cor_2020_cua_clt_luk_book/luk/20.json

{
  "1": "Varơuq xlih vlôh muut muuyq hngơy hơơq, tuôôy Kadraq đong pato daay manih karôp đom hnhư hơu ji padoh taboon Hêêl Kaxaay, khơl thơy tơơk tưp kôt ji khơl thơy pato ganuun kung dii khơl karaq hooy truh.",
  "2": "Oot đnooy dii Kadraq đaneq: \"Xiin ăm 'wot xet xing taay yaak leq đơu thơy dơơp kaluh varơuq neq, long akơyq laa manih heq pahnap ka thơy taay yaak neq.\"",
  "3": "Bơh xôq tơơl hlê, Kadraq đnooy dii oot: \"Gô kung hno vôôch êêp kơy muuyq apok, dayh đnooy ka gô:",
  "4": "Phep bap-tem ku Jăng laa xing plêêk long xing koot manih?\"",
  "5": "Nưq laa oot tagêh dii mamuuyq, đnooy đaneq: \"Atoh haay đnooy:' Xing plêêk,' kơy nưq hno vôôch:' Nưq aleq êêp kơy leh tuôq Jăng?'",
  "6": "Măn atoh haay đnooy:' Xing koot manih,' yôôych dêq manih karôp hno tiip phơu haay, vii manih karôp raay tuôq Jăng laa muuyq kơy hlit.\"",
  "7": "Ji yôôch oot tơơl đaneq oot be xet xing 'leq.",
  "8": "Lôôk Jê-xu đnooy dii oot: \"Gô kung leh ăm êêp  kơy xet xing taay yaak leq gô dơơp kaluh varơuq nưq.\"",
  "9": "Yôôch Kadraq xarôp taboon atoh neq ka manih karôp:\" Muuyq dro hơơq pêêt muuyq hluôôt nhoo, ji ăm ka khơl pêêt nhoo xapo ni, yôôch hooy truh dêh kadrơơy đom muuyq kawat xiik.",
  "10": "Truh xiêk varoot, kơy patăk muuyq dro xapok truh kung khơl pêêt nhoo xôq oot hno ataq ăm ka kơy xok xing raay plaay ku hluôôt nhoo. Bơh atêq tuôôy tuu tier, khơl pêêt nhoo heq drưyh ay nưq xuq ti hloh.",
  "11": "Kơy laay patăk ađnooyq muuyq dro xapok kadrơơy truh, bơh ay neq kung anưq, oot heq drưyh ay xuq ti hloh atêq tuôôy tuu tier ji đnooy axaap.",
  "12": "Yôôch kơy laay patăk ađnooyq dro xapok thưq pe truh, bơh oot kung đnayh ay nưq biq xưưl xôh, avih vlôh pi gôk.",
  "13": "Nưq laa, kôôch hluôôt nhoo đnooy:' Gô phayh dơơp kajoq neq? Gô hno patăk koot kanơu xung xiaq ku gô truh. Xet 'leq, oot hno vadoo ni.",
  "14": "Bơh tuôôy khơl pêêt nhoo hloq adro koot, oot tagêh dii mamuuyq, đaneq:' Neq laa adro ta tôôl. Haay dayh păk kaxêêt ni, xôq gruh anôp neq hno ik jêêk vlôh ku haay.",
  "15": "Ji atêq tuôôy xaraak adro koot nưq vlôh pi gôk hluôôt nhoo, oot păk kaxêêt ay nưq. Nưq yôôych, kôôch hluôôt nhoo hno dơơp kajoq dii khơl nưq?",
  "16": "Kơy nưq hno truh păk kaxêêt dêq khơl pêêt nhoo neq ji pahnap hluôôt nhoo ka khơl drơơy.\" Tuôôy tameen anưq, oot đnooy:\" Apôôy ka varơuq nưq leh xlih vlôh.\"",
  "17": "Bơh tuôôy 'yo oot, Kadraq đnooy:\" Nưq, apok heq vlơk neq e iq đaleq:' Kuk Phơu đơu khơl xơơy ka'lăk vlôh, jơq ni jah jêêk vlôh phơu muum hnhư'?",
  "18": "Adro leq klêh tol phơu nưq hnoq biq naat xak. Măn atoh akơyq đơu phơu nưq klêh troq, yôôych ni hno ranieq tonlaa adro nưq.\"",
  "19": "Ji yôôch, khơl thơy pato ganuun kung khơl thơy tơơk tưp kôt axek trôôk xôq păk kaxêêt Kadraq hloay đom wat nưq, đơu oot măn yôq manih karôp, vii oot xet đaneq Kadraq taboon atoh nưq đong đnooy truh oot.",
  "20": "Oot tavooi Kadraq thier kii, oot patăk taleq dro hooy tyauq dơơp bôô kadih laa hyioh jăk, xôq oot hno ik rôp kadrôp Kadraq đom apok xarooy, xôq pahnap Kadraq ka khơl dưk xnưk ji khơl e kwuyên ku padrok dêh.",
