cor_2020_cua_clt_act_book/act/7.json

{
  "1": "Jơu neq, thơy dok dơơp kôt galơh đnooy: \"Kaluh varơuq nưq e jơq đa nưq long leh?\"",
  "2": "Nưq laa, kơy padooh đnooy: \"Tơơl khơl wơy, khơl ooh ay ji khơl kôt kadraq lơơk, xiin dayh tameng: Kơy Plêêk tađnaah tađaak heq rama vlôôh dii mo kơy Ap-raa-haam kua haay tuôôy kadraq măn aduq Mê-sôô-bôô-taa-mii, adrooyq hloay tuôôy kadraq măn kuur aduq  Chaa-raan;",
  "3": "ji Kadraq đnooy kung maniih aneq: 'Dayh vlôôh khooyh dêh palơy kua koot, kung đaji khooyh oot adrơơk rong nooy kua koot, ji koot dayh hooy truh dêh đơu gô hnoq pato ka koot.'\n\\ts\\*",
  "4": "Xatyauq đnooyq, atêq tuôôy vlôôh khooyh dêh kua tamooy Kaanh-đêê, maniih riirh aduq Chaa-raan. yôôch xing nư, atêq tuôôy vaq kơy kaxêêt hlơơp, Kơy Plêêk heq jarooy kơy muut dêh neq, đom aduq đơu khơl wơy neq đong pahleh riirh. ",
  "5": "Kadraq heq be kahni ka kơy muuyq hluôt vari đom dêh, đơu vơ muuyq aduq toq plaa jôôk kung leh. Nưq đơu Kadraq heq tavek kahni dêh ka kơy xôq jêêk qwien heq jaah, kung ăm \nrong nooy kua kơy đnooyq atêq kơy, long kơy koq e koot.\n\n\\ts\\*",
  "6": "Long anưq, Kơy Plêêk heq đnooy đa neq, aneq aa drơơk kơy hnoq laa dêê tamooy aduq muuyq dêh xangưưy đêh, yôôych kơy nưq  hnoq rôp oot dơơp xa pok đơu dơơp raơơh đom poot hreek xanưm.",
  "7": "Kơy Plêêk đnooy: 'Ji Gô hnoq xưh xadraah vari dêh đơu oot heq phaayh tameng xatyauq, yôôych atêq nưq, oot hnoq vlôôh hooy ji ayuôôt laak Gô ka aduq neq.'",
  "8": "Kadraq kung heq kahni ăm kơy taa vek truh pheep got kađuh, ji vii anưq, kơy pajêêk Y-saak ji dơơp pheep got ka đuuh ka koot kơy muut hngơy thưq thơơm; Y-saak dơơp đaa nưq ka Ja-kôôp, ji Ja-kôôp kung dơơp anưq ka kưl vaarq adrơơk lơơk. \n\\ts\\*",
  "9": "Vii khơl katôôl lơơk 'ya rơơ dii Jô-sêêp, oot heq tek kơy hlê Ay-Kăăp; đơu Kơy Plêêk măn kung kơy, ",
  "10": "ji wơơt kơy khooyh tôôy varơuq pơơl dal kua kơy, Kadraq kung kahni vanong ji varơuq khôôt kheoq ka kơy adrooyq kangưưr Pha-raa-ôôn, vuua Ay-Kăăp, ji vuua nưq heq lôp kơy jưư 'yo tal Ay-Kăăp kung hloay hnhư kơy.\n\\ts\\*",
  "11": "Jơu neq, muuyq naanq pangoot xalih truh tal  loch hloay dêh Ay-Kăăp ji Ka-naa-aan, laa varơuq pơơl dal thieer kôt, ji khơl mo kơy kua haay be axek jaah va phe.",
  "12": "Nưq yôôch, atêq tuôôy tameng măn Ay-Kăăp  e vaa qwaay, Ja-kôôp patăk khơl mo kơy haay truh đnư yưk thưq nhưk.",
  "13": "ji đom yưk thưq vaarq, Jô-sêêp heq kadiih kahnoq vlôôh xăk xamơk ka khơl ay kơy, yôôch kôôch hnhư kua Jô-sêêp jaah Pha-raa-ôôn 'yoo xet.\n\\ts\\*",
