cor_2020_cua_clt_luk_book/luk/19.json

{
  "1": "Tuôôy heq muut pi'lăp, Kadraq hooy dalơh theng Jê-ri-kô.",
  "2": "Ji dayh 'yo muuyq adro, jah taayh anưng laa Xa-chêê, kơy laa dơơp kôt đom khơl xok xơu, ji kơy nưq karoh e.",
  "3": "Kơy axek trôôk tamaak 'yo Lôôk Jê-xu laa akơyq, đơu kơy be hno dơơp ik xing đom karôp manih, vii kơy e phook manih thier lêq.",
  "4": "Yôôch tuôôy heq chrơơk truh pi adrooyq, kơy tok tol muuyq ưk thung xôq kơy hno ik tamaak hloq Kadraq vii Kadraq jeq hooy dalơh trôôk nưq.",
  "5": "Tuôôy Kadraq hooy truh aduq nưq, 'ngơơk 'yo tok, Lôôk Jê-xu đnooy dii kơy: \"Xa-chêê, dayh pôôt yơu, vii hngơy nen gô duh phayh măn hlê aduq hnhư ku ay.",
  "6": "Nưq laa kơy pơơl wơl pahro pôôt ji hlah hlaak xakaq kôô Kadraq.",
  "7": "Tuôôy hloq đanưq, manih karôp raay ramooy, đnooy đaneq: \"Kơy nưq muut aduq hnhư achung dii muuyq adro e kadrôp.\"",
  "8": "Bơh tuôôy Xa-chê dưk vlôh, kơy tơơl dii Lôôk: \"Kuh Lôôk, xiin 'yo neq, gô ahlook muuyq panoot jêêt mưh ku gô ka khơl adrah, ji atoh gô heq adôô lưưt akơyq thưq kajoq, gô bla hlê glơh poot yưk nưq.\"",
  "9": "Jơneq, Lôôk Jê-xu đnooy dii kơy đaneq: \"Hngơy nen varơuq wơơt xok heq truh dii ma hnhư neq, vii ay neq kung laa koot xau Ap-ra-haam.",
  "10": "Vii Koot Manih heq truh xôq axek ji wơơt manih biq kaxêêt hlơp.",
  "11": "Đong tuôôy oot tameen kaluh apok nưq, Kadraq xarôp taboon muuyq atoh, vii Kadraq đong măn jeq theng Jê-ru-sa-leem, đơu oot biit đaneq daak ku Kơy Plêêk jeq rama  vlôh truh aduq yôôch.",
  "12": "Vii anưq, Kadraq taboon: \"Muuyq dro koot vuaa hơơq hooy truh ma dêh xangưưi xôq kadih xăk nhonq xok kwuyen dơơp vuua yôôch wiit xuq.",
  "13": "Atêq tuôôy taayh kưl adro xapok ku kơy truh, kơy pahnap ka oot kưl mi-na ji đnooy dii oot:' Dayh tabôôt xa đom tuôôy gô hooy xangưưi.'",
  "14": "Bơh manih đom dêh ku kơy 'ya-rơ kơy ji ăm muuyq biin khơl patăk tyauq atêq kơy đnooy: 'Wot be trôôch adro neq dưk xakaq tol ‘wot.'",
  "15": "Varơuq xlih vlôh tuôôy kơy wiit xuq atêq tuôôy nhonq xok kwuyen dơơp vuua, kơy vlôh tanơơn taayh truh tavơh kơy khơl xapok đơu kơy heq ăm jêêt, xôq kơy hno ik xet oot heq dơơp lơơyq jah kajoq xing varơuq tabôôt xa.",
  "16": "Nưq yôôch, adro drooyq dik truh, tơơl:' Kôôch lơy, mi-na ku kơy heq dơơp vlôh athêêp kưl mi-na.'",
  "17": "Kôôch đnooy dii ay nưq:' Xapok kaxaay tamaq, thier ik. Vii ay heq muuyq xuum đom varơuq thier dee, vii anưq ay dayh adrơk kwuyên tol kưl theng.'",
  "18": "Ji adro thưq vaar truh, tơơl:' Kôôch lơơy, mi-na ku kơy heq dơơp vlôh dăp mi-na.'",
  "19": "Yôôch kôôch kung đnooy dii ay neq: Ay dayh dưk xnưk dăp theng.",
  "20": "Muuyq adro hơơq truh, đnooy:' Kôôch lơơy, xiin dayh 'yo mi-na ku kơy đơu gô heq jư, jah anun đom xđneh,",
  "21": "Vii gô yôq kơy, vii kơy laa manih găk. Kơy xok đom aduq kơy leh xôq, ji varoot đom aduq kơy be paraai.",
  "22": "Kôôt dach ay nưq:' ganưq tol apok đnooy ku ay, gô hno xưh xadrah ay, anưng xapok xơk tauq. Ay xet đaneq gô laa manih găk, xok đom aduq gô leh xôq, ji varoot đom aduq gô leh paraai.",
  "23": "Nưq yôôych vii aleq ay le ăm jêêt ku gô muut hnhư tabôôt jêêt, xôq atoh tuôôy wiit xuq, gô kung xok hlê jêêt nưq kung dii vôô?'",
  "24": "Yôôch kơy đnooy dii khơl đong dưk đnư:' Dayh xok mi-na xing adro neq đơu ăm ka adro e kưl mi-na.'",
