cor_2020_cua_clt_luk_book/luk/22.json

{
  "1": "Lêh Tôôp Be E Tape, jah taayh laa lêh Dalơh, đong jeq truh.",
  "2": "Khơl thơy tơơk tưp kôt ji thơy pato ganuun đong axek trôôk leq đơu oot hno ik păk kaxêêt Kadraq, vii oot yôq manih karôp.",
  "3": "Yôôch Sa-tan nhôp muut Ju-đaa, adro jah taayh laa Ich-ka-ri-ôt, măn đom sôôq kưl vaar dro khơl jah rơơlh.",
  "4": "Ji, tuôôy heq truh tavơh, ni đnooy kung dii khơl thơy tơơk tưp kôt ji padrok kuun hnhư hơu truh kach ni hno ik pahnap ataq Kadraq ka oot.",
  "5": "Oot hlah hlaak ji paleek ăm ka ni jêêt.",
  "6": "Ni 'ngơyh akoq ji axek kawah pahnap ataq Kadraq ka oot tuôôy be e manih karôp.",
  "7": "Yôôch hngơy lêh Tôôp Be E Tape truh, laa hngơy đơu ,manih oot phayh tơơk tưp ôôq trưưu koot lêh Dalơh.",
  "8": "Kadraq patăk Phi-e-rơ ji Jăng hooy, dach: \"Dayh hooy ralauq lêh Dalơh ka haay, xôq haay kung xa.\"",
  "9": "Baalq đnooy dii Kadraq: \"Thơy xung ‘wot adoot waal xa ka'leq?\" ",
  "10": "Yôôch Kadraq tơơl hlê oot: \"Nee, tuôôy oh ay heq muut đom theng, muuyq dro kanau ta'nhaak wo daak hno tavơh oh ay. Dayh hooy tyauq dro nưq muut đom ma hnhư đơu ay nưq hooy muut.",
  "11": "Ji oh ay hno đnooy dii kôôch hnhư:' Thơy dach kơy: \"Rawaak hnhư aduq thơy hno ik xa lêh Dalơh dii khơl xatyauq ku thơy măn ka'leq?\"",
  "12": "Kơy nưq hnoq pato ka oh ay muuyq rawaak kôt măn tol paat e 'miêh kaluh tuôông. Dayh adoot waal xa aduq đnư.\"",
  "13": "Nưq yôôch, tuôôy heq dưk hooy, baalq hloq varơuq xlih vlôh jơq đaji Kadraq heq đnooy dii baalq. Ji baalq adoot waal xa ka lêh Dalơh. ",
  "14": "Tuôôy truh waal xa, Kadraq ‘ngôôy muut para, ji khơl jah rơơlh 'ngôôy kung dii Kadraq. ",
  "15": "Kadraq đnooy dii oot: \"Dii xuum thier trôôch, thơy heq xung xa lêh Dalơh neq dii oh ay adrooyq tuôôy thơy chiuq pơơl dal.",
  "16": "Vii thơy đnooy dii oh ay, đaneq thơy kajưk dik hno leh xa lêh neq dong truh tuôôy lêh nưq jah pa'yôôch đom daak ku Kơy Plêêk.\"",
  "17": "Ji atêq tuôôy xok dooy ji kuh kwoay, Kadraq dach: \"Dayh nhonq xok dooy neq ji ahlook ka mamuuyq.",
  "18": "Vii thơy đnooy dii oh ay, xing nen truh atêq, thơy kajưk dik hno paq hôôch plaay nhoo neq, dong truh tuôôy daak ku Kơy Plêêk truh.\"",
  "19": "Ji atêq tuôôy xok tôôp ji kuh kwoay, Kadraq plelh vlôh ji palo ka oot, đnooy: \"Neq laa xăk xamơk thơy, vii oh ay đơu pahnap ăm. Dayh dơơp varơuq neq đom varơuq vach truh Thơy.\"",
  "20": "Kung dang đanưq dii dooy, atêq tuôôy heq xa, Kadraq đnooy: \"Dooy neq laa tavek đơơu đom vahaap thơy, laa vahaap biq kahrôq vlôh vii oh ay.",
  "21": "Bơh, 'yo hơơq, plaa tii ku adro xlih xuum thơy măn tol para chuung dii thơy.",
  "22": "Vii long Koot Manih vlôh hooy tyauq đaji varơuq heq jah đinq, bơh ra ơh ka adro nưq, laa adro đơu xing ni, Kadraq biq xlih xuum!\"",
  "23": "Oot xarôp tagêh apok dii mamuuyq adro đanưq hno laa akơyq đom khơl oot, laa adro đong xung dơơp varơuq nưq.",
  "24": "Nưq yôôch, muuyq đơơt tayaat kung xlih vlôh đom katuul oot truh adro leq đom sôôq oot jah 'yo laa kôt iaq dik.",
