See in Reader
62 lines
9.7 KiB
JSON
62 lines
9.7 KiB
JSON
{
|
||
"1": "Đom tuôôy nưq, tuôôy biin karôp ravơu manih anguk hlê truh nôih joaq jalon tok mamuuyq, yôôych adrooyq dik, Kadraq xarôp đnooy dii khơl xatyauq kadraq: \"Dayh rơơych rol jư 'yo xăk xamơk klơlh tape ku manih Pha-ri-si, 'ngưq laa katiik varơuq dơơp bôô. ",
|
||
"2": "Bơh be e varơuq kajoq biq kadook đơu hno leh jah kahnoq vlôh, long padu kadook đơu hno leh biq khơl drơơy xet.",
|
||
"3": "Vii anưq, atoh kaluh kajoq đơu oh ay đnooy đom kamưưng jaluk hno jah tameen aduq tađnah, ji kaluh kajoq oh ay đnooy aduq trop tôôr đom muum kinq hno jah đnooy vlôh tol apoo hnhư.",
|
||
"4": "Bơh, thơy đnooy dii oh ay laa khơl 'wơơy ku thơy, te biq varaar yôq xing khơl păk kaxêêt xăk xmơk, yôôch atêq nưq be măn kajoq xôq dơơp iaq ik đnooyq.",
|
||
"5": "Bơh thơy hno kahnoq vlôh ka oh ay xet phayh yôq akơyq. Dayh yôq Kơy, atêq tuôôy heq păk kaxêêt xăk xamơk, e kwuyên avih oot muut aduq ôôlh jaq hloay. Jơq, thơy đnooy dii oh ay, dayh kuh yôq Kơy nưq. ",
|
||
"6": "Be aalq dăp poop xêêp varek tek jah vaar kapah jêêt ih? Đơu be e muuyq poop xêêp leq đom sôôq ni laa biq tawơơl adrooyq kangưưr Kơy Plêêk.",
|
||
"7": "Vii anưq đơu hlôôk tol akoq oh ay tabơh heq jah jauq dêq. Te yôq: oh ay măn kôt glơh iaq xêêp varek. ",
|
||
"8": "Thơy đnooy dii oh ay atoh akơyq dơơp xnưk thơy adrooyq kangưưr koot manih, yôôych Koot Manih kungh hno dơơp xnưk adro nưq kangưưr khơl kơy yaak ku Kơy Plêêk,",
|
||
"9": "Măn akơyq chôôiq ka'lăk thơy adrooyq kangưưr koot manih yôôych hno biq chôôiq ka'lăk kangưưr khơl kơy yaak ku Kơy Plêêk.",
|
||
"10": "Ji dêq hloay adro leq đnooy apok tachơơl kung Koot Manih hno jah ka'lăk, bơh dii adro đnooy tơơk dalơh truh Kơy Phool Hiel hno be jah ka'lăk 'leq.",
|
||
"11": "Bơh tuôôy manih oot jarooy oh ay truh kaluh hnhư taguumq, khơl padrok xadrah ji khơl padrok xnưk, te biit oh ay phayh đnooy waak kadih dong đaleq long varơuq kajoq, long oh ay phayh đnooy kajoq, ",
|
||
"12": "vii đom jơq wat nưq, Kơy Phool Hiel hno pato oh ay kaluh apok duh đnooy.\"",
|
||
"13": "Atêq nưq, muuyq dro đom manih karôp đnooy dii Kadraq: \"Thơy lơơy, xiin dach ay gô ahlook gruh anôp ka gô.\"",
|
||
"14": "Bơh Kadraq tơơl dii adro nưq: \"Nee ay, akơyq xôq gô dơơp padrok xưh xadrah long manih dưk katuul ahlook gruh anôp ka khơl ay?\"",
|
||
"15": "Yôôch Kadraq đnooy dii oot: \"Dayh rơơych rol ji jư xăk klơlh kaluh katiik hmưưch trôôch, vii varơuq riilh ku muuyq adro be măn aduq varơuq glơh glaay ku gruh anôp ni.\" ",
|
||
"16": "Ji ađnooyq, Kadraq taboon ka oot muuuyq atoh đaneq: \"Aloq ruôônq ku muuyq dro karoh e hơơq vlôh ‘ngưưng plaay dik,",
|
||
"17": "ji ay biit đom xuum đaneq: Gô hno dơơp kajoq neq, vii gô be măn aduq xôq tađnưk dêq raak plaay ku gô?",
|
||
"18": "Ay đnooy: Gô hno dơơp đaneq: Gô hno phôôh ka'lăk kaluh pơơ duut gô, xơơy kaluh pơ kadrơơy kôt iaq, ji tađnưk muut đnư dêq hloay vaa kung dii kaluh gruh anôp toolh ku gô.",
|
||
"19": "Yôôch gô hno đnooy dii phool hiel gô: Phool hiel lơơy, maay heq e ‘ngưưng gruh anôp xôq deng ka ‘ngưưng xanưưm. Dayh padơơy padoo, xa, hôôch ji hlah hlaak.\"",
