cor_2020_cua_clt_luk_book/luk/10.json

{
  "1": "Atêq kaluh varơuq nưq, Lôôk kungh rơơlh pơh kưl vaar dro kadrơy đnooyq, ji patăk oot ta vaar ta vaar hooy adrooyq kangưưr Kadraq truh tôôy theng ji kaluh aduq đơu jơq Kadraq jeq truh.",
  "2": "Kadraq đnooy dii oot: \"Ju siêk goch yôôych dik troq, bơh khơl varoot yôôych thier axiich. Nưq dayh apôôy vôôch Lôôk ku siêk goch xôq Kadraq patăk khơl varoot muut đom xiêk varoot ku Kadraq.",
  "3": "Dayh hooy. 'yo hơơq, thơy patăk oh ay hooy đaji ôôq trưưu koot măn katuul bơơy xo vari.",
  "4": "Te xagook tyauq jêêt, kaxui hooy tyauq trôôk, kaxôp, ji te vôôch hlơq akơyq tol trôôk hooy.",
  "5": "Atoh hnhư leq oh ay tawaak muut, adrooyq dik dayh đnooy: Hrok hrool ka hnhư neq.",
  "6": "Atoh koot ku varơuq hrok hrol măn đnư, yôôych varơuq hrok hrol ku oh ay hno truh tol adro nưq; măn atoh lup, ni hno wiit xuq dii oh ay.",
  "7": "Dayh kưq măn hlê đom ma hnhư nưq, xa ji hôôch kaluh kajoq nhonq xing oot, vii adro dơơp kôông đanq jah kôông jêêt ni. Te hooy xing hnhư neq hlê hnhư hơơq.",
  "8": "Atoh theng leq oh ay hooy muut ji oot tiip đonq oh ay, dayh xa kaluh kajoq jah adoot vlôh ka oh ay,",
  "9": "dayh payơh manih jiq măn kađnư, ji đnooy dii oot, Daak Kơy Plêêk heq truh jeq đôôyq dii oh ay.'",
  "10": "Măn atoh theng leq oh ay hooy muut đơu oot be tiip đonq oh ay, yôôych atêq tuôôy hooy vlôh ma trôôk ku theng nưq, dayh đnooy:",
  "11": "Hloay kaah thuul vari aduq theng ku êêp tagăp tol plaa jôôk 'wot, yôôych 'wot tapolh dong xarêh xôq tachơơl hlê êêp! Bơh dayh xet varơuq neq, nưq laa daak ku Kơy Plêêk heq jeq truh.'",
  "12": "Thơy đnooy dii oh ay đaneq đôôyq dii theng Sô-đôôm muut đom hngơy nưq, ni hno pơq kadrôp ahyơơl iaq theng nưq.",
  "13": "Ra ơh ka may, theng Kô-ra-xin! ra ơh ka may, theng Bêk-sai-đaa! Vii atoh kaluh varơuq taay yaak, đơu ni dơơp vlôh đom katuul êêp, heq jah ăm xlih vlôh aduq Ty-rơơ ji Si-đôôn, yôôych oot dong dik heq wiit xuum, tuôôy 'ngôôy đom vlo kung dii aau jaliê dong axiik yôôch.   ",
  "14": "Vii anưq, hno đanq ka'lăk kadrôp ka Ty-rơ ji Si-đôn đom varơuq xưh xadrah iaq ka êêp.",
  "15": "Măn may, Ka-bê-na-um, may biit may hno jah tơơk tok truh tol plêêk? May hno biq taluq pôôt truh aduq kaxêêt.",
  "16": "Manih chiuq tameen oh ay laa chiuq tameen thơy, ji manih ka'lăk oh ay laa ka'lăk thơy, bơh manih ka'lăk thơy laa ka'lăk Kơy heq patăk thơy.\"",
  "17": "Yôôch pơh kưl vaar dro xatyauq wiit xuq dii varơuq hlah hlaak, tơơl: \"Kuh Thơy, đom yal Kadraq, hloay kaah kaluh kamuuych kungh chiuq tameen adrooyq 'wot.\"",
  "18": "Bơh Kadraq đnooy dii oot: \"Thơy heq hloq Sa-tan xing plêêk xarak pôôt đaji pliek.",
  "19": "Dayh 'yo, thơy heq kahniq ka oh ay taay yaak xôq joaq jalon tol volh ji dinh dip, kung taalh dêq hloay kwuyên ku khơl tachơơl, vii anưq kajưk dik leh e dêq hloay varơuq kajoq hno ik dơơp ra-ơh oh ay.",
  "20": "Bơh, te hlah hlaak truh varơuq nưq, 'ngưq laa varơuq kaluh kamuuych heq tameeng adrooyq oh ay, đơu dayh hlah hlaak vii anơng ku oh ay heq jah vlơk tol daak Kơy plêêk.\"",
  "21": "Aduq kawat nưq, Kadraq thier hlah hlaak đom Kơy Phool Hiel ji đnooy: \"Kuh Vaq, laa Lôôk ku plêêk ji vari, koot ayuôôt laat Vaq vii Vaq heq padu kinq kaluh varơuq neq klơlh khơl khôôt xet ji khơl manih hlolh xet, đơu Vaq heq kahnoq vlôh ni ka oh de. Kuh Vaq, jơq, vii đanưq laa varơuq kaxaay tamaq adrooyq kangưưr Vaq.\"",