  "25": "Nưq yôôch, Kadraq đnooy dii oot: \"Khơl vuua ku kaluh daak dêh xok paraat kalh xakaq koot manih, ji khơl adro adrơk kwuyên tol tamooi jah taay laa ' khơl ăm vanong.'",
  "26": "Bơh dii oh ay yôôych be ik đanưq. Tađôôy muut đnư, adro kôt dik đom oh ay phayh jêêk vlôh đaji adro dee yưk, ji adro dưk xnưk đaji adro hơu varơuq.",
  "27": "Vii akơyq kôt iaq, adro 'ngôôy xa long adro hơu varơuq? Be aalq laa adro 'ngôôy xa ih? Nưq đơu thơy măn katuul oh ay đaji muuyq adro hơu varơuq.",
  "28": "Bơh oh ay laa khơl adro heq kajưk xuum dii thơy đom kaluh varơuq parêq parơh ku thơy.",
  "29": "Thơy kung kahniq ka oh ay, đaji Vaq thơy heq kahniq daak dêh ka thơy,",
  "30": "xôq oh ay hno ik xa hôôch kung para ku thơy đom daak dêh thơy, ji 'ngôôy tol ngôôy xưh xadrah kưl vaar adrơơk I-sơ-ra-êl. ",
  "31": "Si-môôn lơơy, Si-môôn, 'yo hơơq, Sa-taan heq xung atê ôôp ay đaji vaa.",
  "32": "Bơh thơy heq apôôy ka koot xôq xuum tuôq ay be huq hlơơp. Ji ay, tuôôy heq wiit xuq hlê, dayh dơơp ka khơl oh ay ay kalh paraat.\"",
  "33": "Bơh ay tơơl dii Kadraq: \"Kuh Lôôk, gô dêq xuum kung hooy dii Kadraq hloay kaah muut tuu ji truh aduq kaxêêt.\"",
  "34": "Bơh Kadraq dach: \"Phi-e-rơơ lơơy, thơy đnooy dii ay, hngơy nen ier pôô hno kooq rok adrooyq tuôôy ay leh nhonq xet thơy pee yưk.\"",
  "35": "Kadraq đnooy kung oot: \"Tuôôy thơy patăk oh ay hooy be adrơk tyauq kaxuui jêêt, droong, kaxôôp, oh ay 'leq e thiêuq kajoq, jơq be?\" Oot tơơl: \"Leh kajoq dêq.\"",
  "36": "Yôôch Kadraq đnooy dii oot: \"Bơh juneq, akơyq e kaxuui jêêt, dayh xok yơu, ji droong kung anưq. Akơyq kooq e xieh, dayh tek auu koot kech êêp đơu root.",
  "37": "Vii thơy đnooy dii oh ay đaneq apok heq jah vlơk neq phayh jah jêêk aduq thơy:' Ji kadraq heq biq xôq muuyq aduq dii khơl adro leh e ganuun.' Vii dik kaluh varơuq đnooy truh thơy phayh jah jêêk.\"",
  "38": "Nưq yôôch, oot tơơl: \"Kuh Lôôk, 'yo neq, aduq đnen e vaar poop xieh.\" Kadraq đnooy dii oot: \"Nưq laa đuu.\"",
  "39": "Atêq tuôôy vlôh klơlh, Kadraq hooy truh đoot Ô-liu daang ragơy, măn khơl xatyauq kung hooy tyauq Kadraq.",
  "40": "Tuôôy heq hooy truh aduq, Kadraq đnooy dii oot: \"Dayh apôôy xôq be huq klêh muut varơuq adôô alưưt.\"",
  "41": "Kadraq vlôh xangưưi klơlh aduq oot muuyq kawaah wach tiip muuyq look phơu, ji kuul takuul pôôt, Kadraq apôôy,",
  "42": "đaneq: \"Kuh Vaq, atoh Vaq trôôch, xiin tơơk dooy neq klơlh Koot. Ju anưq, leh tyauq xuum Koot, bơh xiin xuum Vaq jah jêêk.\"",
  "43": "Muuyq kơy yaak xing plêêk rama vlôh adrooyq Kadraq, athêêp paraat ka Kadraq.",
  "44": "Măn đom katuul varơuq jiq raơh, Kadraq apôôy kang garơng iaq, ji pa uh Kadraq jêêk vlôh đaji kaluh vahaap katoh pôôt vari.",
  "45": "Tuôôy dưk tok klơlh aduq apôôy, Kadraq hooy truh aduq khơl xatyauq, Kadraq hloq oot đong vik vii hlu rơu.",
  "46": "Kadraq đnooy dii oot: \"Aleq oh ay vik? Dayh kah apôôy yơu, xôq oh ay klơlh kahlôôp muut aduq adôô alưưt.\"",
  "47": "Tuôôy Kadraq đong măn đnooy, 'yo hơơq, muuyq biin karôp ji adro jah taayh laa Ju-đa, muuyq đom kưl vaar dro oh ay jah rơơlh, hooy adrooyq oot. Ni truh jeq Lôôk Jê-xu xôq hiip Kadraq.",