  "14": "Jơu neq, atêq tuôôy dăch khơl ay xuq, Jô-sêêp dăch jarooy Ja-kôôp, vaq kơy, kung dêq hloay khơl hnhư, dii sôôq maniih laa pơơh kưk dăp.",
  "15": "Nưq laa, Ja-kôôp hooy pôôt truh Ay-Kăăp, yôôych kơy kaxêêt, ji khơl mo kơy kua haay kung anưq.",
  "16": "Oot jaah jarooy truh Si-cheem ji up đom kalo đơu Ap-raa-haam heq root dii sôôq jêêt toq baak xing khơl koot kanơu kua Hê-môô aduq Si-cheem.\n\\ts\\*",
  "17": "Tuôôy nưq, tyauq đaji ka waah kua apok tavek đơu Kơy Plêêk heq tavek dii Ap-raa-haam heq truh jeq, yôôych sôôq maniih athêêp 'ngưưng ji jaah karôp lơyq aduq Ay-Kăăp,",
  "18": "ăm truh tuôôy muuyq viq vuua kadrơy dưk tok xakaq 'yo Ay-Kăăp, đơu vuua nưq 'miêh leh xet Jô-sêêp. ",
  "19": "Vii dơơp raơơh maniih tamooy haay, vuua nưq  heq dơơp raơơh mo kơy haay, dơơp ka khơl ooh nga đơơu paiir kua oot biq dơyh 'lăk, leh jaah jưư ăm riirh.\n\\ts\\*",
  "20": "Muut tuôôy đơu Môôy-see jaah paiir vlôôh, kơy tamaq tamach adrooyq Kơy Plêêk. Kơy jaah vach daay pe xiêk đom hnhư vaq kơy.",
  "21": "Jơu neq, tuôôy kơy biq vơơ hloq, koot kadrê kua Pha-raa-ôôn heq xagook kơy hooy ji văch daay kơy đaji koot kanơu kơy. \n\n\\ts\\*",
  "22": "Môôy-see jaah pato dayq đom tôôy varơuq khôôt kheeuq kua maniih Ay-Kăăp, kơy măn e daa uuh đom apok đnooy ji varơuq dơơp kua kơy.",
  "23": "Bơh tuôôy kaa waah poot kưl xanưm heq truh \ndii kơy, biit vlôôh đom xuum kơy iq xung hlơq hlôôp ooh ay xăk, nưq koot xau Y-sơơ-raa-êêl.",
  "24": "Ajơ hloq muuyq dro nưq biq dơơp raơơh, maniih heq dưk vlôôh đnooy pagơq ji yôôych păk kaxêêt blaa kadrôôk ka adro biq đnaayh ranhuq tuôôy tieer kaxêêt maniih Ay-Kăăp hơq,",
  "25": "kơy măn biit ooh ay hlolh aneq Kơy Plêêk xing tii kơy đong taway truh varơuq waak wơơt ka oot, bơh oot leh hlolh.\n\n\\ts\\*",
  "26": "Hngơy klôôl atêq, kơy rama vlôôh tul oot ajơ đong takaay tayaat, ji kơy dach oot ngưưr truh varơuq taa guu, aneq: 'Ne khơl ay, khơl ay rapa laa ooh ay. Vii aleq khơl ay tagay xưr xôôh hloay mamuuyq?'",
  "27": "Bơh adro đong dơơp raơơh manih gaah giah xăk heq taluq kơy vlôôh, dăch: 'Kơyq heq dăch kơy dơơp manih xakaq 'yo ji padrok xadraah tol 'wot?",
  "28": "Be aalq laa kơy đong xung păk kaxêêt gô đaji đaa đơu kơy heq păk kaxêêt manih Ay-Kăăp hngơy ahnưh?'\n\n\\ts\\*",
  "29": "Nưq yôôych, Môôy-see xadăk duu adrooyq apok đnooy nưq, ji kơy wiih jêêk tamooy măn kuur đom dêh Ma-đii-aan, aduq đơu kơy pajêêk jaah vaarq koot kanơu.",
  "30": "Tuôôy poot kưl xanưm heq dalơơh hê, muuyq kơy hơu rama vlôôh dii kơy aduq wăng we jêêk đoot Si-naay, đom muuyq xaau ôôlh aduq   pôôp jaliê.\n\n\\ts\\*",
