See in Reader
56 lines
7.4 KiB
JSON
56 lines
7.4 KiB
JSON
{
|
||
"1": "Nưq yôôch, ka xaroq meel ku hngơy adrooyq dik đom pơh hngơy, oot hooy truh xanưưng, adrơk tyauq jarơu thơơm đơu oot heq ralauq.",
|
||
"2": "Bơh oot hloq kuk phơu heq jah palaan vlôh klơlh xanưưng,",
|
||
"3": "bơh, tuôôy muut pii 'lăp, oot be hloq xaak Lôôk Jê-xu.",
|
||
"4": "Varơuq xlih vlôh đom tuôôy oot đong xôôl dôôl truh varơuq neq yôôych, 'yo hơơq, vaar dro khơl kanơu hlưưp auu ko ah lieek dưk gah oot.",
|
||
"5": "Tuôôy oot varaal varii ji kuu mot pôôt vari yôôych vaar dro nưq đnooy dii oot: \"Aleq êêp mư axek manih riilh đom tuul khơl kaxêêt?",
|
||
"6": "Kadraq leh măn đneen, bơh Kadraq riilh hlê yôôch! Dayh vach hlê Kadraq heq đnooy đaleq dii khơl oh ay tuôôy măn aduq Ga-li-lêê,",
|
||
"7": "dach đaneq Koot Manih phayh biq rôp ataq đom ti khơl adro e kadrôp ji phayh biq đonq đin tol gaay chrăk, yôôch truh hngơy thưq pe, phayh riilh hlê.\"",
|
||
"8": "Oot vach hlê apok Kadraq,",
|
||
"9": "ji tuôôy xing xanưưng wiit xuq, oot taboon hlê kaluh varơuq ka kưl muuyq dro jah rơơlh kung dêq hloay khơl kadrơơy.",
|
||
"10": "Khơl kadrê nưq e Ma-ri Ma-đơ-leen, Jan-nơơ, Ma-rii miq Ja-kơơ, ji khơl kadrê kadrơơy kung dii oot, taboon hlê ka khơl jah rơơlh kaluh varơuq nưq. ",
|
||
"11": "Kaluh apok taboon nưq tameeng e veeh leh dik đôôiq dii khơl jah rơơlh, vii anưq oot be tuôq taleq dro khơl kadrê neq.",
|
||
"12": "Bơh, Phi-e-rơơ dưk tok chrơơk truh xanưưng, ji tuôôy kuu pôôt 'yo đom 'lăp, kơy vơ hloq xađneh ahnoom. Nưq laa kơy hooy xuq ma hnhư, vôôch kadih varơuq kajoq heq xlih vlôh.",
|
||
"13": "Hơơq, đom jơq hngơy nưq, vaar adro đom khơl xatyauq đong hooy truh muuyq plơy xangưưi anưng laa Em-ma-ut, xangưưi xing Jê-ru-sa-lem drơu kưl êk-ta-đơ,",
|
||
"14": "ji baalq đong athêêk dii mamuuyq truh kaluh varơuq heq xlih vlôh.",
|
||
"15": "Varơuq xlih vlôh đom tuôôy baalq athêêk ji tagêh, yôôych jơq Lôôk Jê-xu truh jeq hooy kung dii baalq.",
|
||
"16": "Bơh mot baalq biq kađoq hlê xôq leh nhonq vlôh Kadraq.",
|
||
"17": "Jơneq, Kadraq đnooy dii baalq: \"Kaluh varơuq nưq laa kajoq đơu baalq athêêk tagêh dii mamuuyq đong tuôôy hooy trôôk iq?\" Baalq dưk hlê, hlu xuum dik.",
|
||
"18": "Bơh tuôôy tơơl hlê, muuyq adro anưng laa Kơ-lê-ô-ba đnooy dii Kadraq: \"E jơq vơ muuyq dro kơy laa manih truh hlơq Jê-ru-sa-lem be xet kaluh varơuq heq xlih vlôh aduq nưq taleq hngơy neq?\"",
