cor_2020_cua_clt_act_book/act/1.json

{
  "1": "Tơơl kadraq Thê-ôô-phii-lơơ, gô heq dơơp vlôôh phon achiih valơk thưq nhưk truh tôôy varơuq đơu Lôôk Jê-xuu heq xarôp dưk dơơp ji padooh pato,",
  "2": "ăm truh hngơy Kadraq jaah xagook tok plêêk, ajơ heq kahnii apok pato xing Lôôk phool hiêêl ka khơl xa tyaauq đơu Kadraq heq rơơrh,",
  "3": "kung laa khơl adro đơu Kadraq heq truh kahnoq avlôôh kadiih xăk đong riirh ka oot, atêq tuôôy Kadraq heq chiuq pơơl dal, dii 'ngưưng đaa xanưk, vii heq kahnoq vlôôh dii oot đom poot kưl hngơy ji đnooy kaluh varơuq truh dêh araak kua Kơy Plêêk. \n\n\n",
  "4": "Tuôôy tavơơh mot dii ooh, Kadraq heq padooh ka oot leh ik chuuh khooyh Jê-ruu-saa-leem, bơh phaayh kôô takôô apok tavek kua Vaq, \"Laa varơuq đơu ooh ay heq tameng xing Thơy,\n",
  "5": "aneq Jăng heq dơơp bap-teem ji daak, bơh ooh ay hnoq jaah bap-teem ji Lôôk Yaak Plêêk leh dong xiik atêq kaluh hngơy neng.\"\n",
  "6": "Vii nưq, tuôôy kung mamuuyq hooy truh, oot vôôch Kadraq đaneq: Tơơl Lôôk, jơq be Kadraq panưk hlê ka Y-sơơ-raa-êêl muut jơu neq?\"",
  "7": "Nưq bơh, Kadraq đnooy dii oot: ''Varơuq deng ka ooh ay jaah xet leh aalq laa tuôôy kawah long tôôy ajơ đơu Vaq heq đingq tyauq taay yaak kua Kadraq. ",
  "8": "Long anưq, ooh ay hnoq nhonq xok taay yaak tuôôy Kơy Phool Hiêêl kahri tal xăk, ji ooh ay hnoq laa khơl xanưk nưq kua Thơy aduq Jê-ruu-saa-leem, đom hloay dêh Ju-đêê, dêh Sa-maa-rii, ji ăm truh loch dêq play vari.\"",
  "9": "Atêq tuôôy đnooy kaluh apok nưq, ajơ oot măn đong 'yo, yôôych Kadraq jaah xagook tok, ji muuyq đum kluk kariik kađoq Kadraq khooyh mot oot. ",
  "10": "Đom tuôôy oot đong măn tamaak 'yo tol plêêk ajơ Kadraq xagook tok, yôôych 'yo hơq, vaarq dro khơl kanơu hlưp aau koo truh dưk gaah oot.",
  "11": "Oot đnooy; ''Taleq dro Ga-lii-lêê hơq, aleq khơl ay dưk 'yo tok plêêk? Lôôk Jê-xuu neq, Kơy heq jaah xagook tok plêêk khooyh khơl ay, kung hnoq truh đaji đaa đơu khơl ay heq hloq Kadraq hooy tok Plêêk.\"\n",
  "12": "Nưq yôôych, xing ngok đoot jaah taayh laa Ô-liiu, oot wiit xuq truh Jê-ruu-saa-leem, đơu đoot nưq măn jeq Jê-ruu-saa-leem, e kawaah trôôk hoy đom muuyq hngơy Sa-baat.",
  "13": "Ajơ oot heq xuq truh, oot hooy tok tal rawaak yơơt duq oot đong măn hlê, agumq Phi-ee-rơơ, ji Jăng, kung Ja-kơơ ji Anh-rê, Phi-liip ji Thô-maa, Ba-thê-lêê-mii ji Ma-thii-ơơ, Ja- kơơ koot kanơu A-phêê ji Si-môôn Xê-lôôt, kung ju-đee, koot kua Ja-kơơ.\n",
