cor_2020_cua_clt_jhn_book/jhn/9.json

{
  "1": "Yôôych đong tuôôy hooy trôôk, Kadraq hloq muuyq dro apuul xing tuôôy đơơu pa iir.",
  "2": "Khơl xatyauq Kadraq vôôch Kadraq đaneq:\" Ra-bi, kơyq heq lôôp kadrôp, ay nưq long miq vaq ay nưq, xôq yôôych ay đơơu pa iir vlôh heq apuul?\"",
  "3": "Lôôk Jê-xu tơơl hlê: \" Leh aalq ay nưq lôôp kadrôp, kung leh aalq miq vaq ay nưq, bơh nưq laa xôq varơuq dơơp ku Kơy Plêêk jah kahnoq vlôh aduq ay nưq.",
  "4": "Neq laa varơuq kơơn duh ka haay xôq dơơp varơuq dơơp ku Kơy patăk dăt thơy đom tuôôy măn ka hngơy. Klôôy jeq truh laa tuôôy be kơyq hnoq ik dơơp varơuq ik.",
  "5": "Đom tuôôy thơy măn đom dêh araak, thơy laa xaraal tađnah ku dêh araak.\" ",
  "6": "Atê katuôôy đnooy toleq apok nưq, Kadraq kaxôh pôôt vari, ji dii daak dieeu, Kadraq anhơơu jêêk wưk, yôôych paraa ka ay nưq wưk nưq tol mot ku ay.",
  "7": "Kadraq đnooy dii ay:\" Dayh hooy, a'nhau aduq hlôôk daak Si-lô-ê\" ( ni iq laa ' Jah Patăk Hooy'). Vii anưq, ay hooy ji a'nhau mot, yôôych tađnah  mot hlê.",
  "8": "Xatyauq nưq, khơl adro đom plơơy ji khơl manih 'yo hloq ay nưq drooyq neq, xing tuôôy ay laa muuyq dro vôôch xa, oot đnooy:\" Be aal neq laa adro 'ngưưng 'ngôôy vôôch xa ih?\"",
  "9": "Muuyq sôôq đnooy đaneq:\" Nưq laa ay nưq.\" Sôôq kadrơơy yôôch đnooy: \" Leh aalq 'leq, lunưq, dro nưq yôôch dang ay nưq.\" Ay yôôch kưq đnooy đaneq: \" Jơq laa gô.\"",
  "10": "Lunưq, oot đnooy dii ay:\" Dơơp đaleq mot ay tađnah ik?\"",
  "11": "Ay nưq tơơl hlê:\" Manih jah tayh laa Jê-xu heq anhơu wưk ji paraa mot gô, yôôych dăt gô đaneq:' Dayh hooy truh Si-lô-ê ji a'nhauu.; Lunưq, atêq katuôôy hooy ji a'nhauu, gô 'yo hloq ik.\"",
  "12": "Oot đnooy dii ay:\" Adro nưq măn 'leq?\" Ay nưq tơơl:\" Gô leh xet.\"",
  "13": "Oot jarooy ay nưq, adro adrooyq neq biq apuul, truh aduq khơl manih Pha-ri-si.",
  "14": "( Tuôôy nưq laa hngơy Padơơy, Lôôk Jê-xu heq a'nhơu wưk ji luh mot ku ay nưq muut ka hngơy nưq.)",
  "15": "Xatyauq nưq, khơl manih Phi-ra-si laay kung vôôch ay dơơp aleq đơu ay ik tađnah mot. Yôôych ay nưq đnooy dii oot:\" Kơy nưq paraa wưk tol mot gô, ji gô hooy 'nhauu yôôych hloq ik.\"",
  "16": "Atêq nưq, toq leq dro đom sôôq khơl manih Pha-ri-si đnooy:\" Adro neq leh thuôk xuq Kơy Plêêk, vii ni leh tameen jưư hngơy Padơơy.\" Sôôq kadrơơy yôôych đnooy:\" Dơơp aleq muuyq dro, laa adro e kadrôp, hnoq ik dưk dơơp kaluh dơuq akêh luneq?\" Ji yôôych e varơuq aklah vlôh đom khơl oot.",
  "17": "Lunưq oot vôôch ay apuul yưưk traa: \"Ay đnooy kajoq truh kơy nưq, xing tuôôy kơy nưq heq luh mot ay?\" Yôôych anưq, ay đnooy đaneq:\" Kơy nưq laa muuyq kơy hlit.\"",
  "18": "Vii anưq, Manih Jo Thaiq leh tuuôq varơuq truh ay đaneq ay nưq heq hmưq apuul đơu 'yo hloq ik, miek truh tuôôy oot dăt tayh miq vaq ku ay nưq, laa adro heq yơh hlê klong mot.",
  "19": "Oot vôôch miq vaq ay đaneq:\" E jơq neq laa koot ku mo kơy, adro đơu mo kơy đnooy laa đơu jah pa iir heq apuul? Anưq yôôch, dơơp luleq juneq ay nưq hloq ik?\"",
  "20": "Anưq laa miq vaq ku ay tơơl hlê ji oot đnooy:\" 'wot 'yo xet đaneq neq laa koot kanơu 'wot, ji đaneq ni jah pa iir vlôh heq apuul.",