  "25": "Oot đnooy dii kơy:' Kôôch lơơy, adro nưq đong e kưl mi-na yôôch.",
  "26": "' Gô đnooy ka khơl ay xet, adro leq e hno jah ăm athêêp, bơh xing adro leh e, hno biq xok hloay dêq varơuq ni đong e.",
  "27": "Măn khơl tachơơl ku gô hơơq, laa khơl adro be trôôch gô dưk xakaq tol oot, dayh jarooy oot truh đnen ji păk kaxêêt oot adrooyq kangưưr gô.'''",
  "28": "Atêq tuôôy đnooy kaluh apok nưq, Kadraq hooy ađnooyq pi adrooyq, hooy tok truh Jê-ru-sa-leem.",
  "29": "Varơuq xlih vlôh tuôôy Kadraq hooy jeq truh Bêt-pha-jê ji Bê-tha-ni, truh aduq ngok đoot jah taayh laa Ô-liu, Kadraq patăk vaar dro xatyauq hooy,",
  "30": "dach đaneq:\" Dayh hooy muut ma plơơy kangưưr, tuôôy muut đom nưq, oh ay hno hloq muuyq poop ô lưưa koot biq vek, đơu tol ô lưưa nưq kooq e manih leq tong achoo. Atêq tuôôy luh talơy vek ni, dayh jarooy xuq đnen.",
  "31": "Atoh akơyq nưq vôôch baalq:' Vii aleq baalq luh talơy vek ni?' yôôych baalq hno đnooy đaneq:' Lôôk e varơuq duh jung ni.'\"",
  "32": "Nưq laa, tuôôy vaar adro heq jah patăk vlôh hooy, baalq hloq varơuq daang đaji Kadraq heq đnooy dii baalq. ",
  "33": "Tuôôy baalq đong luh talơy vek ôô lưưa koot, khơl kôôch ô lưưa đnooy dii baalq:\" Aleq baalq luh talơy vek ô lưưa koot vlôh?",
  "34": "Oot tơơl đaneq:\" Lôôk e varơuq duh jung ni.",
  "35": "Yôôch baalq jarooy ni xuq ka Lôôk Jê-xu ji atêq tuôôy hlơơk auu koot ket baalq tol ô lưưa koot, baalq rôôk Lôôk Jê-xu 'ngôôy tol ni.",
  "36": "Tuôôy Kadraq hooy dalơh, manih oot hlơơk aau koot ket ku oot tol trôôk.",
  "37": "Tuôôy Kadraq hooy jeq truh ahmaak đoot Ô-liu yôôch, dêq biin khơl xatyauq karôp xarôp hlah hlaak, kung xarooy kaalh apok ayuôôt laat Kơy Plêêk truh dêq hloay kaluh varơuq taay yaak đơu oot heq hloq, ",
  "38": "đaneq:\" Vanong laa kơy vuua truh đom yal ku Lôôk! Langưưp paat tol plêêk, ji tađnah tađaak tol aduq thier yơơt!\"",
  "39": "Muuyq sôôq manih Pha-ri-sii xing đom biin manih karôp đnooy dii Kadraq: \"Kuh Thơy, xiin toah khơl xatyauq ku thơy.\"",
  "40": "Tơơl hlê oot, Kadraq đnooy: \"Gô dach êêp kơy, đaneq atoh oot hnhep yôôych kaluh phơu neq hno taayh tarok tok.\"",
  "41": "Tuôôy Kadraq heq truh jeq, tuôôy 'yo hloq theng, Kadraq nhim truh ni,",
  "42": "đnooy đaneq:' Jơq kajoq may heq nhonq xet đom hngơy nen, dik jơq may phayh xet, kaluh kajoq tawaay truh hrok hrol! Bơh, kaluh nưq ju neq heq biq kađoq klơlh mot may.",
  "43": "Vii hno e hngơy xlih truh tol may, khơl tachơơl ku may hno xiel raluk rawiit may, oot hno dưk wii may, ji hmot may xing poot gah gih.",
  "44": "Oot hno hmot pahrưp may kung koot xau may măn katuul măn. Yôôch oot hno be xôq hlê muuyq look phơu leq măn choch tol muuyq look phơu kadrơơy măn aduq may, vi may heq leh nhonq xet katuôôy may jah truh hlơq.\"",
  "45": "Yôôch tuôôy muut đom hnhư hơu, Kadraq xarôp drưyh dêq khơl adro tabôôt xa kađnư,",
  "46": "đnooy kung oot:\" E apok vlơk:' Hnhư Gô laa hnhư apôôy,' bơh êêp heq dơơp ni jêêk tapuu ku khơl xa atôk.\"",
  "47": "Tôôy hngơy Kadraq kưq padoh taboon đom hnhư hơu. Măn khơl thơy tơơk tưp kôt, khơl thơy pato ganuun ji khơl dưk xnưk manih karôp heq đong axek trôôk păk kaxêêt Kadraq,",
  "48": "ji oot măn kooq axek jah kach leq đơu oot hno ik dưk dơơp, vii dêq hloay manih karôp raay tameen Kadraq."
}