  "14": "Dêq hloay oot rapaa kajưk raa đaa anguk muuyq đom varơuq xadrook apôôy, dii kaluh khơl ka drê kung Ma-rii, miq kua Lôôk Jê-xuu, ji dii khơl ooh kanơu kua Kadraq.",
  "15": "Đom kaluh hngơy nưq, atêq tuôôy dưk tok măn tul wach  khơl ooh ay xăk (sôôq karôp khơl aa dro ka aduq neq laa kawaah muuyq hreek vaarq kưl), Phi-ee-rơơ đnooy:    ",
  "16": "Tơơl khơl ay, khơl ado ooh ay, 'ngeq laa varơuq băch dăch phayh jaah jêêk đom Rahlăp Vah, laa apok đơu Lôôk Phool Hiêêl heq tauq adrooyq xing huuy vuua Đa-viik truh Ju-đaa, adro wiih jêêk dro jarooy trôôk ka khơl rôp Lôôk Jê-xuu.",
  "17": "Vii ni heq jaah taboon achung dii wot ji heq nhonq phon xăk truh varơuq dơơp neq.\"",
  "18": "(Nưq yôôch ni heq root muuyq manaay ruônq xing jêêk kông kua varơuq lưp jăk, ji  atêq tuôôy biq gưlh panhuq akoq pôôt, ni hruuh klaak, ee hloay  klaak ni biq hruuh vlôôh pigôk. ",
  "19": "Varơuq neq wiih jêêk varơuq qween yuôôr đôôyq dii dêq hloay khơl kơyq đong măn aduq  Jê-ruu-saa-leem. Vii anưq, manaay ruôngq   nưq jaah taayh đaa apok athêêk kua oot laa \"Hak-een-đaa-maa\", angưq laa \"manaay ruôngq vahaap\".)",
  "20": "''Vii varơuq nưq heq jaah valơk đom rahlăp Thii Thiêên: 'Dayh xôq manay ruôngq ni biq ralưp ralaak, kung te e kơyq pajêêk riirh măn đnư,' ji 'Dayh xôq adro kadrơơy nhonq xok  varơuq dơơp kua ni.'\n\n\n\\ts\\*\n\\m",
  "21": "Vii anưq, duuh phayh e kaluh manih heq raa hooy dii haay đom tuôôt tuôôy kawaah đơu  Lôôk Jê-xuu hooy hlê tul haay,\n",
  "22": "paa xarôp xing pheep Bap-teem kua Jăng ăm truh hngơy đơu Kadraq jaah xagook tok khooyh haay - muuyq đom khơl adro nưq phayh wiih jêêk dro xanưk truh varơuq riirh hlê kua Kadraq kung dii 'wot.\"",
  "23": "Oot jarooy vlôôh vaarq dro, Jô-seep jaah taayh laa Ba-saa-baa,đơu dro yôôch jaah vlăk anơng laa Juk-tuu, ji Ma-thiia.\n\n\\ts\\",
  "24": "Tuôôy xadrook apôôy, oot tơơl: \"Kuh Lôôk, kadiih Kadraq, Kơy xet xuum klaak kua tôôy dro, xiin pato vlôôh muuyq đom vaarq dro neq đơu Kadraq heq rơơrh laa kơyq",
  "25": "hlơu ăm nhonq xok varơuq dơơp kua kông varơuq neq kung dơơp jaah rơơlh đơu Ju-đaa heq ka 'lăk xôq hooy truh aduq kua ni.",
  "26": "Oot palăk pataah truh vaarq dro nưq, ji pataah rôôh muut Ma-thiia, nưq laa kơy jaah bơu rơơrh achung dii kưl muuyq khơl xatyauq.\n\n\n\\ts\\*"
}