  "21": "Bơh juneq, dơơp đaleq ni 'yo hloq ik, 'wot leh xet, long kơyq heq luh mot ku ni, 'wot leh xet. Dayh vôôch ni; ni heq kôt yôôych. Ni hnoq kadih đnooy ka ni.\"",
  "22": "Miq vaq ay đnooy toq leq apok lunưq vii oot yôq manih Jo Thaiq. Bơyh manih Jo Thaiq heq athêêk adroyq yôôych, đaneq atoh adro leq xưng nhonq Kadraq laa Lôôk Wơơt Dêh, yôôych adro nưq biq pađuôy klơlh hnhư hơu.",
  "23": "Vii kơq nưq, miq vaq ay heq đnooy đaneq:' Ni heq kôt yôôych, dayh vôôch ni.\"",
  "24": "Lunưq, truh yưưk vaar, oot dăt tayh adro đơu heq hmưq biq apuul ji đnooy dii ay:\" Dayh tưp tađnah tađnaak ka Kơy Plêêk. Haay xet đaneq dro nưq laa muuyq dro e kadrôp.\"",
  "25": "Anưq yôôych ay nưq tơơl:\" Kơy nưq laa adro e kadrôp long leh, gô leh xet. Gô xet muuyq varơuq, nưq laa long biq apuul, bơh juneq gô 'yo hloq ik.\"",
  "26": "Xatyauq nưq, oot đnooy dii ay:\" Adro nưq heq dơơp kajoq ka ay? Kơy nưq heq luh mot ay đaji luleq?\"",
  "27": "Ay tơơl hlê oot:\" Gô heq taboon ka êêp kơy yôôych, đơu êêp kơy leh tameen! Aleq êêp kơy trôôch tameen hlê đnoyq? Be aalq êêp kơy kung trôôch jah dơơp khơl xatyauq ku kơy nưq ih?\"",
  "28": "Ji yôôych oot toah đnooy ay ji đnooy:\" Ay đơơu laa khơl xatyauq ku adro nưq, măn 'wot laa khơl xatyauq ku Môôi-se.",
  "29": "'Wot xet đaneq Kơy Plêêk xanoh dii Môôi-se, bơh dro neq, 'wot leh xet laa xing leq truh.\"",
  "30": "Adro khơl kanơu tơơl hlê ji đnooy dii oot;\" Juneq yôôych varơuq neq đơu laa 'yo akêh, đaneq kơy nưq heq luh mot gô đơu êêp kơy leh xet kơy nưq laa xing leq truh.",
  "31": "Haay xet đaneq Kơy Plêêk leh tameen apok khơl adro kadrôp maroh, bơh atoh adro leq e xuum kuh kuul ji dơơp tyauq iq trôôch Kadraq, yôôych Kadraq tameen apok dro nưq.",
  "32": "Xing tuôôy hnu, koq hmưq jah tameen varơuq muuyq dro leq luh mot ku adro apuul xing tuôôy đơơu pa iir.",
  "33": "Atoh dro neq leh aalq laa xing Kơy Plêêk, yôôych dro nưq be ik dơơp ik paq kêê varơuq kajoq?\"",
  "34": "Oot tơơl hlê ji đnooy ka ay:\" Ay xaleep jah pa iir vlôh đom kadrôp maroh đơu ay đong pato dayq 'wot ih?\" Yôôych oot pađuôôy ay nưq vlôh.",
  "35": "Lôôk Jê-xu tameen đaneq oot heq pađuôôy ay vlôh pi gôk yôôch axek tavơh ay, Kadraq đnooy:\" Ay e tuuôq aduq Koot Manih be?\"",
  "36": "Ay nưq tơơl apok ji đnooy:\" Dro nưq laa kơyq, kuh Kadraq, xôq gô hnoq ik tuuôq muut kadraq?\"",
  "37": "Lôôk Jê-xu đnooy dii ay:\" Ay kung heq hloq kadraq, ji nưq laa manih đong đnooy dii ay neq.\"",
  "38": "Tuôôy nưq, ay đnooy:\" Kuh Lôôk, gô tuuôq\", ji ay kuh ayuuôt Kadraq.",
  "39": "Lôôk Jê-xu đnooy: \"Gô heq truh đom dêh araak neq vii varơuq xưh xadrah, xôq ka khơl adro leh hloq hnoq ik hloq ik, ji khơl adro 'yo hloq hnoq vlôh apuul.\"",
  "40": "Xing đom bing manih Pha-ra-si đong măn đnư dii Kadraq, oot tameen kaluh apok nưq, yôôch vôôch Kadraq:\" Dang aleq 'wot kung biq apuul?\"",
  "41": "Lôôk Jê-xu đnooy kung oot:\" Atoh êêp kơy biq apuul yôôch anưq laa êêp kơy leh e kadrôp, bơh juneq êêp kơy đnooy đaneq:' 'wot hloq ik.' Lunưq, kadrôp ku êêp kơy măn jaa kađnư.\""
}