cor_2020_cua_clt_jas_book/jas/1.json

{
  "1": "Ja-kơ, xapok ku Kơy Plêêk ji ku Lôôk wơơt Dêh Jê-xu, ataq ka kưl vaar adrơơk đom varơuq riilh pa chaai: Vôôch hlơq oh ay đom xuum hlah hlaak.",
  "2": "'Wơơy oh ay ku gô, tuôôy oh ay klêh muut đuu thưq pơơl dal, dayh 'yo nưq laa varơuq hlah hlaak saleap,",
  "3": "vii xet đaneq varơuq athưh xuum tuôq oh ay pa-iir avlôh varơuq chiuq uônq.\n\\ts\\*",
  "4": "Bơh, varơuq chiuq uônq phayh dơơp pa'yôôch dêq kaluh varơuq, xôq oh ay hno ik kôt tok ji saleap, leh măn thiêuq kajoq.",
  "5": "Măn atoh akơyq nưq đom oh ay thiêuq khôôt xet, dro nưq dayh apôôy vôôch varơuq nưq xing Kơy Plêêk, Kơy kahniq pôôt kach ranưh ranưưy ka tôôy adro đơu leh atoah, yôôych varơuq khôôt xet hno jah kahniq ka adro nưq.\n\\ts\\*",
  "6": "Bơh adro nưq phayh apôôy vôôch đom xuum tuôq, leh biit ravơq kajoq, vii adro biit ravơq dang đaji ralăăq tahlii, biq kapuh hooy ji ranhuq ranhek đom khiel.",
  "7": "Adro đanưq te biit aneq ni hno nhonq jah kajoq xing Lôôk.",
  "8": "'ngưq laa adro ragơy lưng khưng, leh kajưk xuum đom tôôy trôôk hooy ni.\n\\ts\\*",
  "9": "Adro oh ay đom aduq lêq dik dayh akhwoe truh ka aduq jah vado ku oh ay, ",
  "10": "măn adro karoh e dayh akhwoe truh varơuq lêq dik ku ni, vii dro nưq hno dalơh hooy đaji raak gôk đom manay rek.",
  "11": "Mot hngơy vlok tok dii rahưưk tôq huur vuh ji dơơp kateh ha'yauq rek ôôlh, raak ni klêh rôh, varơuq tamaq kaxaay ku ni ruuh hlơơp. Dang anưq, adro karoh kungh hno biq kateh ha'yauq đom katuul varơuq chwiiq tyauq ku ni.\n\\ts\\*",
  "12": "Vanong ka dro chiuq adô aluut. Vii, tuôôy heq jah xnưk dik, adro nưq hno nhonq đoat tađnah varơuq riilh, laa varơuq đơu Kơy Plêêk heq tavek kahniq ka khơl leq xung xiaq Kadraq.",
  "13": "Tuôôy biq adôô aluut, te e akơyq đnooy đaneq: \"Gô biq Kơy Plêêk adôô aluut!\", vii Kơy Plêêk laa leh biq varơuq xơk adôô aluut, đơu kadih Kadraq kungh be adôô aluut kơyq.\n\\ts\\*",
  "14": "Bơh tôôy muuyq adro biq adôô aluut, tuôôy biq ahluk hluul ji aluut xing xuum hmưưch trôôch ku kadih ni.",
  "15": "Xing nưq, atêq tuôôy heq vach xôq, xuum hmưưch trôôch pahleh vlôh karôp maroh, đơu  atêq tuôôy heq jah yuôôl, karôp maroh pahleh vlôh varơuq kaxêêt.",
  "16": "'Wơơy oh ay xung xiaq ku gô, te xôq oh ay biq aluut.\n\n\\ts\\*",
  "17": "Tôôy varơuq kahniq ăm kaxaay tamaq ji tôôy kadroor kaxaay saleap raay truh xing tol ataalh, laa truh xing Vaq ku varơuq tađnah, đơu đom Kadraq leh e varơuq tađôôy long long lơuq tađôôy hlê. ",
  "18": "Tyauq đaji heq đinq, Kadraq heq pahleh haay vlôh bơơn apok ku varơuq dik, xôq haay laa muuyq proh plaay adrooyq dik đom kaluh vâât dơơp vlôh ku Kadraq.\n\\ts\\*",
  "19": "Wơơy oh ay xung xiaq ku gô, dayh xet đaneq: Tôôy muuyq adro phayh dayh tameen, manưưn đnooy, manưưn jaraq.",
  "20": "Vii đơơt tôq jaraq ku koot manih leh dơơp yuôôl varơuq hyioh jăk ku Kơy Plêêk.",
  "21": "Vii anưq,atêq tuôôy heq leeh ka'lăk kaluh varơuq klơơl 'yêq kung kaluh varơuq xơk tauq,  dayh nhonq xok đom varơuq xuum apôôt xăk apok jah paraay pêêt, laa apok hnoq ik wơơt xok phool hiel oh ay.\n\\ts\\*",
  "22": "Dayh yuôôl vlôh khơl dơơp tyauq apok, te vơ laa khơl tameen đơu pa ôôh luut kadih haay.",
  "23": "Vii atoh dro leq laa dro tameen apok đơu leh aalq laa dro dơơp tyauq, yôôych adro nưq dang đaji muuyq dro 'yo mot kadih ku ni đom ramiil",
  "24": "Adro nưq heq 'yo ni yôôch ka'lăk hooy, yôôych wiih ta'wool hlơơp ni dang đaji luleq.",
  "25": "Bơh akơyq rơơych rol 'yo muut ganuun xaleap ku varơuq rayơh rayơơy, ji kưq dơơp miêk đanưq, leh yuôôl vlôh adro tameen yôôch ragơy ta'wool, đơu laa adro dơơp varơuq duh dơơp, yôôych dro nưq hno jah vanong đom varơuq dơơp ku ni.\n\\ts\\*",
  "26": "Atoh akơyq biit ni laa e xuum tuôq kajưk đơu leh jư ik kapiek ni, bơh kưq pa ôôh aluut xuum ni, yôôych varơuq tuôq ku dro nưq leh ik xung liq.",
  "27": "Varơuq tuôq Lôôk xarêh xaraat ji leh a'moh nhơơy adrooyq kangưưr Kơy Plêêk, Vaq haay, nưq laa waak khơl leh e miq vaq, mo vlơu đom đơơt pơơl dal ku oot, ji jư xăk leh klơơl 'yêq xing dêh araak.\n\\ts\\*"
}