|
||
"19": "Kadraq vôôch baalq: \"Varơuq kajoq nưq?\" Yôôch baalq đnooy dii Kadraq: \"Varơuq apiq truh Jê-xu manih Na-xa-reet, đơu nưq laa muuyq dro, muuyq kơy hlit glaay taay yaak đom varơuq dơơp hloay apok đnooy adrooyq kangưưr Kơy Plêêk kung dêq manih karôp,",
|
||
"20": "Ji đaleq đơu khơl thơy tơơk tưp kôt kung khơl padrok ku haay heq rôp ataq Kadraq xôq păk kaxêêt, ji heq đonq đin Kadraq tol gaay chrăk.",
|
||
"21": "Măn ‘wot heq takôô gmưh đaneq Kadraq laa Kơy truh xôq wơơt xok Y-sơ-ra-êêl. Wiih hlê, leh hloh kung dii dêq hloay kaluh varơuq nưq, varơuq nưq dalơh hlê truh hngơy neen laa hngơy thưq pee, xing tuôôy kaluh varơuq hơơq xlih vlôh. ",
|
||
"22": "Bơh, taleq dro khơl drê đom tuul 'wot dik dơơp ka 'wot phayh akêh, atêq tuôôy oot măn aduq xanưưng ka xaroq meel",
|
||
"23": "ji tuôôy be axek hloq xaak Kadraq, oot xuq, taboon hlê laa heq hloq varơuq rama truh khơl kơy yaak đnooy Kadraq đong riilh.",
|
||
"24": "Taleq dro đom 'wot hooy vlôh hlơq xanưưng ji oot heq hloq dang anưq, troq đaji taleq dro khơl kadrê heq đnooy, bơh oot be hloq Kadraq.\"",
|
||
"25": "Yôôch Kadraq đnooy dii baalq: \"Lơơy, khơl adro vlôô ji khơl adro xiit hlolh đom xuum xôq tuôq aduq kaluh varơuq đơu khơl kơy hlit heq đnooy!",
|
||
"26": "Be aalq Lôôk Wơơt Dêh phayh chiuq kaluh varơuq nưq, xôq muut đom tađnah tađnaak ku Kadraq ih?\"",
|
||
"27": "Yôôch xarôp xing Môi-see ji xing dêq hloay khơl kơy hlit, Kadraq padoh hlolh ka baalq kaluh varơuq tapa truh Kadraq đom dêq Rahlap Vah.",
|
||
"28": "Oot hooy jeq truh plơy aduq baalq duh truh, yôôych Kadraq dơơp đaji xung hooy xangưưi iaq.",
|
||
"29": "Nưq laa baalq bach Kadraq, đaneq: \"Dayh măn hlê dii ‘wot, vii plêêk heq yôôp klôôy ji hngơy xung dêq yôôch.\" Kadraq hooy muut xôq măn hlê dii baalq.",
|
||
"30": "Varơuq xlih vlôh tuôôy Kadraq heq 'ngôôy muut para kung dii baalq, adrơk tôôp tok, Kadraq kuh kway, ji atêq tuôôy plelh vlôh, Kadraq palo ka baalq.",
|
||
"31": "Jơnưq, mot baalq jah luh vlôh ji baalq 'yo xet Kadraq, yôôch Kadraq heq pahlơơp klơlh baalq.",
|
||
"32": "Baalq đnooy dii mamuuyq: \"Be aalq laa xuum a tôq tơh tuôôy Kadraq athêêk dii a tol trôôk hooy, kung đaji tuôôy Kadraq padoh hlolh Rahlap Vah ka a ih?\"",
|
||
"33": "Nưq laa tuôôy dưk tok kung muut jơq wat nưq, baalq wiit xuq hlê Jê-ru-sa-leem. Ji baalq axek tavơh kưl muuyq dro jah rơơlh đong taguumq hlê, kung khơl adro e mot dii oot,",