  "48": "Bơh Lôôk Jê-xu đnooy dii ni: \"Ju-đa, ay xlih xuum Koot Manih bơơn muuyq poop hiip ih?\"",
  "49": "Tuôôy khơl măn rawiit Kadraq nhonq hloq varơuq jeq xlih vlôh, oot vôôch: \"Kuh Lôôk, ‘wot e duh hmot hlê bơơn xieh be?\"",
  "50": "Muuyq adro hơơq đom sôôq oot heq dool xapok ku thơy tơơk tưp kôt, ji dool kloh tôôr pi akoh ku ay nưq.",
  "51": "Bơh tơơl hlê, Lôôk Jê-xu dach: \"Te tabôông truh varơuq neq.\" Ji tuôôy kapi aduq tôôr nưq, Kadraq payơh ka ay nưq.",
  "52": "Atêq nưq, Lôôk Jê-xu đnooy dii khơl truh rôp Kadraq, 'ngưq laa khơl thơy tơơk tưp kôt, khơl padrok kuun hnhư hơu, ji khơl draq, đaneq: \"Êêp kơy truh dii xieh ji gaay đaji rôp adro atôk ih?",
  "53": "Tôôy hngơy, tuôôy gô măn kung êêp kơy đom hnhư hơu, êêp kơy be palo ti tol gô. Bơh neq laa wat ku êêp kơy ji da uh kwuyen kamưng jaluk.\"",
  "54": "Yôôch, atêq tuôôy rôp jư Kadraq, oot xagook hooy ji jarooy truh hnhư ku thơy tơơk tưp kôt. Măn Phi-e -rơơ tyauq Kadraq xing xangưưi.",
  "55": "Tuôôy heq atut muuyq đum ôôlh măn katuul chaal ji 'ngôôy anguk hlê kung mamuuyq, Phi-e-rơơ 'ngôôy achung dii oot.",
  "56": "Jơnưq, mư xapok kadrê hơơq, tuôôy hloq kơy đong ‘ngôôy jeq ôôlh yôôych ‘yo hyioh muut kơy, mư đnooyq: \"Kơy neq kung măn dii manih hơơq.\"",
  "57": "Bơh kơy kadook, đaneq: \"Nee mư, gô e xet kơy nưq 'leq.\"",
  "58": "Muuyq kawat atêq, muuyq adro kadrơơy, tuôôy hloq kơy, yôôych đnooy: \"Ay kung thuôôk truh khơl oot.\" Bơh Phi-e-rơơ đnooy: \"Nee ay, be aalq gô.\"",
  "59": "Kơơh muuyq wat atêq, muuyq adro kadrơơy đnooyq đnooy kajưk đaneq: \"Jơq laa ay neq kung măn kung dii adro hơơq, vii ay nưq kung laa manih Ga-li-lêê.\"",
  "60": "Bơh Phi-e-rơơ đnooy: \"Nee ay hơơq, gô be xet ay đong đnooy kajoq dêq.\" Hloay junưq, đom tuôôy kơy đong măn đnooy, muuyq poop iier pôô rok.",
  "61": "Lôôk wiih hlê 'yo Phi-e-rơơ, ji Phi-e-rơơ vach hlê apok ku Lôôk, đaleq Kadraq heq đnooy dii kơy đaneq: \"Hngơy neen adrooyq tuôôy iier pôô rok, ay hno kadook be xet thơy pe yưk.\"",
  "62": "Ji tuôôy heq hooy vlôh pi gôk, kơy nhim ook kach đong đik. ",
  "63": "Khơl adro jư 'yo Kadraq heq đnooy axap,  hmot dook Kadraq.",
  "64": "Biit mot Kadraq hlê yôôch, biin oot đôôq Kadraq đaneq: \"Đnooy hlit yơu, akơyq laa manih đnaayh kơy?\"",
  "65": "Oot đnooy kung Kadraq 'ngưưng apok ra ơh kadrơơy đnooyq.",
  "66": "Vơơ tuôôy truh xaroq, khơl kadraq đom manih karôp, e khơl thơy tơơk tưp kôt ji khơl thơy pato ganuun, heq taguumq hlê ji oot xagook Kadraq truh Aduq Hnhư Xadrah ku oot,",
  "67": "đnooy: \"Atoh kơy laa Lôôk Wơơt Dêh, dayh đnooy dii 'wot.\" Bơh Kadraq đnooy dii oot: \"Atoh gô dach êêp kơy, dong dik êêp kơy be tuôq;",
  "68": "măn atoh gô e vôôch, dong dik êêp kơy be tơơl hlê.",
  "69": "Bơh xing neen kon hơ, Koot Manih hno 'ngôôy piik akoh ku Kơy Plêêk taay yaak.\"",
  "70": "Jơneq, biin oot raay đnooy: \"Nưq, kơy laa Koot ku Kơy Plêêk ih?\" Yôôch Kadraq đnooy vlôh dii oot: \"Jơq êêp kơy đong đnooy đaneq gô laa Kơy nưq.\"",
  "71": "Nưq laa oot tơơl: \"Haay măn duh dơơp xnưk kajoq đnooyq? Vii jơq haay heq tameen xing huuy ni.\""
}