cor_2020_cua_clt_jas_book/jas/1.json

{
  "1": "Ja-kơ, xapok ku Kơy Plêêk ji ku Lôôk wơơt Dêh Jê-xu, ataq ka kưl vaar adrơơk đom varơuq riilh pa chaai: Vôôch hlơq oh ay đom varơuq xuum hlah hlaak.",
  "2": "'Wơơy oh ay ku gô, tuôôy oh ay phayh chiuq đuu thưư pơơl dal, yôôych dayh 'yo nưq laa hlah hlaak saleap,",
  "3": "vii xet đaneq varơuq athưh xuum tuuôq oh ay pa-iir avlôh varơuq atuq xuum.\n\\ts\\*",
  "4": "Bơh, varơuq atuq xuum phayh dơơp pa'yôôch dêq kaluh varơuq, xôq oh ay hno ik kôt tok ji saleap, leh huq thiêuq kajoq.",
  "5": "Măn atoh akơyq nưq đom oh ay thiêuq khôôt xet, dro nưq dayh apôôy vôôch varơuq nưq xing Kơy Plêêk, Kơy kahniq ăm kach ranưh ranưưy ka tôôy adro đơu leh atoah, yôôych varơuq khôôt xet hno jah kahniq ka adro nưq.\n\\ts\\*",
  "6": "Bơh adro nưq phayh apôôy vôôch đom xuum tuôq, leh biit ravơq kajoq, vii adro biit ravơq dang đaji ralăăq tahlii, biq kapuh hooy ji ranhuq ranhek đom khiel.",
  "7": "Adro đanưq te biit đaneq ni hno nhonq jah kajoq xing Lôôk.",
  "8": "'ngưq laa adro ragơy lưng khưng, leh kajưk xuum đom tôôy trôôk hooy ni.\n\\ts\\*",
  "9": "Adro oh ay đom aduq lêq dik dayh akhwoe truh ka aduq jah vado ku oh ay, ",
  "10": "măn adro karoh e dayh akhwoe truh varơuq lêq dik ku ni, vii dro nưq hno dalơh hooy đaji raak gôk đom manay rek.",
  "11": "Mot hngơy vlok tok dii rahưưk tôq huur vuh ji dơơp kateh ha'yauq rek ôôlh, raak ni klêh rôh, varơuq tamaq kaxaay ku ni ruuh hlơơp. Dang anưq, adro karoh kungh hno biq kateh ha'yauq đom katuul varơuq chwiiq tyauq ku ni.\n\\ts\\*",
  "12": "Vanong ka dro chiuq adô aluut. Vii, tuôôy heq jah xnưk dik, adro nưq hno nhonq đoat tađnah tađnaak varơuq riilh, laa varơuq đơu Kơy Plêêk heq tavek kahniq ka khơl leq xung xiaq Kadraq.",
  "13": "Tuôôy biq adôô aluut, te e akơyq đnooy đaneq: \"Gô biq Kơy Plêêk adôô aluut!\", vii Kơy Plêêk laa leh biq varơuq xơk adôô aluut, đơu kadih Kadraq kungh be adôô aluut kơyq.\n\\ts\\*",
  "14": "Bơh tôôy muuyq adro biq adôô aluut, tuôôy biq ahluk hluul ji aluut xing xuum hmưưch trôôch ku kadih ni.",
  "15": "Atêq katuôôy xuum hmưưch trôôch nưq heq văch, ni ahleh vlôh kadrôp maroh, ji atêq katuôôy kadrôp maroh viik xaleep, ni ahleh vlôh varơuq kaxêêt.",
  "16": "'Wơơy oh ay xung xiaq ku gô, te xôq oh ay biq aluut.\n\n\\ts\\*",
  "17": "Kaluh kadroor kaxaay tamaq ji kaluh varơuq kahniq ăm xaleep raay laa xing tol ataalh. Laa varơuq truh xing Vaq ku varơuq tađnah. Dii Kadraq yôôych leh e varơuq tađôôy long long lơuq ku varơuq tađôôy hlê. ",
  "18": "Kơy Plêêk rơơlh pa-iir haay vlôh bơơn apok ku varơuq dik, xôq haay hnoq laa muuyq prooh plaay adrooyq dik ku kaluh vât Kadraq dơơp vlôh.\n\\ts\\*",
  "19": "Wơơy oh ay xung xiaq, oh ay xet varơuq neq: Kơyq Kơyq kung phayh dayh tameen, manưưng đnooy ji manưưng jaraq.",
  "20": "Vii tôq jaraq ku koot manih leh dơơp yuôr varơuq hyioh jăk ku Kơy Plêêk.",
  "21": "Vii anưq, dayh leh ka'lăk dêq kaluh a'moh nhơơy kung kaluh varơuq xơơk tauq viik glaay. Dayh xok xuum apôôt xăk nhonq xok apok heq praay pêêt, laa apok hnoq ik wơơt xok phool hiel oh ay.\n\\ts\\*",
  "22": "Dayh laa adro dơơp tyauq apok, te liq laa adro tameen đơu pa ôôh haay.",
  "23": "Vii atoh dro leq laa dro tameen apok đơu leh aalq laa dro dơơp tyauq yôôch daang đaji muuyq dro 'yo mot kadih ku ni đom ramiil",
  "24": "Adro nưq 'yo hloq ni yôôych ka'lăăk hooy ji yôôch ta'wool hlơơp ni đaji luleq.",
  "25": "Bơh adro rơơt rolh 'yo hlê ganuun xaleep ku varơuq rayơơh rayơơy, ji kưq dơơp anưq đnooyq, leh aalq vơơ tameen yôôych ta'wool hlơơp, đơu laa dro dơơp tyauq apok, yôôych dro nưq hnoq jah vanoong đom kaluh varơuq dơơp ku ni.\n\\ts\\*",
  "26": "Atoh e kơyq biit ni e Lôôk, đơu leh jưư kapiek ni, wiih măn pa ôôh aluut xuum ni, yôôych varơuq tuuôq Lôôk ku dro nưq laa leh ik xung liq.",
  "27": "Riilh tuuôq Lôôk xarêh xaraat ji hlăng vah kangưưl Kơy Lôôk Vaq haay laa jưp wăk khơl leh e vaq, mư drê vlơu kanơu đom tuôôy pơơl dal ku oot, ji jưư ka xăk leh huq biq dêh araak dơơp a'moh a'mơơy.\n\\ts\\*"
}