cor_2020_cua_clt_2co_book/2co/11.json

{
  "1": "Trôôch kajoq oh ay 'miêêh heq chiuq uunq muuyq axit parưng rapơơ ku gô, long anưq oh ay juneq đong chiuq uunq gô! ",
  "2": "Vii gô geen jaraq truh oh ay, dii xuum geen 'yarơ ku Kơy Plêêk, vii gô heq gaah oh ay ka muuyq kanau, kahnoq oh ay đaji muuyq  tadăp kadrê măn blaay ka Lôôk Wơơt Dêh. \n\\ts\\*",
  "3": "Bơh gô biit yôq, te-be tyauq đa leq nưq, đaji volh heq adôô paôh Ê-vaa bơơn varơuq xơk tauq ku ni, yôôych xuum biit oh ay hno ik biq tawor tor kach xangưưi xuum dong dik ji xarêh xaraat deng ka Lôôk Wơơt Dêh.",
  "4": "Vii atoh akơyq nưq truh padoh taboon muuyq Jê-xu đêh đơu 'wot heq be padoh taboon, long oh ay nhonq muuyq yaak kadrơơy, leh aalq Kơy oh ay heq nhonq, long muuyq Hêêl Kaxaay kadrơơy đơu oh ay heq be nhonq xok, yôôych oh ay hlơu klêq chiuq uunq!\n\n\\ts\\*",
  "5": "Măn gô 'yo hloq xăk be e kajoq thuua iaq kaluh \"khơl xatyauq kôt dik\" hơơq. ",
  "6": "Bơh đơu vơ ju laa kooq hok đom varơuq ganuun padooh, atoh bơh be aalq laa kooq hok truh hlolh xet, đơu đom tưng dong varơuq heq kahnoq rooh ka oh ay đom tôôy varơuq.\n\n\\ts\\*",
  "7": "Long aalq be gô lôôp kadrôp, tuôôy haaq xăk pôôt xôq oh ay hno ik jah vanê, vii kơq gô heq vadoh taboon Hêêl Kaxaay ku Kơy Pêêk kach hloo hlooh ka oh ay?",
  "8": "Gô heq vook xok 'ngưưng Tayuup Vah kadrơơy, tuôôy heq nhonq ataq ăm ku oot xôq deng ka varơuq dơơp hơu varơuq oh ay.",
  "9": "Tuôôy măn dii oh ay - ju chiuq thiêuq lơyq - gô heq leh dơơp gengq parêq ka paq kê akơyq. Vii atêq tuôôy truh đnen, khơl oh ay xing  Ma-xê-đoaan heq ataq ăm dêq varơuq duh ku gô, ji đom kaluh varơuq, gô heq jư ji hno ađnooyq jư xăk xamơk leh aalq laa gengq parêq ka oh ay. \n\\ts\\*",
  "10": "Varơuq dik ku Lôôk Wơơt Dêh măn đom gô, vii anưq xuum akhwoe neq truh xăk xamơk hno leh biq klơl hlê aduq kaluh dêh araak ku A-chaay.",
  "11": "Vii varơuq kajoq? Vii gô leh xung xiaq oh ay ih? Kơy Plêêk xet gô e.\n\\ts\\*",
  "12": "Măn varơuq gô đong dơơp, yôôych gô kung hnoq ađnooyq dơơp, xôq gô hno ik varooh xok hlơu klêq ku khơl adro đong trôôch kawaah aleq ka đom varơuq đơu oot đong akhwoe, oot kung hno ik jah 'yo hloq daang đaji 'wot.",
  "13": "Vii taleq dro đanưq laa khơl xatyauyq paôh, khơl dơơp kông alưưt patuut, tuôôy dơơp bôô jêêk khơl xatyauq ku Lôôk Wơơt Dêh. \n\n\\ts\\*",
  "14": "E akêh kajoq 'leq, vii xăk xamơk Sa-taan dơơp bôô jêêk kơy yaak xaraar tađnah. ",
  "15": "Vii anưq be e kajoq kôt tolh atoh khơl xapok ku ni kung dơơp bôô đaji khơl xapok hyioh jăk, đơu pa'yôôch ku biin nưq yôôych hno taxưngq dii kaluh varơuq dơơp ku oot.\n\n\\ts\\*\n\\p",