  "31": "Jơu neq, tuôôy 'yo hloq anưq, Môôy-see xok dơơp akêh truh ka varơuq nưq, yôôych tuôôy kơy truh jeq xôq 'yo dong hlêêt, yôôych e apok kua Lôôk: ",
  "32": "Gô laa Kơy Plêêk kua mo kơy koot, Kơy Plêêk kua Ap-raa-haam, kua Y-saak ji kua Ja-kôôp.' tuôôy nưq, vii kayơơu varaar yôq kahlôp truh, Môôy-see leh hôôk 'yoo.\n\n\\ts\\*",
  "33": "Yôôych Lôôk đnooy ji kơy: 'Dayh tơq kaxôôp vlôôh khooyh jôôk koot, vii aduq đơu koot đong dưk laa vari vaah.",
  "34": "Vii heq ngưưr 'yoo, gô 'yo hloq ajơ pơơl dal kua tamooy Gô aduq Ay-Kăăp, Gô heq tameng apok tanguh alơơlh kua oot, ji Gô heq pôôt xôq wăăk wơơt oot. Jơu neq, dayh hlê đnen nee, Gô patăk koot truh Ay-Kăăp.' \n\n\\ts\\*",
  "35": "Môôy-see neq, kơy đơu oot heq kaa 'lăk tuôôy dăch: 'Kơyq heq panưk kơy dơơp maniih xakaq 'yo long padrok xadraah?' - Kơy Plêêk patăk dăch kơy vơ dơơp kơy xakaq 'yo vơ dơơp manih waak wơơt, xing tii kua viq kơy hơu heq rama vlôôh dii kơy aduq pôôp jaliê.",
  "36": "kơy heq jarooy oot vlôôh, atêq tuôôy dơơp  kaluh pheep pakêh ji dơuq akêh aduq dêh Ay-kăăp ji aduq Tahli Dôôp, kung đaji đom wăng we tuôôt poot kưl xanưm.",
  "37": "Nưq laa Môôy-see, kơy heq đnooy dii koot xau Y-sơơ-raa-êên aneq: 'Kơy Plêêk hnoq panưk tok muuyq dro kơy hlit ka khơl wơơy dang đaji gô, xing tul wach khơl ooh ay kua khơl wơy.'\n\n\\ts\\*",
  "38": " Neq laa maniih măn đom maniih karôp aduq wăng we kung dii viq Kơy hơu, Kơy heq đnooy kung kơy tol đoot Si-naay, ji dii khơl mo kơy haay, kơy laa dro heq nhonq xok apok hloay riirh xôq kahni ăm haay.",
  "39": "đơu đôôy kung kơy, mo kơy haay leh xung  tameng tyaauq, wiih hlê, oot aklơ hlê ji awiih xuum xăk ngưưr truh Ay-Kăăp,",
  "40": "tuôôy dăch A-rôôn: 'Dayh dơơp ka 'wot kaluh vangưưl hnoq jarooy achôôk 'wot. Truh phon  Môôy-see neq, manih heq jarooy 'wot vlôôh khoyh dêh Ay-Kăăp, 'wot leh xet varơuq kajoq heq xliih vlôôh ka kơy nưq.\n\\ts\\*",
  "41": "nưq laa, oot dơơp muuyq vangưưl boo koot đom kaluh hngơy nưq ji tơơk tưp ôôq ka dang vangưưl nưq, yôôych hlah hlaak vii kông varơuq kua tii xăk.",
  "42": "Jơu neq, Kơy Plêêk wih katool ji ka'lăk ngưưr oot akuh kaluh kaluh  xa lok  tal plêêk, đaji heq  valơk đom rahlăp kua khơl kơy hlit, aneq: Lơơy hnhư Y-sơơ-raa-êên, nưq ne khơl koot heq tơơk tưp ka Gô kaluh ôôq ji kuah lêh đom tuôôt poot kưl xanưm aduq wăng we?\n\\ts\\*\n\\q",
  "43": "khơl koot heq xakôôk pơơ kadrôôr kua yaak Moo-lôôk ji xa lok yaak Room-phaan kua khơl koot, - kaluh dang vangưưl đơu khơl koot heq dơơp vlôôh xôq ka kuh oot - ji Gô hnoq tơq dơơyh kaluh êêp hlê pii hơq Ba-bii-lôôn.'\n\n\\ts\\*\n\\m",
