoop kapưk đom ti Kadraq xôq ôôp kapưưh thier xarêh chaal vaa kadraq, ji xôq vaa muut đom pơơ ku kadraq, bơh Kadraq hno vuh jaq hree vaa bơơn ôôlh be hno dơơp poch ik.\"",
  "18": "Vii anưq, dong dik đom tuôôy pato nhăk 'ngưưng varơuq kadrơơy, kơy padoh taboon hêêl kaxaay ka manih karôp.  ",
  "19": "Bơh vuua xakaq Hê-rôôt, atêq tuôôy biq Jăng atoah truh varơuq Hê-rô-đia, kadrê ku ma oh vuua, ji truh kaluh varơuq xơk tauq kadrơơy đơu Hê-rôôt heq dơơp,",
  "20": "Yôôych măn heq athêêp varơuq neq đom dêq hloay varơuq xơk tauq ku kơy: nưq laa kơy dach rôp Jăng karuk muut hnhư tuu.",
  "21": "Bơh đom tuôôy manih karôp chiuq bap-teem, varơuq xlih vlôh nưq laa Lôôk Jê-xu kungh chiuq bap-teem, ji đom tuôôy Kadraq đong apôôy, kaluh karawah plêêk jah luh vlôh,",
  "22": "yôôch Kơy Phool Hiel pool pôôt găp tol Kadraq đom long lơuq pii gôk dang đaji xêêp katrơu, ji  muuyq apok xnoh truh xing plêêk: \"Koot laa Koot xung xiaq ku Gô. Gô hlah xuum truh Koot.\" ",
  "23": "Tuôôy xarôp dơơp varơuq, xăk jek Lôôk Jê-xu jah kơơh pee kưl xanưm, ( tyauq đaji oot biit) Kadraq laa koot ku Jô-seep, Jô-seep koot Hê-lii,",
  "24": "Hê-li koot Maak-tak, Maak-tak koot Lê-vii, Lê-vii koot Mên-chii, Mên-chii koot Ja-nê, Ja -nê koot Jô-seep,",
  "25": "Jô-seep koot Ma-ta-thia, Ma-ta-thia koot A-môôt, A-môôt koot Na-huum, Na-huum koot Êch-lii, Êch-lii koot Na-gê,",
  "26": "Na-gê koot Ma-aat, Ma-aat koot Ma-ta-thia, Ma-ta-thia koot Sê-mê-iin, Sê-mê-iin koot Jô-sêch, Jô-sêch koot Jô-đa,",
  "27": "Jô-đa koot Jô-a-naan, Jô-a-naan koot Rê-saa, Rê-saa koot Xô-rô-ba-bêên, Xô-rô-ba-bêên koot Sa-la-thi-êl, Sa-la-thi-êl koot Nê-rii,",
  "28": "Nê-rii koot Mên-chii, Mên-chii koot A-đii, A-đii koot Kô-sam, Kô-sam koot Ên-ma-đaam, Ên-ma-đaam koot Ê-rơơ,",
  "29": "Ê-rơơ koot Jô-suê, Jô-suê koot Ê-li-ê-see, Ê-li-ê-see koot jô-riim, Jô-riim koot Maat-that, Mat-thaat koot Lê-vii,",
  "30": "Lê-vi koot Si-mê-ôôn, Si-mê-ôôn koot Ju-đa, Ju-đa koot Jô-seep, Jô-seep koot Jô-naam, Jô-naam koot Ê-li-a-kiim,",
  "31": "Ê-li-a-kiim koot Mê-lê-aa, Mê-lê-aa koot Men-naa; Men-naa koot Mat-ta-thaa, Mat-ta-thaa koot Na-thaan, Na-thaan koot Đa-vik,",
  "32": "Đa-vik koot Je-sê, Je-sê koot Ô-bêêt, Ô-bêêt koot Bô-ôô, Bô-ôô koot Sanh-môôn, Sanh-môôn koot Na-ach-son,",
  "33": "Na-ach-son koot A-mi-na-đaap, A-bi-na-đaap koot At-miin, At-miin koot A-rơ-nii, A-rơ-nii koot Êch-rôôm, Êch-rôôm koot Pha-rêê, Pha-rêê koot Ju-đa,",
  "34": "Ju-đa koot Ja-kôp, Ja-kôp koot Y-saak, Y-saak koot Ap-ra-haam, Ap-ra-haam koot Tha-rêê, Tha-rêê koot Na-kô,",
  "35": "Na-kô koot Sê-ruk, Sê-ruk koot Rê-huu, Rê-huu koot Bê-lek, Bê-lek koot Hê-bee, Hê-bee koot Sa-laa,",
  "36": "Sa-laa koot Kai-nam, Kai-nam koot A-bak-Sat, A-bak-sat koot Seem, Seem koot Nô-êê, Nô-êê koot La-mek,",
  "37": "Lê-mek koot Mê-tu-sê-laa, Mê-tu-sê-laa koot Hê-nok, Hê-nok koot Jê-rêt, Jê-rêt koot Ma-ha-la-êl, Mê-ha-la-êl koot Kê-naan,",
  "38": "Kê-naan koot Ê-noot, Ê-noot koot Sêêt, Sêêt koot A-đaam, A-đaam koot Kơy plêêk."
}