cor_2020_cua_clt_luk_book/luk/16.json

{
  "1": "Kadraq kungh đnooy dii khơl xatyauq: E muuyq adro karoh hơơq laa manih e muuyq adro xakaq ‘yo ji ni biq rôp kadrôp dii kôôch vii xa hôôch paxarêh gruh anôp ku kôôch.",
  "2": "Atêq tuôôy taayh ni truh, kôôch đnooy dii ni: Varơuq gô tameen truh ay laa aleq? Dayh đnooy vlôh apok padoh truh varơuq xakaq 'yo ku ay, vii ay be jah dơơp xakaq 'yo đnooyq.'",
  "3": "Nưq yôôch adro xakaq đnooy kadih dii xăk:' Gô phayh dơơp kajoq neq, vii kôôch gô đong xok hlê varơuq xakaq 'yo klơlh gô? Vok vari yôôych gô leh đu paraat, xa rakau yôôych kamưưl dik.",
  "4": "Gô xet gô phayh dơơp kajoq xôq tuôôy biq drưyh klơlh varơuq xakaq 'yo neq, manih oot hno kô-kaq gô muut ma hnhư ku oot.'",
  "5": "Yôôch atêq tuôôy ăm taayh tong adro muuyq đom khơl thieuq lôôkq ku kôôch ni truh, ni đnooy dii adro adrooyq dik:' Ay thieuq lôôkq kôôch gô taleq?'",
  "6": "Adro nưq tơơl: Muuyq hreek huu jơu ô-liiu.' Nưq laa ni đnooy dii adro nưq: adrơk xok jơyq lôôkq ku ay, ‘ngôôy pôôt, dayh vlơk dăp kưl!'",
  "7": "Atêq nưq, ni dach muuyq adro kadrơơy:' Măn ay thiêuq taleq? Adro nưq tơơl: Muuyq hreek drong vaa.' Ni dach adro nưq:' Adrơk jơyq lôôkq ku ay, ji vlơk thơơm kưl.'",
  "8": "Adro kôôch vnê adro xakaq 'yo be tameen nưq vii kơq ni heq dơơp varơuq thier khôôt xet. Vii koot xau ku đơơy neq khôôt xet iaq dii koot xau ku tađnah tađnaak đom adrơơk ku oot.",
  "9": "Măn thơy đnooy dii oh ay, dayh dơơp 'wơơy ka oh ay bơơn jêêt leh hyioh jăk, xôq tuôôy jêêt nưq dêq yôôch, oot hno ik jarooy oh ay muut aduq măn miêk miêk.",
  "10": "Adro leq muuyq xuum đom varơuq thier de yôôych kungh muuyq xuum đom varơuq kôt ji kơyq leh hyioh jăk đom varơuq thier de yôôych kungh leh hyioh jăk đom varơuq kôt.",
  "11": "Vii anưq, atoh oh ay leh jêêk vlôh dik tuôq gmưh đom gruh anôp leh hyioh jăk, akơyq hno pahnap ka oh ay gruh anôp dik?",
  "12": "Ji atoh oh ay leh jêêk vlôh dik tuôq gmưh đom kaluh varơuq thuôôk ku khơl drơơy, akơyq hno ăm ka oh ay kaluh kajoq thuôôk ku kadih oh ay?",
  "13": "Be e muuyq xapok leq hno ik dơơp varơuq ka vaar kôôch, vii xapok nưq hno 'ya rơ kôôch neq đơu xiaq kôôch hơơq, long ni hno vado dii kôôch neq đơu 'yo le ra kajoq kôôch hơơq. Oh ay leh hno hơu varơuq Kơy Plêêk kung ji jêêt baak ik.\"",
  "14": "Tuôôy nưq, khơl manih Pha-ri-sii, laa khơl adro hmưch jêêt baak, tameen dêq kaluh apok nưq, ji oot xagiiel ra ơh Kadraq.",
  "15": "Kadraq đnooy dii oot: \"Êêp kơy laa khơl đnooy vlôh kadih êêp hyioh jăk adrooyq kangưưr khơl drơơy, bơh Kơy Plêêk xet xuum êêp kơy. Vii varơuq vado kôt đom katuul koot manih laay laa varơuq ra'mêq adrooyq kangưưr Kơy Plêêk.",