  "44": "Pơơ xanưk tavek măn kung mo kơy haay đom wăng we, ii đaji Kơy đnooy dii Môôy -see heq padooh pato, phayh dơơp pơơ nưq tyauq khuôông daang đơu kơy heq hloq,",
  "45": "đơu kung dii pơơ nưq, atêq tuôôy xôq padooh xatyaauq đnooyq, mo kơy haay kung heq xagook tyaauq 'laarq tuôôy Jô-suuê đom hooy ajơ tagoa dêh kua khơl maniih tamooy đơu Kơy Plêêk heq đuôôy hooy adrooyq kangưưr mo kơy haay ăm truh tuôôy Đa-viik,",
  "46": "laa dro jaah vanong adrooyq kangưưr Kơy Plêêk, ji kơy heq apôôy vôôch xôq axek muuyq aduq kur ka hnhư Kơy Plêêk kua Ja-kôôp. \n\\ts\\*",
  "47": "Nưq yôôch, Sa-lôô-môôn heq xơy panưk hnhư ka Kadraq. ",
  "48": "Long atoh, Kơy Plêêk Thiier Yơơt leh măn kur đom aduq tii maniih dơơp vlôôh, đaji hnhư kơy hlit e đnooy: \n\\q",
  "49": "Lôôk đnooy: Plêêk laa ngôôy Gô, ji vari laa aduq tol jôôk Gô. khơl koot hnoq xơy hnhư kiêuh kajoq ka Gô? Long aduq leq deng ka varơuq vadơơy pado kua Gô? \n\\q",
  "50": "Be aalq tii Gô heq dơơp jêêk dêq hloay kaluh thưư neq aleq?'\n\n\\ts\\*\n\\p",
  "51": "Lơơyh khơl maniih găk ranong, xuum ji tôôr leh chiuq goch kađuh hơq! Khơl wơy hloay tachơơl tangưưr Lôôk Phool Hieel. Mo kơy kua khơl wơy đaa leq, khơl wơy kung đaa nưq.",
  "52": "Muuyq dro leq đom khơl kơy hlit đơu mo kơy kua khơl wơy heq leh dơơp raơơh? Oot heq păk kaxêêk khơl adro padooh tauq adrooyq ka varơuq truh kua Kơy Hyioh Jăk, đơu khơl wơy nee heq wiih 'yuôôr adro xaliih xuum ji dro păk kaxêêt Kơy nưq,",
  "53": "nưq laa khơl adro heq nhonq ga nuun xing varơuq lơơh dăch kua khơl kơy hơu, đơu leh jưư xok.\"\n\n\\ts\\*\n\\p",
  "54": "Jơu neq, atêq tuôôy tameng kaluh apok nưq, oot biq pưk xalôq tôq jaraq đom xuum xăk, ji oot takik kaneeng dii kơy.",
  "55": "Bơh đong tuôôy jaah viik galaay Lôôk Phool Hieel, atêq tuôôy 'yo trưưng trưưng kon plêêk, kơy hloq varơuq tađah tađaak kua Kơy Plêêk ji Lôôk Jê-xuu dưk măn pii akooh Kơy Plêêk.",
  "56": "Kơy đnooy: \"'Yo hơ, gô hloq kaluh lawah plêêk jaah ranưưh luuh, ji Koot Maniih dưk măn pii  akooh Kơy Plêêk.\"\n\n\\ts\\*",
  "57": " Jơu neq, atêq tuôôy laa tarok kôt apok, oot kajet tôôr oot hlê yôôych kung mamuuyq kathôp muut kơy.",
  "58": "Tuôôy heq taluq vlôôh pigôk theeng, oot tip phơu kơy. Khơl adro xanưk xôq auu gôk kua kăk aduq jôôk muuyq tadăp bpaay jaah taayh laa Sau-lơơ.\n\n\\ts\\*",
  "59": "Oot tip phơu Ê-tiên đom kaplah kơy apôôy, arơơk aneq: \"Kuh Lôôk Jê-xuu, xiin taway xok   phol hieel koot.\"",
  "60": "Nưq yôôych, atêq tuôôy kul takuul pôôt, kơy taayh kaalh apok: \"Lôôk lơơy, Kadraq leh kahrôq adrôk neq tal oot.\" ajơ đnooy apok nưq yôôych yôôch kơy vik.\n\n\\ts\\*"
}