cor_2020_cua_clt_luk_book/luk/17.json

{
  "1": "Yôôch Kadraq đnooy ji khơl xatyauq kadraq: Varơuq leh hno leh xlih vlôh laa kaluh varơuq dơơp lôôp kadrôp, bơh raơh ka adro leq đơu dalơh ni, kaluh varơuq lôôp kadrôp xlih vlôh!",
  "2": "Dik toolh ka adro nưq atoh đaji muuyq kuk phơu jah vek tol ranong ni, ji ni biq avih pôôt tahli măn iaq laa xôq ni dơơp lôôp kadrôp ka muuyq đom kaluh oh de neq.",
  "3": "Dayh vach jưư xăk! Atoh muuyq adro oh ay êêp lôôp kadrôp, dayh toah adro nưq; ji atoh adro nưq wiit xuum, dayh ka'lăk kadrôp ka ni.",
  "4": "Long adro nưq lôôp kadrôp dii oh ay truh pơh yưk đom hngơy, ji pơh yưk wiit hlê đnooy dii oh ay:' Gô wiit xuum,' yôôych oh ay dayh hno ka'lăk ka ni!\"",
  "5": "Khơl jah rơơlh tơơl dii Lôôk: \"Dayh athêêp xuum tuôq ka ‘wot.\"",
  "6": "Nưq yôôch, Lôôk tơơl: \"Atoh oh ay e xuum tuôq dang muuyq kalong kaxeq avơy, yôôych đaji tuôôy oh ay đnooy dii ưưk thung neq đaneq:' May phayh biq vưưiq ưk tok ji jah pêêt ‘laalq daak tahli,' yôôych ni dik laa phayh tameen tyauq oh ay.",
  "7": "Bơh akơyq đom oh ay e xapok hooy akaay ruôônq long xakaq trưưu xing manaa wiit xuq đơu laay đnooy ka ni:' Truh ‘ngôôy muut para xa hloay'?",
  "8": "Tađôôy muut đnư, leh aalq adro kôôch hno đnooy dii ni:' Dayh adoot waal ka gô xa, ji hnek katêêt may hơu varơuq gô đom tuôôy gô xa hôôch, yôôch atêq kaluh varơuq nưq, ay đơơu jah xa hôôch ih?",
  "9": "Adro kôôch nưq be kahnoq xuum xet vanong kajoq dii adro xapok vii ni heq dơơp kaluh varơuq jah patăk dach, jơq be? ",
  "10": "Oh ay kungh đanưq, tuôôy leq oh ay pa'yôôch kaluh varơuq heq jah patăk ka oh ay, dayh đnooy đaneq:' 'Wot laa khơl xapok be xưnq. 'Wot heq dơơp pa'yôôch varơuq 'wot phayh dơơp.'\"",
  "11": "Varơuq xlih vlôh đom tuôôy đong tol trôôk truh Jê-ru-sa-leem, yôôych Kadraq hooy dalơh dêh jeq akăk Sa-ma-rii ji Ga-li-lêê.",
  "12": "Tuôôy Kadraq muut đom muuyq theng hơơq, kưl adro biq jiq paruh kôô Kadraq, đơu oot dưk xing xangưưi",
  "13": "ji oot lơh apok tơơl: \"Kuh thơy Jê-xu, dayh xuum angơuq ‘wot.\"",
  "14": "Tuôôy 'yo hloq oot, Kadraq dach oot: \"Dayh hooy kahnoq xăk dii khơl thơy tơơk tưp.\" Ji varơuq xlih vlôh đom tuôôy oot hooy, yôôych oot jah xarêh.",
  "15": "Yôôch muuyq adro đom sôôq oot, tuôôy hloq đaneq ni heq jah xarêh, ay wiit xuq hlê, kalh apok ayuôôt laat Kơy Plêêk.",
  "16": "Ni kuu mot pôôt aduq jôôk Kadraq, kuh kway Kadraq. Ay nưq laa muuyq manih Sa-ma-rii.",
  "17": "Nưq laa, tuôôy tơơl hlê, Lôôk Jê-xu đnooy:\" Be aalq dêq kưl dro raay jah xarêh ih? Măn xiit dro hơơq 'leq?",
