Zuna_sgh_obs_text_obs/43/04.txt

Та̄мен Ерусалӣманд ди садо ца х̇уд, мардум ҷа̄м сут. Фукен хойих̇ чӯд wӣнтоw, йид ку чӣз вид. Wа̄δ ҷа̄мсуδҷин мардумен аз арра̄нга̄ҷаϑ мулкен вадат, арра̄нгаϑ зивентийен га̄п δод. Исо х̇огирденен аз Ҷалӣл вадат, арами зиват, йӯну̊ни зивтийен ду̊нд га̄п δод. Амо дам меϑен Исо х̇огирден арра̄нга̄ҷаϑ зивенти га̄п δодат, мардум фук айру̊наϑ ред, ду̊нҷа̄т арйак одами wи ғӯланд ху на̄н зивти дар борайи йик wи Хушхабар х̇уд иде̂, арчӣри Хуδой ца чӯд.