  "22": "\" Tôôy varơuq heq jah pahnap ka koot xing Vaq ku koot, be e kơyq xet Koot laa akơyq vơ e Vaq, ji be e kơyq xet Vaq laa akơyq vơ e Koot ji manih leq đơu Koot xung kahnoq vlôh.",
  "23": "Yôôch atêq tuôôy wih hlê kon khơl xatyauq,  Kadraq đnooy dii đêh oot: \"Vanong ka mot hloq varơuq đơu oh ay hloq.",
  "24": "Vii thơy đnooy ka oh ay xet đaneq ‘ngưưng kơy hlit ji vuaa heq trôôt hloq varơuq đơu oh ay hloq, bơh be hloq ik, ji tameen varơuq oh ay tameen, đơu be tameen ik.\" ",
  "25": "Ji hơơq, muuyq thơy pato gnuun hơơq dưk tok  xôq vôôch athưh Kadraq, tuôôy đnooy: \"Thơy lơơy, gô hno nhonq jah varơuq riilh hloay hloay tuôôy dơơp varơuq kajoq?\"",
  "26": "Bơh Kadraq đnooy dii kơy nưq: Varơuq kajoq jah vlơk đom ganuun? Kơy đok hloq đaleq?\"",
  "27": "Tuôôy tơơl, kơy nưq đnooy: Koot phayh xiaq Lôôk laa Kơy Plêêk ku koot dii dêq hloay xuum klaak koot, dii dêq hloay phool hiel koot, dii dêq hloay paraat kalh koot, dii dêq hloay ngook biit koot, ji phayh xiaq manih gah gih ku koot đaji kadih koot.\"",
  "28": "Nưq laa Kadraq đnooy dii kơy: \"Kơy tơơl jơq dik. Dayh dơơp đanưq yôôych kơy hno riilh.\"",
  "29": "Bơh vii xung kahnoq ni hyioh jăk, kơy nưq tơơl dii Lôôk Jê-xu: \"Bơh akơyq laa manih gah gih ku gô?\"",
  "30": "Yôôch xôq tơơl, Lôôk Jê-xu đnooy: \" Muuyq adro hơơq đong hooy xing theng Jê-ru-sa-lem aloh theng Jê-ri-kô, yôôych ay tavơh khơl xa atôk, laa khơl xok xarêh dêq kwuân auu ay ji atêq tuôôy hmot ka xưưr xôh, biin oot ka'lăk hooy, paq kê ay panoot riilh panoot kaxêêt.",
  "31": "Đom varơuq tavơh, muuyq thơy tơơk tưp hơơq đong hooy aloh trôôk nưq, ji tuôôy 'yo hloq ay, kơy nưq wek hlê pi gah hơơq.",
  "32": "Kung anưq, muuyq manih Lê-vii, tuôôy hooy truh aduq neq ji hloq adro biq nanq, manih nưq kungh wek hlê pi gah hơơq.",
  "33": "Bơh muuyq dro manih Sa-ma-rii hơơq, đom tuôôy hooy ma trôôk, heq truh aduq dro biq nanq, ji tuôôy ‘yo hloq, yôôych ay nưq arơơk xuum angơuq.",
  "34": "Tuôôy heq truh jeq, ay boo aduq jiq ku adro biq nanq, tôh jơu ji lok paraa. Atêq tuôôy rôôk adro jiq tok ôôq ahleh ku ay, ay jarooy dro nưq truh muuyq hnhư padơơy ji paxêêk ka dro neq.",
  "35": "Truh hngơy atêq, tuôôy xok vlôh vaar đơ-ni-ê, ay ăm ka kôôch hnhư padơơy ji dach: \"Dayh ‘yo paxêêk ay nưq, ji atoh kơy phayh jung 'ngưưng iaq dêq hloay thưq kajoq, yôôych tuôôy gô wiit hlê, gô hno blaa hlê ka kơy.'",
  "36": "Kơy biit akơyq đom pee dro nưq heq jêêk vlôh manih gah gih dii manih biq đnayh muut đom ti khơl atôk?\"",
  "37": "Kơy nưq tơơl: \"Adro heq kahnoq xuum angơuq deng ka manih jiq.\" Nưq laa Lôôk Jê-xu dach kơy: \"Kơy dayh hooy ji dơơp đanưq.\"",
  "38": "Tuôôy oot hooy ma trôôk, Kadraq muut đom muuyq plơy hơơq, ji muuyq dro mư hơơq anơng Ma-thê xakaq đonq Kadraq.",
  "39": "Mư e ma oh kadrê anơng Ma-ri, 'ngôôy aduq jôôk Lôôk Jê-xu, tameen apok Kadraq.",
  "40": "Bơh Ma-thê đong biq tawaq dii thier ‘ngưưng varơuq ralauq, yôôch mư truh tơơl: \"Kuh Lôôk, Kadraq be nhonq hloq đaneq ma oh gô xôq gô muuyq dro dơơp varơuq ih? Vii anưq, xiin dach ma oh gô, xôq ni hno ik waak gô.\" ",
  "41": "Bơh, tuôôy tơơl hlê, Lôôk đnooy dii mư: \"Ma-thê lơơy, Ma-thê, mư lo biit ji biq xôôl dôôl truh ‘ngưưng varơuq,",
  "42": "bơh vơ e muuyq varơuq laa duh dik heq. Vii Ma-rii heq rơơlh ưng tơơl dik, laa ưng hno leh biq xok hlơp klơlh mư nưq.\""
}