  "18": "Aleq leh hloq e akơyq wiit hlê ayuôôt laat ka Kơy Plêêk vơ e adro tamooi kadrơơy neq?\"",
  "19": "Yôôch Kadraq đnooy dii ay nưq:\" Dayh dưk tok, ji hooy. Xuum tuôq ku ay heq payơh ay.\"",
  "20": "Tuôôy jah khơl manih Pha-ri-sii vôôch dong leq daak ku Kơy Plêêk hno truh, Kadraq tơơl apok oot, ji đnooy:\" Daak Kơy Plêêk be truh dii varơuq tamaak 'yo hloq ik.",
  "21": "Manih oot kungh hno be đnooy: 'Yo neq, măn đnen! long ' ka hơơq!' Vii, dayh yo neq, daak ku Kơy Plêêk măn pi 'lăp êêp kơy.\"",
  "22": "Yôôch Kadraq đnooy dii khơl xatyauq:\" Hno e kaluh hngơy tuôôy đơu oh ay trôôch 'yo hloq muuyq đom kaluh hngơy ku Koot Manih, đơu oh ay hno leh hloq ik.",
  "23": "Ji manih oot hno đnooy dii oh ay: Hơơ, măn ka hơơq! long: Nee, măn đnen!' Te hooy  truh, kungh te chrơơk tyauq oot,",
  "24": "vii đaji pleek tađnah xing rawaah 'laalq plêêk neq pleek truh rawaah 'laalq plêêk hơơq, yôôych Koot Manih kungh hno đanưq.",
  "25": "Bơh varơuq duh adrooyq dêq ka Kadraq laa chiuq ‘ngưưng pơơl dal ji biq chôôiq ka‘lăk xing adrơơk neq.",
  "26": "Đaji varơuq heq xlih vlôh đaleq đom đơơy Nô-êê, yôôych ni kungh hno đanưq đom đơơy ku Koot Manih.",
  "27": "Manih oot măn xa, hôôch, pajêêt, vôôch - dong truh hngơy Nô-êê muut đom taau, yôôch daak kôt tuih glaay truh ji đôôk hlơp dêq hloay.",
  "28": "Kungh đanưq, đaji varơuq heq xlih vlôh đom đơơy ku Look - manih oot măn xa, hôôch, root, tek, paraay pêêt, xơơy panưk,",
  "29": "bơh muut hngơy Look vlôh klơlh Sô-đôôm, yôôych jich ôôlh ji lưu wiinh xing plêêk xaraak pôôt, yôôch vuh jaq xarêh dêq. ",
  "30": "Varơuq hno xlih truh tyauq kach nưq đom hngơy Koot Manih rama vlôh.",
  "31": "Đom hngơy nưq, akơyq măn tol apoo hnhư đơu gruh anôp ni măn đom hnhư, yôôych te pôôt xôq xok ni; ji kungh đanưq, akơyq măn ma apôh yôôych te wiit xuq dii kaluh kajoq măn hlê.",
  "32": "Dayh vach hlê kadrê ku Look.",
  "33": "Atoh akơyq axek trôôk jư varơuq riilh xăk yôôych hno hlơp ni, bơh atoh akơyq ka'lăk yôôych hno wơơt jah ni.",
  "34": "Thơy đnooy dii oh ay, đom klôôy nưq, hno e vaar adro achung muuyq chanưng, Muuyq adro hno biq xagook hooy, măn adro hơơq hno jah xôq hlê.",
  "35": "Hno e vaar adro apeh vaa đom kung muuyq aduq. Muuyq adro hno biq xagook hooy, măn adro hơơq hno jah xôq hlê.\"   ",
  "36": "Vaar adro ma apôh, muuyq adro hno biq xagook hooy, ji adro hơơq hno jah xôq hlê.",
  "37": "Ji tuôôy tơơl apok, oot đnooy dii Kadraq: \"Kuh Lôôk, măn kaleq nưq?\" Yôôch Kadraq dach oot: \"Manih kaxêêt măn 'leq, xêêp aak kungh hno bu hlê ka đnư.\""
}