  "16": "Gô đnooy hlê: Te akơyq biit gô laa vlôô khơơ. Măn atoh leh, yôôych axit vlôh dayh kôô nhonq gô đaji adro vlôô khơơ, xôq gô kung hno ik akhwoe vanê muuyq axich. ",
  "17": "Varơuq đơu gô xung đnooy, yôôych be aalq gô đnooy tyauq Lôôk, bơh đaji đom varơuq khơơ khaauq aduq varơuq tuôq kajưk akhwoe neq.",
  "18": "Vii kơq 'ngưưng adro akhwoe hloay tyauq xăk xamơk, vii anưq gô kung hno akhwoe.\n\n\\ts\\*",
  "19": "Vii nưq laa khơl adro khôôt xet, bơh oh ay đong thier hlah hlaak chiuq uunq taleq adro vlôô khơơ hơơ hơơq. ",
  "20": "vii atoh adro leq dơơp xapok oh ay, atoh adro leq kek luôôt, atoh adro leq varooh xok, atoh adro leq kadih vanê xăk tok, atoh adro leq hmot muut mamưưt oh ay, yôôych oh ay măn chiuq uunq.",
  "21": "Gô đnooy tyauq kach kamưưl, anưq đaji laa kadih 'wot heq amooh amơơy! Bơh hloay laa akơyq hno ik kôk kalh đom kaluh panưh leq - gô đong đnooy đom varơuq khơơ khaauq -yôôych gô kung kôk kalh đanưq.\n\\ts\\*",
  "22": "Oot laa manih Hê-bơ-rơơ? Gô kung anưq. Oot laa manih Y-sơ-ra-êêl? Gô kung anưq. Oot laa koot xau Ap-ra-haam? Gô kung anưq.",
  "23": "Oot laa xapok ku Lôôk wơơt Dêh? ( Gô đnooy đaji dang biq adruôôy) gô măn iaq anưq đnooyq: galơh galaah đom varơuq pơơl hwơơl, galơh iaq đom tuu karuk, đom hmot dook leh biit truh, tuôôy măn panoon gah kaxêêt hlơơp.\n\n\\ts\\*",
  "24": "Dăp yưk xing manih Jo-Thaayq, gô heq chiuq poot kưl rooy, bơơt muuyq.",
  "25": "Pe yưk gô biq tier bơơn gaay. Muuyq yưk gô biq tiêêp phơu. Pe yưk gô biq karăp taau. Gô hmưq tavơh muuyq hngơy muuyq klôôy aduq  tahlii jaruq;",
  "26": "ragơy ragơy tol kaluh tuôôy hooy trôôk, tavơh 'ngưưng pơơl dal tol daak tavook, pơơl dal dii khơl atôk, pơơl dal vlôh xing dong tamooy gô, pơơl dal vlôh xing kaluh tamooy daak gôk, pơơl dal đom theng kôt, pơơl dal aduq wănq wee, pơơl dal tol daak tahlii, pơơl dal xing khơl oh ay paôh laar;\n\n\\ts\\*",
  "27": "dalơh pơơl hwơơl ji kưk lơyq, 'ngưưng tuôôy đom varơuq lưp vik, pangoot ji thaal, ragơy đom varơuq nhinq xa, jaleek gauq ji lalôk;",
  "28": "athêêp muut đưư, pigôk kaluh varơuq taalh, varơuq chơt atêêp tol gô tôôy hngơy laa thơơl tawaaq xuum truh dêq hloay 'ngưưng tayuup vah.",
  "29": " Akơyq pơơh pơơr đơu gô leh pơơh pơơr? Akơyq biq xatôôlh lôôp đơu gô leh biq huur vuh?\n\n\\ts\\*",
  "30": "Atoh dăch phayh akhwoe, yôôych gô hno akhwoe vlôh kaluh varơuq pơơh pơơr ku gô.",
  "31": "Kơy Plêêk, Vaq ku Lôôk Jê-xu, Kơy đanq jah ayuôôt laat dong truh đơơy đơơy, xet đaneq gô leh đnooy paôh!\n\\ts\\*\n\\p",
  "32": "Aduq Đa-maach, kơy padrok dêh 'laalq qwuyen Vuua A-rê-taa 'miêh jư 'yo theng Đa-maach xôq rôp jư gô. ",
  "33": "Yôôch tapa muuyq 'mok piik, gô heq jah paduôôl pôôt bơơn vuk adrook tyauq apưt theng, ji gô heq kơlh klơlh tii kơy nưq.\n\n\\ts\\*"
}