  "21": "Khơl adro nưq vôôch Kadraq đaneq: Thơy lơy, 'wot xet nưq laa thơy đnooy ji pato muuyq kach hyioh jăk, be duh xet akơyq, đơu thơy pato dayq tyauq trôôk ku Kơy Plêêk đom hyioh jăk.",
  "22": "Nôôp xơu ka Xê-xaa laa varơuq jơq đôôyq dii haay long be?",
  "23": "Bơh vii nhonq xet varơuq xuum va ih ku oot, Kadraq đnooy dii oot:",
  "24": "\" Ăm Gô ‘yo muuyq đơ-ni-êê. Ni e long lơuq ji hlêêl ku akơyq?\" Oot tơơl: \"Ku Xê-xaa.\"",
  "25": "Nưq laa Kadraq đnooy dii oot: \"Nưq yôôych, dayh bla hlê ka Xê-xaa kaluh kajoq ku Xê-xaa, ji ăm Kơy Plêêk kaluh kajoq ku Kơy Plêêk.\"",
  "26": "Oot be ik rôp apok tơơl nưq adrooyq kangưưr manih karôp ik, ji vii dơơp akêh adrooyq apok tơơl ku Kadraq, oot raay hnhep. ",
  "27": "Atêq nưq, tuôôy taleq adro thuôôk adrơơk Sa-đu-sê hooy truh jeq, nưq laa khơl adro đnooy đaneq leh e varơuq riilh hlê, oot vôôch Kadraq",
  "28": "đaneq: \"Kuh Thơy, Môi-se heq vlơk pôôt ka haay, atoh ay ku adro leq nưq pajêêt kadrê, đơu tuôôy kaxêêt, adro nưq kooq e koot, yôôych ma oh ku dro nưq duh xok adro kadrê vlơu neq ji hno ik pajooy muuyq rong nooy ka ay ni.",
  "29": "Yôôych nưq, hnhư hơơq e pơh oh ay kanau, ji atêq tuôôy xok kadrê, adro ay kaa heq kaxêêt leh e koot;",
  "30": "ji adro thưq vaar,",
  "31": "yôôch adro thưq pe xok nâu; bơh kưq đanưq đơu pơh dro kung be e koot, ji kaxêêt dêq.",
  "32": "Atêq nưq, mư kung kaxêêt.",
  "33": "Nưq yôôych, đom hngơy riilh hlê, mư nưq hno laa kadrê ku akơyq đom khơl oot? Vii dêq pơh dro oh ay raay heq xok mư dơơp kadrê.\"",
  "34": "Lôôk Jê-xu đnooy dii oot: \"Koot xauu đơơy neq yôôych vôôch, pajêêt.",
  "35": "Măn khơl akơyq jah taayh laa taxưnq nhonq jah đơơy atêq ji varơuq riilh hlê xing khơl kaxêêt yôôych leh vôôch kung leh pajêêt. ",
  "36": "Vii oot kung leh hno ik kaxêêt đnooyq, vii oot hno đaji kơy yaak; ji oot laa khơl koot ku Kơy Plêêk, tuôôy laa koot ku varơuq riilh hlê.",
  "37": "Măn truh varơuq manih kaxêêt riilh hlê yôôych hloay đaji Môi-see heq ăm hloq ka aduq pôôp jaliê, tuôôy kơy taayh Lôôk laa Kơy Plêêk ku Ap-ra-ham, Kơy Plêêk ku Y-sak, ji Kơy Plêêk ku Ja-kôp.",
  "38": "Kadraq be aalq laa Kơy Plêêk ku manih kaxêêt, đơu laa ku manih riilh, vii dêq hloay raay riilh đôôyq dii Kadraq.\"",
  "39": "Yôôch tuôôy taleq dro thơy pato ganuun tơơl hlê, oot đnooy:\" Kuh Thơy, Thơy đnooy jơq dik.\"",
  "40": "Oot be hôôk vôôch Kadraq apok leq đnooyq.",
  "41": "Atêq nưq, Kadraq đnooy dii oot:\" Aleq đơu manih oot đnooy Lôôk Wơơt Dêh laa koot Đa-vik?",
  "42": "Vii đom rahlap Thi-Thiên, kadih Đa-vik e đnooy: Lôôk xnoh dii Lôôk gô đaneq:' Dayh ‘ngôôy piik akoh Gô,",
  "43": "dong truh tuôôy Gô dơơp ka khơl tachơơl ku Koot jêêk đool ka jôôk Koot.'",
  "44": "Vii anưq, Đa-vik taayh Kadraq laa ' Lôôk', yôôych dơơp aleq Kadraq laa koot ku vuua nưq ik?\"",
  "45": "Đom tuôôy dêq manih karôp đong tameen, Kadraq đnooy dii khơl xatyauq kadraq:",
  "46": "\"Dayh rơơych rol dii khơl thơy pato ganuun, laa khơl adro trôôch hlưp auu yơơt hooy adauq, trôôch kaluh apok vôôch hrok đom aduq tabôôt xa, ji kaluh aduq 'ngôôy kôt đom hnhư tajauq kung dii aduq yơơt yưk đom waal pajêêt,",
  "47": "đơu oot xa luôt hnhư wah ku khơl mo vlơu, yôôch laay apôôy xiit xôq kahnoq xăk. Khơl adro nưq hno kang nhonq varơuq hmot dook parêq parơh iaq.\" "
}