|
||
"20": "Bơh Kơy Plêêk xnoh dii ay nưq: ' Adro vlôô hơơq, đom klôôy neen phool hiel maay biq vôôch hlê, yôôch kaluh kajoq đơu maay heq dơơp vlôh hno xôq ka akơyq?'",
|
||
"21": "Adro tagop xôq gruh anôp ka ni đơu be karoh e đom Kơy Plêêk kungh đanưq.\"",
|
||
"22": "Yôôch Kadraq đnooy dii khơl xatyauq kadraq: \"Vii kơq nưq, thơy đnooy dii oh ay, te xôôl dôl truh varơuq riilh oh ay, hno xa kajoq - kungh te lo truh xăk xamơk oh ay, hno hlưp kajoq.",
|
||
"23": "Vii varơuq riilh laa glơh iaq tuôông xa, ji xăk xamơk glơh iaq kwuan auu.",
|
||
"24": "Dayh ‘yo xêêp aak, nưq laa ni be pêêt kung be goch, be e aduq xôq long pơơ tađnưk deng ka ni, đơu Kơy Plêêk vach ni. Oh ay kôt glơh iaq proh xêêp xet dong leq!",
|
||
"25": "Bơh, akơyq đom oh ay, gmưh lo biit, hno ik dơơp yơơt athêêp ka đơơy riilh oh ay muuyq axich traa be?",
|
||
"26": "Nưq, atoh oh ay măn leh dơơp ik vơ muuyq varơuq thier de nưq, yôôych aleq oh ay laay lo biit truh kaluh varơuq kadrơơy?",
|
||
"27": "Dayh 'yo raak ruay - kach ni vlok tok daang aleq. Ni be dơơp pơơl gleh, kungh leh duui varaay. Bơh thơy đnooy kung oh ay, hloay kaah vuua Sa-lô-môn, dii dêq hloay tađnah tađnaak ku vuua nưq, kungh le jah hlưp aau kaxaay đaji muuyq raak leq đom adrek nưq.",
|
||
"28": "Wơơy adro axich xuum tuôq, atoh Kơy Plêêk măn pahlưp đanưq ka raak rek pi gôk laa adrek hngơy neen măn hngơy dơh biq avih muut đom ôôlh, yôôych oh ay măn kôt glơh iaq laa dong leq. ",
|
||
"29": "Oh ay te axek oh ay xa kajoq ji hôôch kajoq, kungh te lo biit.",
|
||
"30": "Vii kaluh tamooi tol dêh araak ragơy 'ngưưng axek kaluh varơuq neq, bơh Vaq ku oh ay heq xet đaneq oh ay duh kaluh varơuq nưq. ",
|
||
"31": "Bơh, dayh axek daak dêh ku Kadraq, yôôych kaluh varơuq nưq hno jah ăm athêêp ka oh ay.",
|
||
"32": "Bơơy trưưu de lơơy, te yôq, vii Vaq ku oh ay ahyơơl xuum kahniq daak dêh ka oh ay.",
|
||
"33": "Dayh tek gruh anôp ku oh ay ji hooy ahlook ka khơl adrah. Dayh root ka êêp kaxui be hlơu hyaak - 'ngưq laa gruh anôp leh hlơu hlơơp măn tol plêêk, laa aduq adro atôôk be truh jeq, valaak kamoor kungh be kek hyaak ik.",
|
||
"34": "Vii gruh anôp oh ay măn ka‘leq yôôych xuum klaak oh ay kungh hno măn kađnư.",
|
||
"35": "Katêêk ku oh ay phayh jah hnek hlê, kung dii đeen phayh jah jư ka tađnah,",
|
||
"36": "ji oh ay dang đaji khơl adro đong takôô kôôch ku oh ay tuôôy kơy wiit xuq xing waal pajêêt, xôq atêq tuôôy truh ji pah amok, oot nhăp hno ik luh ka kôôch.",
|
||
"37": "Vanong ka khơl adro xapok nưq laa khơl adro đơu atêq tuôôy xuq truh, kôôch hno hloq khơl xapok đong parol. Dong dik, thơy đnooy dii oh ay đaneq kôôch hno hnek katêêk kôôch, ji mơơy oot 'ngôôy muut para xa, yôôch kôôch hơu varơuq oot tuôôy hooy dalơh tong dro.",
|
||
"38": "Hloay kaah tuôôy kôôch truh đom wat vaar, long tabơh muut wat pee, ji kôôch hno ik hloq đanưq, yôôych vanong ka khơl xapok nưq.",
|
||
"39": "Bơh phayh xet hlolh đaneq, nưq laa atoh kôôch hnhư heq xet wat leq adro atôk truh, yôôych kơy kajưk dik leh xôq hnhư ni biq acheo muut.",
|
||
"40": "Oh ay kungh phayh talăng jăk, vii muut kawat đơu oh ay leh biit truh, yôôych Koot Manih hno truh.\"",