|
||
"34": "tauq đaneq: \"Lôôk heq riilh hlê dik yôôch, ji Kadraq heq jah Si-môôn 'yo hloq.\"",
|
||
"35": "Yôôch baalq taboon hlê kaluh varơuq tol trôôk hooy, ji đaleq Kadraq heq kahnoq ka baalq xet đom tuôôy plelh tôôp.",
|
||
"36": "Juneq, tuôôy oot đong đnooy kaluh varơuq nưq, jơq Kadraq dưk aduq tuul oot, ji đnooy dii oot: \"Hrok hror ka oh ay.\"",
|
||
"37": "Bơh vii thier yôq ji varaar varih, oot biit laa đong hloq kađuum.",
|
||
"38": "Kadraq dach oot: \"Aleq oh ay xôôl dôôl ji vii kơơq kajoq đơu varơuq biit ravơq tơơk tok đom xuum oh ay? ",
|
||
"39": "Dayh 'yo ti ku thơy ji jôôk ku thơy, đaneq jơq laa thơy neq. Dayh avêq muut thơy ji 'yo. Vii kamuuych be e hlek ji khiêk, đaji oh ay 'yo hloq thơy đong e.\"",
|
||
"40": "Đnooy pa'yôôch apok nưq, Kadraq ăm oot 'yo ti ji jôôk kadraq.",
|
||
"41": "Đom tuôôy oot măn kooq hôôk tuôq ji akêh vii thier hlah hlaak, Kadraq vôôch oot: \"Măn đneen, oh ay e kajoq xa ik be?\"",
|
||
"42": "Jơneq, oot ăm ka Kadraq muuyq poop kaa vuh;",
|
||
"43": "Atêq tuôôy adrơk xok, Kadraq xa adrooyq kangưưr oot.",
|
||
"44": "Yôôch Kadraq đnooy dii oot: \"Neq laa kaluh apok ku thơy đơu thơy heq đnooy dii oh ay tuôôy đong măn dii oh ay, đaneq kaluh varơuq heq vlơk truh thơy đom ganuun Môi-see, kaluh rahlap hlit ji kaluh Thi Thiên raay phayh jah jêêk yuôôl.\"",
|
||
"45": "Tuôôy nưq, Kadraq luh xuum klaak oot xôq hlolh Rahlap Vah, ji Kadraq dach oot:",
|
||
"46": "đaneq: \"Đaji e apok vlơk: Lôôk Wơơt Dêh phayh chiuq jiq jiêh, ji xing aduq kaxêêt riilh hlê muut ka hngơy thưq pee,",
|
||
"47": "yôôch varơuq wiit xuum xôq jah ka'lăk kadrôp phayh jah padoh taboon taayh yal Kadraq ka dêq hloay kaluh tamooy, xarôp xing Jê-ru-sa-lem.",
|
||
"48": "Oh ay laa khơl dơơp xnưk truh kaluh varơuq nưq.",
|
||
"49": "Thơy jeq ataq varơuq heq tavek ku Vaq thơy truh tol oh ay. Bơh oh ay dayh măn đom theng dong truh tuôôy oh ay jah hlưp xok taay yaak xing taalh yơơt.\"",
|
||
"50": "Yôôch Kadraq jarooy oot vlôh pi gôk dong truh jeq Bê-tha-ni, ji tuôôy tơơk ti kadraq tok, Kadraq kahniq vanong ka oot.",
|
||
"51": "Varơuq xlih vlôh đom tuôôy Kadraq kahniq vanong ka oot, Kadraq vloot klơlh oot ji jah xagook tok tol plêêk.",
|
||
"52": "Atêq tuôôy kuh kuul Kadraq, oot wiit xuq aduq Jê-ru-sa-leem dii varơuq hlah hlaak dik,",
|
||
"53": "ji dêq hloay oot kưq măn đom hnhư hơu, ayuôôt laat Kơy Plêêk."
|
||
}
|