  "16": "Ganuun ji kaluh apok hlit laa dong truh đơơy ku Jăng. Xing nưq xuq atêq, daak Kơy Plêêk jah padoh taboon, ji tôôy manih xok paraat hooy tawaak muut đnư.",
  "17": "Bơh dik laa klêq iaq ka plêêk ji vari jêêk vlôh hlơp hliil, măn iaq laa muuyq chưh vlơk đom ganuun jêêk vlôh ka'lăk hlơơp.",
  "18": "Dêq hloay adro leq ka'lăk kadrê ni ji pajêêk khơl kadrơơy yôôych lôôp kadrôp puq atrăp, adro pajêêk adro kadrê heq biq ka'lăk dii kanau yôôych kungh lôôp kadrôp puq atrăp.",
  "19": "E muuyq dro karoh hơơq, kơy nưq hlưp kwuaan aau dôôp ji varaay goh ah, tôôy hngơy, xa hôôch agưt tơơl dal.",
  "20": "Măn muuyq dro adrah hơơq anưng La-xa-rơ, xăk xmơk viik ple, jah xagook xôq măn ka 'mok ngoo hnhư manih karoh,",
  "21": "ji trôôch jah xa aduq kaluh thưq klêh pôôt xing tol para manih karoh. Bơh, vơ e kaluh xoo truh lieeh plee ku ay.",
  "22": "Yôôch varơuq xlih vlôh nưq laa adro adrah kaxêêt, ji ay jah kơy yaak xagook truh xuum Ap-ra-haam. Atêq nưq, adro karoh kungh kaxêêt ji kơy nưq jah xagook hooy uup.",
  "23": "Đom aduq kaxêêt, đong tuôôy măn đom jiq jiêh, tuôôy 'ngơơk mot ni tok, kơy nưq hloq Ap-ra-ham măn xing xangưưi, kung dii La-xa-rơơ đom xuum ku kơy.",
  "24": "Kôt apok taayh tarok, kơy nưq đnooy: Mo kơy Ap-ra-ham lơơy, xiin e xuum angơuq koot ji xiin dayh patăk La-xa-rơ xôq ay nưq aruut lôk ti ay muut daak ji dơơp ka langưưp kapiek koot, vii koot thier jiq jiêh đom ôôlh neq.'",
  "25": "Bơh Ap-ra-haam tơơl: Koot lơơy, dayh vach đaneq đom đơơy ku koot, koot heq nhonq phoon toolh ku koot, ji dang đanưq, La-xa-rơơ yôôych nhonq phoon pơơl dal. Bơh juneq ay nưq jah măn aduq tơơl kađnen, măn koot dong chiuq jiq jiêh.",
  "26": "Kung dii dêq hloay kaluh varơuq nưq, măn katuul haay ji koot heq jah xôq muuyq bưk jaruq thier kôt, aleq ka manih leq xung tapa xing neen truh aduq koot laa leh ik, kungh leh ik tapa xing nưq hlê truh aduq haay ik.'",
  "27": "Nưq laa adro karoh đnooy: Mo kơy lơơy, nưq yôôych koot kuh apôôy kơy đaneq kơy hno ik patăk ay nưq truh hnhư vaq ku koot -",
  "28": "vii koot e dăp dro oh ay - xôq ay nưq đnooy dach oot, xôq aleq ka oot kungh hno ik leh phayh hooy truh aduq jiq jiêh neq.",
  "29": "Bơh Ap-ra-ham tơơl: Oot e Môi-se ji khơl kơy hlit; oot phayh tameen tyauq khơl kơy nưq!",
  "30": "Bơh, adro karoh tơơl:' Lup 'leq, kuh mo kơy Ap-ra-haam, bơh, atoh akơyq nưq xing aduq kaxêêt truh dii oot, yôôych oot hno wiit xuum.",
  "31": "Bơh Ap-ra-ham đnooy dii kơy nưq:' Atoh oot be tameen Môi-se ji khơl kơy hlit, yôôych atoh e kơyq nưq xing aduq kaxêêt riilh hlê, oot kungh hno be tuôq.\"'"
}