|
||
"41": "Yôôch Phi-e-rơơ tơơl: \"Kuh Lôôk, Kadraq đong taboon atoh neq ka ‘wot, long kungh ka tôôy manih?",
|
||
"42": "Ji Lôôk tơơl: \"Nưq yôôych, akơyq laa adro ‘yo xakaq hyioh jăk, khôôt xet, laa adro đơu kôôch hno xôq xakaq măn taalh khơl xapok ku ni, xôq ahlook ăm phoon tuôông xa ka oot muut troq kawat?",
|
||
"43": "Vanong ka xapok nưq, laa dro đơu kôôch ni, tuôôy truh 'yo, hno hloq đong dơơp jơq đanưq.",
|
||
"44": "Dong dik, thơy đnooy dii oh ay đaneq kôôch hno xôq ka xapok nưq xakaq 'yo padêq gruh anôp ku ni.",
|
||
"45": "Bơh atoh xapok nưq đnooy đom xuum ni, đaneq:' Kôôch gô măn donq leq đơơu xuq,' vii anưq xarôp tuu tieer khơl xapok kanơu ji xapok kadrê, vơơ xa vơơ hôôch, yôôch biq vuul weel,",
|
||
"46": "yôôych kôôch ku xapok nưq hno xuq truh đom hngơy đơu ni leh biit truh, jơq, muut wat đơu ni leh xet, ji kôôch hno tachieh xăk ni, yôôch xôq ka ni muuyq jaa dii khơl be tameen.",
|
||
"47": "Xapok nưq, laa adro xet xuum biit kôôch ni đơu leh laayq ralauq long dơơp tyauq xuum biit kôôch, hno biq hmot dook 'ngưưng.",
|
||
"48": "Măn xapok be xet đơu dơơp varơuq đanq hmot hno biq dook axich. Bơh, akơyq, laa adro heq jah kahni ăm 'ngưưng, yôôych 'ngưưng varơuq hno biq vôôch hlê aduq adro nưq, ji đôôiq dii akơyq heq jah pahnap ăm 'ngưưng, kaluh kajoq hno biq vôôch hlê aduq adro nưq laay kang 'ngưưng iaq.",
|
||
"49": "Thơy heq truh xôq avih ôôlh pôôt ka vari, ji thơy trôôch xung varơuq kajoq atoh ni heq jaq rahưk jaq yôôch.",
|
||
"50": "Bơh Thơy măn phayh chiuq muuyq phep bap-teem, ji thơy hlu xuum xet don leq dong truh tuôôy ni jah pa'yôôch!",
|
||
"51": "Oh ay biit đaneq thơy truh xôq xagook varơuq hrok hroor ka dêh araak ih? Lưp 'leq, thơy đnooy dii oh ay, jơq iaq laa varơuq aklah vlôh.",
|
||
"52": "Vii xing neen, hno e dăp adro đom muuyq poop hnhư biq aklah vlôh mamuuyq, pee adro tachơơl hlê vaar ji vaar adro tachơơl hlê pee.",
|
||
"53": "Oot hno biq aklah vlôh, vaq tachơơl hlê koot kanơu ji koot kanơu tachơơl hlê vaq, miq tachơơl hlê koot kadrê ji koot kadrê tachơơl hlê miq, mo tachơơl hlê amưưy ni ji amưưy tachơơl dii mo.\"",
|
||
"54": "Yôôch Kadraq kungh đnooy dii manih karôp: \"Tuôôy oh ay hloq muuyq đum kluk rama vlôh aduq mot hngơy lôôp, oh ay hloay dach đaneq:' Muuyq đơơt jich đong truh,' ji varơuq xlih vlôh jơq đanưq. ",
|
||
"55": "Măn tuôôy khiel pi naam klôôp, oh ay đnooy đaneq:' Hnoq e tôq xaal,' yôôych varơuq xlih vlôh đanưq.",
|
||
"56": "Khơl adro dơơp bôô! Oh ay xet padoh hlolh kaluh phôôm ku plêêk ji ku vari, bơh aleq oh ay leh hlolh xet xôq padoh hlolh katuôôy juneq? ",
|
||
"57": "Aleq oh ay kungh leh xưh xadrah kadih xăk varơuq kajoq laa jơq?",
|
||
"58": "Vii hloay tuôôy oh ay đong hooy kung dii adro kiênq oh ay truh khơl padrok xadrah, dayh dơơp dêq paraat xôq padoh hlolh kaluh varơuq dii adro nưq tol trôôk hooy, xôq oot be huq jarooy oh ay truh padrok xưh xadrah, yôôch padrok xưh xadrah pahnap oh ay ka biin kuun, ji biin kuun rôp karuk oh ay muut hnhư tuu. ",
|
||
"59": "Gô đnooy dii oh ay, kajưk dik oh ay hno leh hlơu vlôh klơlh hnhư tuu dong truh tuôôy oh ay blaa dêq kapah jêêt măn thiêuq.\""
|
||
}
|