# خانوا يسوع

![OBS Image](https://cdn.door43.org/obs/jpg/360px/obs-en-38-01.jpg)

كل سنة، اليهود بيحتفلوا بعيد الفصح. الاحتفال ده كان عن كيف الله خلص اجدادهم من العبودية في مصر قبل قرون . بعد حوالي تلاتة سنوات من بداية يسوع الكرازة و التعليم العلني . كلم يسوع تلاميذه انو داير يحتفل بعيد الفصح معاهم في اروشليم و حيقتلوا هناك.

![OBS Image](https://cdn.door43.org/obs/jpg/360px/obs-en-38-02.jpg)

كان واحد من تلاميذ يسوع اسمو يهوذا، كان مسؤول عن خزينة التلاميذ، لكن مرات كانبيسرق قروش من الخزينة ، بعد ما يسوع و تلاميذه وصلوا اروشليم ، يهوذا مشي لقادةاليهود . عرض عشان يخون يسوع و يسلمهم مقابل قروش . هو عارف انو قادة اليهود ماقبلوا يسوع انو هوكان المسيا. بس عارف انو كانوا دايرين يقتلوا .

![OBS Image](https://cdn.door43.org/obs/jpg/360px/obs-en-38-03.jpg)

قادة اليهود، بقيادة الكاهن الاعلي، دفعوا ليهوذا تلاتين عملة من الفضة عشان يخون يسوع و يسلمو ليهم, و حصل زي ما الانبياء قالوا. يهوذا وافق و شال القروش ومشي بعد داك بدا يفتش فرصة عشان يساعدهم يقضبوا يسوع .

![OBS Image](https://cdn.door43.org/obs/jpg/360px/obs-en-38-04.jpg)

في اروشليم، يسوع احتفل بعيد الفصح مع تلاميذه ، في زمن وجبة الفصح، يسوع شال رغيف و كسرو وقال: "شيلو و اكلو. ده جسدي، انا بديه من اجلكم، اعملوا ده عشان تتذكروني". بالطريقة دي يسوع قال: انو حيموت من اجلهم، حيقدم جسده كذبيحة عشانهم.

![OBS Image](https://cdn.door43.org/obs/jpg/360px/obs-en-38-05.jpg)

بعد داك يسوع رفع كاس الخمر وقال: "اشربوا ده. ده ياهو دم العهد الجديد انا بدفقوا عشان الله يغفرخطاياكم. اعملوا الحاجة انا بعملواهسه، عشان تذكروني كل مرة تشربوا".

![OBS Image](https://cdn.door43.org/obs/jpg/360px/obs-en-38-06.jpg)

بعد داك يسوع قال لتلاميذ: "واحد منكم حيخوني" التلاميذ كانوا منصدمين، وسالوا منو البيعمل حاجة زي ده. يسوع قال: "الزول الانا بديهو قطعة الرغيف ده هو الخائن". بعد داك ادي الرغيف ليهوذا.

![OBS Image](https://cdn.door43.org/obs/jpg/360px/obs-en-38-07.jpg)

بعد ما يهوذا شال الرغيف ، شيطان دخل فيهو. يهوذا مشي يساعد قادة اليهود عشان يقبضوا يسوع وكان بالليل.

![OBS Image](https://cdn.door43.org/obs/jpg/360px/obs-en-38-08.jpg)

بعد الاكل، يسوع و تلاميذو مشوا لجبل الزيتون. يسوع قال: " الليلة كلكم حتخلوني. مكتوب، انا بضرب الراعي وكل الخرفان بتشتتوا".

![OBS Image](https://cdn.door43.org/obs/jpg/360px/obs-en-38-09.jpg)

بطرس جاوب: "حتى لو كل الناس خلوك، انا ما بخليك!" بعد داك يسوع قال لبطرس: "الشيطان داير يغربلكم كلكم، لكن انا صليت من اجلك، يا بطرس، عشان ايمانك ما يفشل. حتى ولو، الليلة، قبل ما الديك ما يصيح، انت بتنكرني تلاتة مرات انك ما بتعرفني".

![OBS Image](https://cdn.door43.org/obs/jpg/360px/obs-en-38-10.jpg)

بعد داك بطرس قال ليسوع: "حتي لو اموت، انا ما بنكرك ابدا !" باقي التلاميذ قالوا نفس الشئ.

![OBS Image](https://cdn.door43.org/obs/jpg/360px/obs-en-38-11.jpg)

بعد داك يسوع مشي مع تلاميذو لمكان اسمو جثسيماني. يسوع قال لتلاميذو يصلوا عشان الشيطان ما يجربهم. بعد داك يسوع مشي يصلي بنفسه.

![OBS Image](https://cdn.door43.org/obs/jpg/360px/obs-en-38-12.jpg)

يسوع صلي تلاتة مرات، "ابوي، لو ده ممكن، ارجوك ما تخليني اشرب من كاس الالم ده. لكن لو مافي طريقة تاني عشان يغفروا بيه خطايا الناس، خلي مشئيتك يتم". يسوع كان متطرب و عرقو كان بنزل زي قطرات الدم. الله رسل ملاك عشان يقويه.

![OBS Image](https://cdn.door43.org/obs/jpg/360px/obs-en-38-13.jpg)

بعد كل فترة من الصلاة، يسوع بيجي للتلاميذه، ولكن بلقاهم نايمين. ولمن رجع للمرة التالت، يسوع قال: "قوموا! البخوني وصل هنا".

![OBS Image](https://cdn.door43.org/obs/jpg/360px/obs-en-38-14.jpg)

يهوذا جاء مع قادة اليهود والعساكرو مجموعة كبيرة . وكانوا شايلين سيوف و كلباشات. يهوذا جاء ليسوع وقال: "سلام يا معلم و قبلو، هو عمل كده عشان يوري لقادة اليهود انو هو الراجل اليقبضوا. بعد داك يسوع قال: يا يهوذا هل بتخوني بقبلة؟"

![OBS Image](https://cdn.door43.org/obs/jpg/360px/obs-en-38-15.jpg)

لمن العساكركانوا بيحاصروا في يسوع، بطرس طلع سيفه و قطع اضان خادم الكاهن الاعلي. يسوع قال: "خت السيف بعيد! انا ممكن اسال الله الاب بجيش من الملايكة عشان يدافعوا لي. لكن لازم اطيع ابوي الفي السماء". يسوع شفي اضان الزول. بعد داك التلاميذ جروا بعيد.

_القصة من الكتاب المقدس ماخوذة من انجيل متي الاصحاح ٢٦ : ١٤ - ٥٦ وانجيل مرقس الاصحاح ١٤ : ١٠ - ٥٠ وانجيل لوقا الاصحاح ٢٢ : ١ - ٥٣ وانجيل يوحنا الاصحاح ١٢ : ٦ ؛ ١٨ : ١ - ١١ ._